Ră anai đơ đam dêh čar hơmâo 741 anih hơmâo kman pơtah čroh ƀơi un amăng 31 boh tơring čar, ƀôn prong. Kơnong ƀơi Dak Lak, kman ƀuh ƀơi 14 boh sang anŏ amăng 9 ƀut plơi pla; khŏm pơrai hĭ 130 drơi un. 7 boh să, phường amăng tơring čar ăt dŏ kman, amăng anun 3 boh să Dliê Ya, Krông Năng hăng Tam Giang kman lar hyu aka truh 21 hrơi. Him lăng kman pơtah čroh ƀơi un amra hơđuh đĭ kơtang, sit biă ñu ƀơi hơdôm boh ƀon lan rông lu, tơlơi anai bơdjơ̆ sa nao gơnong bruă rông un, bruă sĭ mơnong un hăng ngă hơƀak jrak.

Ƀơi anăp kơ tơlơi tơnap tap mơng klin kman hăng amra lar hyu lu anih, lơ 25/7, Jơnum min mơnuih ƀôn sang tơring čar Dak Lak hơmâo kông điêng rơkâo djop gơnong bruă, anom bruă hăng gong gai ƀon lan pok pơhai khut khăt, ha amăng plĕ hơdôm hơdră pơgang, pơgăn amăng đơ đam tơring čar.

Đơ đam tơring čar Dak Lak ră anai hơmâo rơbêh 1,2 klăk drơi un. Mơng akŏ thun truh ră anai, Dak Lak hơmâo pơphun tlâ̆o ia jrao pơgang tui tơđar tal 1 brơi hlô rông. Samơ̆, sa, dua boh ƀon lan ăt tlâ̆o dŏ aset, sit biă ñu tlâ̆o brơi un hăng mơnŭ bip.

Yă Đặng Thị Thủy, Kơ-iăng Khua gơnong bruă ngă hmua hăng ayuh hyiăng rơhuông adai tơring čar Dak Lak brơi thâo: Hrŏm hăng bruă pơtrut tlâ̆o pơgang, pruih ia jrao, gơnong bruă bơdjơ̆ nao tơring čar ăt hruă kjăp bruă pel ĕp pơdŭ pơgiăng, čut hơtă, sĭ mơdrô hlô mơnong, laih dong črâo ba hơdôm boh sang anŏ rông hlô pơhlôm hơdjă, drông war brơi agaih, tañ ĕp ƀuh hăng pơgang hĭ hơdôm anih hơmâo kman.

“Hăng tơring čar ră anai prong ƀiă, ƀing gơmơi kơtưn amăng bruă git gai mơng hơdôm anom bruă wai pơgang, sit biă ñu ƀing adơi ayong thâo kơ bruă anai ƀơi hơdôm anih anom kiăng lăi pơthâo hmao tlôn brơi sang bruă, pơphô bruă brơi khua mua gơnong bruă kiăng git gai hmao tlôn. Bruă anai ƀing gơmơi đing nao hloh. Ƀing apăn bruă kiăng gir run djru brơi să, gum hrŏm ƀing apăn bruă să. Lơm ƀing apăn bruă să pơgiong bruă mă, kah hăng gum hrŏm hăng gơnong bruă pơgiong hơnong pơkă”.

Bơ ƀơi tơring čar Gia Lai, mơng rơnuč blan 6 truh ră anai, đơ đam tơring čar hơmâo ĕp ƀuh 5 anih hơmâo kman pơtah čroh ƀơi un hăng abih tih rơbêh 300 drơi un pơtah čroh hơmâo pơrai hĭ. Bruă glŏm pơrai un djai amăng ia krông čroh hnoh ngă hơƀak jrak hơmâo ƀuh amăng hơdôm boh ƀon lan anun lĕ Bình Hiệp, Bình An, Hoà Hội, Tuy Phước Bắc, Hoài Ân, Ân Tường hăng Bồng Sơn…Bruă anai amra ngă kman pơtah čroh ƀơi un lar hyu kơtang tui dong. Amăng rơwang hrơi tơjuh rơgao, hơdôm anom bruă ƀơi phường Hội Phú (Gia Lai) ba nao amăng mơmŏt mlăm glŏm pơrai lu amăng ia krông hăng dor tui tơlơi pơkă pơgang klin kman. Ơi Vũ Mạnh Định-Khua Jơnum min mơnuih ƀôn sang phường Hội Phú brơi thâo.

“Jơnum min mơnuih ƀôn sang phường hơmâo git gai tơhan kông ang pel ĕp bruă pơdŭ pơgiăng un amăng phường, lăng amăng camera kiăng kơ ĕp ƀing mơnuih ba nao pơrai un amăng čroh ia Hội Phú. Tơdah ƀuh pơsir hĭ khut khăt. Dua dong lĕ git gai anom bruă ling tơhan pơkiăo nao tơhan ba đĭ un djai, pruih ia jrao, pơrai hĭ truh 1 mông mơguah kah mơng giong; pơtô pơblang brơi hơdôm boh sang anŏ thâo amăng bruă pơgang klin kman”.

Ƀơi anăp kơ tơlơi tơnap tap, mơng lơ 16/7, tơring čar Gia Lai hơmâo akŏ pơdong anih wai pơgang kman ƀơi hlô rông pơlir djop gơnong bruă ƀơi 4 anih juăt ƀuh amăng hơdôm ară jơlan phun anun lĕ: Bình Đê, Song An, Ia Khươl hăng Ia Le. hơdôm anih wai pơgang amra mă bruă na nao kiăng pơgang kjăp bruă pơdŭ pơgiăng, ba hyu hlô mơnong hăng gơnam pơkra mơng hlô mơng mut nao tơring čar.

Hrŏm hăng anun, gơnong bruă bơdjơ̆ nao tơring čar glăk pok pơhai ha amăng plĕ lu hơdră pơgang, pơgăn klin kman anun lĕ pel ĕp bruă rông hlô, čuh hơtă, kơtưn pruih ia jrao, djru pơgang hĭ anih hơmâo kman tơdah ƀuh hăng pơtrut kơtang bruă lăi pơthâo, pơtô pơblang kiăng mơnuih ƀôn sang hluh rơđah dong./.