Jơnum hơmâo pơlăng nao rai mơng să Phú Thiện truh pơ hơdôm boh să, phương anun lĕ Ayun Pa, Ia Rbol, Ia Sao, Pờ Tó, Ia Pa, Ia Tul, Phú Túc, Ia Dreh, Ia Rsai, Uar, ngă gêh gal kiăng abih bang mơnuih ƀôn sang mut hrŏm, lăi pơthâo tơlơi kiăng, tơlơi čang rơmang hăng rơkâo đĭ Khua pơ ala mơnuih ƀon sang dêh čar, hơdôm anom bruă gơnong glông hăng ƀon lan. Mơnuih ƀôn sang hơdôm boh să, phương hơmâo lăi pơthâo lu bruă amăng tơlơi hơdip: bruă rŭ pơdong glăi anŏ răm rai, gum djru ană plơi pla tơdơi kơ hơjan ia ling dăo, pơkra ming jơlan glông tơkuh nao rai să, pơkra ming hơdôm ring bruă ia hơdjă, pơsir hĭ hơdră djru prăk apah brơi mơnuih mă bruă tui tơlơi pơtrun mrô 178.

Hrŏm hăng hơdôm bruă djru mơnuih mơnam, mơnuih ƀôn sang ruah khua ăt đing nao bruă pơmut anih anom. Tŭ mă hơdôm tơlơi pơgôp hiăp mơng mơnuih ƀôn sang, kơ-iăng Khua git gai pơ ala mơnuih ƀôn sang dêh čar Nguyễn Hồng Diên lăi rơđah, gơnong glông aka ƀu pơmĭn amra tŏ tui pơmut hrŏ, gưl tơring čar, să. Tui hluai tơlơi rơkâo sit nik mơ̆ rĭm boh tơring čar amra sem lăng kơ bruă dưm dăp gưl să brơi lăp djơ̆, tŭ yua ƀiă.