Dak Lak lĕ sa amăng hơdôm kual pla boh durian lu amăng dêh čar, hăng đơ đam pla truh 41.000 hektar, rơnoh pĕ pơhrui thun 2026 hơmâo 500.000 tơn. Bruă ngă pơtum pơčrâo ba hơdră pla pơjing phrâo djơ̆ lăp pơphun mơ̆ng kơnôl 26/10 truh abih kơnôl 26/11 ƀơi 35 boh să, phường.

Boh yom phun lăi nao, pơtô mơnuih ngă hmua khom ngă tui djơ̆ tơlơi pơtrun mơ̆ng VietGap; mă yua hơbâo pruai, ia jrao hlăt tui tơlơi pơtô ba djơ̆ hnơ̆ng; wai lăng ia bruih, truh pơ mông pĕ boh, pơkra ming, răk pioh ba sĭ mơdrô khom ngă djơ̆ tơlơi pơtrun khut khăt hăng lăi pơthâo phun tơdŭ anih pla, anih pơkra ming gơnam sĭ mơdrô boh durian. Tal jak iâu ngă tui anai, amra djru mơnuih ngă hmua thâo hluh tong ten, ngă juăt tui bruă pla pơjing, khom ngă djơ̆ hnơ̆ng pơkă VietGap laih anun prăp lui čih pioh djop mơta tơlơi hơmâo amăng bruă ngă lơ̆m đang hmua pla sầu riêng. Mơ̆ng anun, pơjing atur kiăng pơđĭ tui rơnoh pơhrui glăi, djă kơjăp kơnuih hiam, anăn boh durian jơman rơgoh mơ̆ng Dak Lak, đah mơ̆ng pơđĭ kơtang tơlơi pơhno hăng pơtrut bruă pơđĭ kyar hơđong kơjăp.