Mông jơnum hơmâo ƀing pơ ala mơ̆ng hơdôm anom bruă wai lăng gah Gơnong dlông, tơring čar, ƀôn prong, sang bruă pơsur ngă hmua, hrŏm hăng hơdôm anom ngă ƀong hrŏm, sang bruă bơwih ƀong pơkra gơnam, anung gơnam amăng hruh, laih anun ba sĭ gơnam đang hmua pơ tač rơngiao. Ƀing khua pơƀut lăi nao hơdôm tơlơi kiăng pơplih amăng bruă wai lăng, bong kjăp gru mrô anih pla, mrô anih anung gơnam; laih dong pơčrâo rơđah hơdôm anŏ tơnap amăng bruă pơkra gơnam, wai lăng gơnam ngă hmua, hră pơčrâo brơi anih pla, pơkra gơnam laih dong pơtruh nao rai hơdôm kual pla hăng anih anung gơnam, sang bruă bơwih ƀong hăng tač rơngiao.

Mơ̆ng tơlơi ngă hmua, ơi Nguyễn Thanh Sơn, Khua anom ngă ƀong hrŏm Ngă hmua Dạ M’ri brơi thâo, anom ngă ƀong hrŏm hơmâo 180 čô ding kơna, hăng giăm 450 ha đang sâu riêng. Tơlơi tơnap prong hloh ră anai lĕ bruă tơjŭ pla mơ̆ng hơdôm boh sang anŏ aka ƀu kơnar ôh, lơ̆m anun anih blơi sĭ jai hrơi ƀu kơnong lăng nao gơnam pơkra tuč rơnuč ôh, gơñu lăng nao kơ hơnong pơkă, bruă tơjŭ pla, pơkra gơnam hăng dưi ĕp ƀuh anih pla gơnam ba sĭ: “Ră anai mơnuih ngă hmua ƀing ta drơi pơ ngă mă, ƀu hơmâo pô hlơi hrup hăng pô hlơi ôh. Bruă kiăng ngă lĕ pơkra gơnam hiưm pă. Anom ngă ƀong hrŏm gơmơi hơmâo laih jơlan gah ngă bruă, pơtŏp brơi, jơnum pơčrông sai, lông ngă lăng; tuč rơnuč gơmơi kiăng lĕ ngă hmua hơdjă rơgoh hơđong kjăp”.

Mơ̆ng tơlơi hơmâo mơ̆ng Anom ngă ƀong hrŏm Dạ M’ri ăt brơi ƀuh mơn anŏ kiăng jai hrơi prong bong kjăp gru mrô anih pla ƀơi đơ đam tơring čar Lâm Đồng. Truh ră anai, hơmâo laih 1.611 gru mrô anih pla, amăng anun hơmâo 1.094 mrô pioh ba sĭ pơ tač rơngiao hơmâo laih dêh čar blơi gơnam kĭ brơi; hrŏm hăng 547 mrô sang bruă anung gơnam ba sĭ. Lăp đing nao, hơmâo truh kơ 173 gru mrô anih pla hăng rơbêh 3.600 ha laih anun 61 gru mrô pơčrâo anih anung gơnam arăng brơi pơdơi bruă ƀudah mă pơhrui glăi.

Hơdôm mrô anai brơi ƀuh, lơ̆m hră brơi gru mrô jai hrơi amuñ tui, jao glăi kơ gưl să, laih anun dưm pơmut mrô, akŏ phun bruă wai lăng kiăng hơdai nao bong kjăp anŏ dưi tơdơi kơ hơmâo hră pơ-ar, krăp lăng laih anun rim čô mơnuih kiăng glăm bruă hloh amăng bruă pơkra pơjing gơnam tam.

Ơi Lê Quốc Thanh, Khua sang bruă pơsur ngă hmua dêh čar lăi dlăm, mrô anih pla kơnong jing tơlơi pơkă hnăng blung đôč; anŏ yom sit biă ñu ƀơi hơdră ta ngă hmua, hla tui hơnong pơkă, mă yua ia jrao, hơbâo pruai hiưm pă, laih anun abih bang tơlơi pơhing nao hrŏm hăng bruă pơkra gơnam:“Mrô anih pla aka ƀu thâo lăi hlâo tơlơi hơget ôh, anun lĕ hơnong pơkă blung a đôč. Bơ mơnuih ngă hmua tơjŭ pla hiưm pă, kiăo tui hơnong pơkă pơpă thơ, mă yua ia jrao hơbâo pruai hơget, jing abih bang tơlơi pơhing mơ̆ng gru mrô anun kah mơ̆ng dưi lăi gơnam klă hă ƀô̆”.

Mơ̆ng hơdôm bruă hơmâo ba tơbiă, mông jơnum kiăng pơtruh mơnuih ngă hmua, anom ngă ƀong hrŏm, sang bruă anung gơnam laih anun sang bruă sĭ mơdrô pơ tač rơngiao; pơtrut mă yua boh thâo mrô amăng bruă wai lăng hră pơ-ar, ĕp ƀuh anih pla, pơhŭi hlâo tơlơi răm rai; laih dong pơđĭ tui anŏ klă anih pla gơnam đang mơ̆ng dưi ngă bruă tui hăng anih blơi kiăng.