Tui hăng Gơnong bruă ngă hmua hăng pơđĭ kyar plơi pla tơring čar Dak Lak, bơyan pĕ kơphê thun 2023-2024, rơnoh kơphê hơmâo pơhrui glăi ƀơi Dak Lak truh kơ 535.000 tơn, hrŏ trun 23.000 tơn pơkă hăng thun hlâo. Samơ̆ yua kơ rơnoh kơphê sĭ mơdrô đĭ ƀiă, anun prăk sĭ mơdrô hăng dêh čar tač rơngiao dưi pơhrui glăi truh kơ 915 klăk USD, đĭ tui 168 klăk USD pơkă hăng thun hlâo. Tui hăng ơi Nguyễn Hoài Dương, Khua Gơnong bruă đang hmua hăng pơđĭ kyar plơi pla tơring čar Dak Lak, phun kơphê ăt jing phun pla gơgrong phun, djru lu biă mă kơ tơlơi pơđĭ kyar bơwih ƀong huă mơnuih mơnam ƀơi  tơring čar.

Biă mă ñu bơyan pĕ kơphê thun 2023-2024, Dak Lak hơmâo pok prong, pơđĭ kyar lu mơta gơnam sĭ mơdrô mơ̆ng kơphê jơman, anai lĕ anăp pơđĭ kyar phrâo, djơ̆ găl hăng tơlơi či kiăng mơñum kơphê amăng rŏng lŏn tơnah. Bơyan kơphê pơ anăp, djop tơring glông, plơi pla khom đing nao pla kơphê djơ̆, hiam, rơgoh hơdjă, pơđĭ kyar lu hloh kual pla kơphê jơman; pơtrut bruă pơgang ba kơphê hiam, hơmâo anŏ pơčrâo anih pla lŏn mơnai ƀơi Ƀuôn Ma Thuôt truh pơ anih sĭ mơdrô dêh čar tač rơngiao, ngă tui djơ̆ tơlơi pơkă pla kơphê ƀu jah drôm glai klô yua kual Mi kô̆ pơtrun.