Amăng mông livestream ba sĭ gơnam đang hmua, amai Đặng Thị Hồng Đào, pô sang bơwih ƀong sĭ mơdrô Trà Nghinh Phong, dŏ ƀơi phương Phú Yên, tơring čar Dak Lak lăi pơthâo če, mưt hăng ia boh kruăi hrĕ yua sang gơñu pơkra rai. Juăt găn rơgao amăng bruă sĭ mơdrô gơnam tam, ba gơnam hyu sĭ pơ sa, dua anih sĭ mlia hăng anih tuai čuă ngui, samơ̆ ăt bơwih ƀong dŏ anet, kơnong ngă mă hơjăn, amai Đào ăt kiăng dong mơnuih ngă hrŏm hăng hơdôm anih blơi pơhrui phrâo. Livestream lĕ bruă kiăng amai Đào ba gơnam tam jê̆ giăm ƀiă hăng mơnuih blơi yua, dưi ĕp ƀuh dong anih blơi pơhrui gơnam tam. “Livestream lĕ kiăng pơƀuh brơi lu mơnuih, ba gơnam tam tơl giăm mơnuih blơi yua, mơng anun hơmâo lu mơnuih thâo, pok prong anih sĭ gơnam. Ră anai ƀơi anih bơwih ƀong sĭ mơdrô ăt glăk ngă hơjăn pô đôč, aka ƀu hơmâo mơnuih ngă hrŏm yua anun aka ƀu pơhlôm ngă klă,  čang rơmang amra hơmâo dong mơnuih gum hrŏm kiăng pơđĭ kyar bruă sĭ mơdrô gơnam tam.”

Mơng sa mông lăi pơthâo gơnam tam amăng plang mơnuih mơnam truh pơ bruă pok anih sĭ gơnam hơđong ăt lĕ bruă dŏ lu tơnap tap. Hăng hơdôm anih sĭ mơdrô gơnam anet kar hăng amai Đào, mă yua boh thâo phrâo amra pok rai tơlơi gal kiăng ba gơnam tơl mơnuih blơi yua, samơ̆ kiăng pơjing tơlơi gal anun jing hơmâo mơnuih blơi yua, tŏ tui na nao bruă sĭ mơdrô hăng pok prong anih sĭ gơnam ăt gơnang nao gơnam hiam hơdjă, bruă ba hyu sĭ hăng ngă tơkuh nao rai anih anom sĭ mơdrô.

Hăng sa bruă pơkŏn dong amăng pơkra pơjing, yua boh thâo phrâo glăk ngă sa, dua boh sang anŏ ngă hmua gơgrong ƀiă dong amăng bơwih brơi phun pla. Sang anŏ yă Lê Thị Yến, dŏ amăng să Ea Drăng, tơring čar Dak Lak hơmâo pơplih 5 ektar đang kơsu tha hơdai nao pla kơphê pơplah hăng phun sầu riêng. Amăng lŏn hmua anun, sang anŏ hơmâo tuh pơ alin dưm truă đing pruih tơdjoh pơkrem pơlir hăng yua apui lơtrik hrĭp pơ-iă yang hrơi hăng abih tih prăk tuh pơ alin lĕ sa klai. Đing pruih ia dưi tut pơđuăi amăng măi telephôn, djru brơi kơ bruă pruih ia gêh gal ƀiă, huăi kiăng nao tơl hmua. Yă Yến brơi thâo, mă yua boh thâo phrâo djru brơi sang anŏ ñu pơkrem amăng bruă bơwih brơi phun pla, gơgrong ƀiă dong hăng ngă tŭ yua ƀiă amăng bruă ngă hmua. “Ră anai 5 ektar hơmâo yua apui lơtrik hrĭp pơ-iă yang hrơi laih anun pruih ia tơdjoh pơkrem, dưm pơđuăi amăng măi telephôn, mah nao pơ hơpă ăt dưi pok đuăi mă hơjăn. Mă yua boh thâo phrâo amra ngă kơ phun pla mơboh ƀiă, hlâo anun pơhrui 5 tơ̆n sa ektar samơ̆ ră anai đĭ 6 tơ̆n sa ektar mơ̆ ăt plai ƀiă glêh glar.”

Mơng bruă pok đing pruih amăng măi telephôn truh hyu ĕp mơnuh blơi gơnam amăng plang mơnuih mơnam, hơdôm ứng dụng anai brơi ƀuh, boh thâo phrâo glăk ƀơƀrư̆ mă yua amăng bruă ngă hmua, sĭ mơdrô kơ mơnuih ƀôn sang ƀơi Dak Lak. Samơ̆ mơnuih mă yua ăt phara mơn. Ƀu djơ̆ sang anŏ hơpă lêng kơ hơmâo prăk tuh pơ alin klơi măi mok đuăi mă hajăn; ăt ƀu djơ̆ hlơi hlơi ba gơnam sĭ amăng plang mơnuih mơnam lêng kơ dưi tŏ tui na nao bruă sĭ mơdrô. Yua anun, hrŏm hăng tơlơi gơgrong mơng rĭm boh sang anŏ, tơlơi črâo ba, tơkuh nao rai hăng djru brơi mơnuih ngă hmua ruah mă yua boh thâo phrâo lăp djơ̆ hăng tơlơi rơkâo sit nik, tơlơi anai yôm biă mă.

Ƀơi să Ea Drăng, Khul mơnuih ngă hmua să glăk ƀơƀrư̆ ba boh thâo mrô pơmut amăng bruă git gai wai lăng. Yă Vũ Thị Thúy Hòa, khua khul mơnuih ngă hmua să Ea Drăng lăi pơthâo kơ bruă mă amăng Khul. “Ƀing gơmơi pok pơhai abih bang amăng măi mok. Mơng hrơi pơmut hrŏm anih anom ƀon lan truh pơ abih bang hră pơ-ar lêng kơ dưm pơmut na nao. Kiăng dưi ngă tui anun, hlâo anun ƀing gơmơi khŏm pơtop hrăm tong ten, djă tơngan črâo bruă brơi rĭm čô pô ngă akŏ. Tơlơi kơđŏm glăi yôm hloh amăng să Ea Drăng anun lĕ kiăng thâo mơnuih ƀôn sang glăk kiăng hơget kah ta thâo djru brơi lăp djơ̆ ƀing ding kơna mơnuih ngă hmua kơ anah phun pla, hlô rông brơi klă hloh, sĭ hơmâo nua hăng thâo tong ten anih pla, anih rông.”

Hăng tơlơi găn rơgao pok pơhai bruă ƀơi ƀon lan, tơlơi rơkâo ƀu djơ̆ kơnong lĕ ba hơdôm boh thâo măi mok amăng bruă mă mơng khul đôč ôh ăt kiăng djru brơi ding kơna mă yua boh thâo phrâo kiăng pơsir hĭ hơdôm tơlơi rơkâo tong ten amăng bơwih ƀong, sĭ mơdrô. Amăng 6 blan akŏ thun anai, djop gưl khul mơnuih ngă hmua tơring čar Dak Lak hơmâo djru brơi giăm 2.000 boh sang anŏ ba gơnam sĭ amăng plang điện tử; pơtrut pơsur rơbêh 116.000 čô ding kơna dưm pơmut, mă yua ứng dụng Mơnuih ngă hmua Việt Nam. Rơbêh 300 anih pơtop mă yua boh thâo phrâo hơmâo pơphun, pơhưč giăm 27.000 wŏt ding kơna, mơnuih ngă hmua mut hrŏm. Ơi Võ Duy Kha, kơ-iăng Khua khul mơnuih ngă hmua tơring čar Dak Lak brơi thâo, Khua ba tơbiă hơnong pơkă djru brơi hơdôm boh ƀon lan lăi pơthâo gơnam tam, črâo ba bruă pơƀuh anih pla hăng kơtưn pơlir hơbit bruă blơi pơhrui gơnam. “Ƀing gơmơi hơmâo pơjing akŏ bruă anăp nao rĭm thun rĭm boh să, phương kiăng pơdar mă hơdôm video clip lăi pơthâo gơnam OCOP, gơnam đang hmua hiam hơdjă brơi neh met wa ngă hmua, djru brơi hơdôm gơnam mơng 3 asar pơtŭ hơmâo gru mrô QR pơƀuh tong ten anih pla, pơlir hăng hơdôm anih anom amăng bruă blơi pơhrui gơnam tam.”

Tui sit nik brơi ƀuh, pơplih mrô amăng ngă hmua ƀu djơ̆ kơnong lĕ mă yua măi mok phrâo ƀudah ba gơnam sĭ amăng plang mơnuih mơnam đôč ôh. Tơlơi yôm hloh lĕ mơnuih ngă hmua dưi ruah mă boh thâo phrâo lăp djơ̆, thâ mă yua hăng tŏ tui mă yua amăng tơlơi sit nik hă ƀŭ; laih dong, hơdôm boh thâo phrâo anun amra ngă plai ƀiă prăk tuh pơ alin, đĭ tui nua gơnam tam hăng ba hyu sĭ pơ anai adih klă hă ƀŭ. Lơm mă yua boh thâo phrâo pơlir hăng tơlơi rơkâo sit nik hăng ba glăi boh tŭ yua dưi pơkă lăng, pơplih mrô kah jing tơlơi pơplih jơlan gah bơwih ƀong huă, sĭ mơdrô, djru brơi mơnuih ngă hmua Dak Lak ƀơƀrư̆ ngă pô lơm yua boh thâo phrâo hăng hrưn đĭ nua gơnam đang hmua./.