Tui hăng Gơnong bruă pơkra gơnam sĭ mơdrô tơring čar Dak Lăk, amăng 9 blan rơgao, prăk pơhrui gơnam ba sĭ pơ tač rơngiao mơ̆ng tơring čar anai hơmâo 2,3 klai USD, đĭ rơbêh kơ 6% pơhmu hăng tơđar thun hlâo. Kơnong boh sâu riêng hơmâo rơbêh kơ 262 klăk USD, đĭ rơbêh 61 klăk USD pơhmu hăng thun 2025. Ƀơi mông pơbưp, ƀing ngă bruă mơdrô lăi nao anŏ tơnap lơ̆m ngă hră gru mrô anih la laih anun bruă blơi gơnam aka ƀu nao hrŏm kjăp hăng tơlơi kiăng hơduah ƀuh anih tơjŭ pla hmua đang. Ơi Huỳnh Văn Kiều, Khua kông ti ba sĭ gơnam đang hmua pơ tač rơngiao Hoa Kiều, brơi thâo:“Mơnuih ngă hmua ră anai glăk bưp anŏ tơnap mơn amăng bruă ngă hră pơsit gru mrô anih pla, lơ̆m anun blơi boh sâu riêng hăng mơnuih hơmâo anih pla, wơ̆t hăng mơnuih aka ƀu hơmâo hră anih pla lĕ nua ñu ƀu pleh ploh lu aset đơi lơi. Yua hnun, ƀu bơkơnar ôh amăng bruă ba sĭ pơ tač rơngiao, yua dah mrô anih pla bơdjơ̆ nao hră pơčrâo brơi anih tơjŭ pla, hmua đang ngă sâu riêng”.

Rơngiao kơ anŏ tơnap kơ hră gru mrô anih pla, măi ngă rơ-ot, răk pioh, hăng pơkra gơnam ƀơi Dak Lăk ăt dŏ kơƀah mơn. Pơtruh hơdôm kual pla, anom ngă ƀong hrŏm, sang bruă anung gơnam ba sĭ laih anun sang bruă mơdrô ba sĭ gơnam pơ tač rơngiao aka ƀu kjăp ôh, boh sâu riêng juăt ba sĭ boh săt đôč. Kiăng dưi pơklaih brơi anŏ tơnap anai, ƀing khua rơkâo kiăng ngă kjăp tui bruă pơtruh nao rai, ngă tŭ yua hloh bruă wai lăng gru mrô anih pla laih anun wai lăng anŏ klă mơ̆ng boh troh; pơhiăp tom sang bruă blơi gơnam, hnun kah mơ̆ng hơmâo lu anih sĭ ba sĭ.

Nao pơhmư̆ jơlan hơdră kơphê mơnuih ngă bruă mơdrô, ơi Đỗ Hữu Huy, Khua jơnum min mơnuih ƀôn sang tơring čar Dak Lăk rơkâo hơdôm gơnong bruă djă pioh tơlơi pơgôp hiăp, djru ba sang bruă mơdrô đĭ kyar bruă pơkra sâu riêng hơđong kjăp:“Tơring čar lăng nao biă kơ bruă pơkra gơnam klă hiam. Thun anai tơring čar kĭ hră man pơdong sang măi, sang čơ blơi gơnam ƀơi hơdôm kual sang măi. Pơ anăp anai, khŏm hơmâo tơlơi gum djru mơ̆ng Khul pla boh sâu riêng amăng bruă hyu blơi boh sâu riêng, pơkra ƀudah blah kơđuh mă tŭ bloi sâu riêng đôč či ba sĭ pơ tač rơngiao, ƀudah pơkra gơnam klă hloh, tong ten hloh, hnun kah mơ̆ng dưi, bơ ƀing ta tŭ kơ pla giong anun ba sĭ boh ñu tui anun ƀu hơmâo nua đơi ôh”.