Dak Lak ră anai, hơmâo lu mơta boh troh mơ̆ng đang hmua phun ba nao sĭ mơdrô pơ tač rơngiao, amăng anun hơmâo kơphê, sầu riêng, tiu jing gơnam sĭ mơdrô hơmâo nua yom, pơmă hloh. Thun 2025, prăk pơhrui glăi sĭ mơdrô ƀơi tơring čar anai hơmâo 2,8 klai USD; kơnong kơphê hăng sầu riêng truh 1 klai USD. Dak Lak hlăk brơi ĕp lăng tong ten anŏ hiam, hơdjă rơgoh boh troh, mơnong ƀong mơ̆ng đang hmua, brơi ĕp ƀuh thâo anih pla, sang bruă pơkra ming hlâo kơ ba hyu sĭ mơdrô laih anun ngă djơ̆ tơhnal pơkă rơnuk rơnua hơđong, rơgoh hơdjă mơnong ƀong huă, pok prong anih anom sĭ mơdrô pơ tač rơngiao.

Dak Lak gir run kơtưn kiăng hơmâo rơbêh 90% mrô sang bruă pơkra ming hnang blung, anih sĭ mơdrô gơnam đang hmua dưi ngă brơi hră pơsit djơ̆ hnơ̆ng pơkă rơgoh hơdjă, djop anŏ gêh găl tui tơlơi tŭ ư mơ̆ng jar kmar pơkă anŏ hơdjă rơgoh mơ̆ng ƀong huă; abih bang sang bruă sĭ mơdrô raih daih, khom kĭ hră pơkôl, ƀuăn ngă djơ̆ tơlơi pơtrun. Lăp đing nao, 100% kual pơkra ming gơnam sĭ mơdrô, anih anung gơnam sĭ mơdrô bơwih brơi kơ bruă ba hyu sĭ pơ dêh čar tač rơngiao khom hơmâo hră pơsit gru kơnăl pơčrâo anih pla, sang bruă anung gơnam, rim sa rơwư̆ pel ĕp tong ten hăng abih bang 100% mơta gơnam sĭ mơdrô ba nao pơ tač rơngiao khom thâo phun tơdŭ anih pla pơjing, anih ming pơkra djơ̆ tơlơi kiăng mơ̆ng anih rơkâo blơi pơ tač rơngiao adih.