Tui hăng anun, amăng 3 blan tal klâo hăng tal pă thun anai, grup hyu ĕp lăng mơ̆ng Gơnong bruă Ngă hmua hăng pơđĭ kyar plơi pla tơring čar Dak Lak, amra nao ĕp ječ ameč ƀơi hơdôm sang bruă hăng anih ngă hmua pla boh sầu riêng, anih pơkra, dưm boh sầu riêng amăng kơdung hlâo kơ ba sĭ, arăng hơmâo ngă brơi hră, ngă brơi mrô gru kơnăl; sang bruă sĭ mơdrô, dưm boh sầu riêng amăng kơdung ngă djơ̆ hnơ̆ng pơkă mơ̆n hă yua kơnuk kơna wai lăng amăng tơring čar.

Anih či nao ĕp lăng lĕ, sang anŏ mơnuih ƀôn sang , sang bruă, khul ngă bruă hrŏm pô sĭ mơdrô boh sầu riêng hơmâo tŭ mă mrô gru kơnăl pơčrâo tong ten anih pla boh sầu riêng. Truh ră anai, Anom bruă mă jia sĭ mơdrô hăng tač rơngiao gah dêh čar Khač hơmâo ngă brơi 68 mơta gru mrô kơnăl pơthâo anih pla boh sầu riêng hăng đơ đam hmua rơbêh 2.500 hektar laih anun ngă brơi mrô gru kơnăl dưm boh sầu riêng amăng kơdung brơi kơ 23 boh sang bruă ƀơi Dak Lak. Tui hăng Gơnong bruă Ngă hmua hăng pơđĭ kyar plơi pla tơring čar Dak Lak, bruă nao ĕp lăng ječ ameč anai kiăng pơtrut tơlơi thâo hluh, ngă djơ̆ tơpă, gơgrong ba bruă akŏ pơjing djă anăn hmư̆ hing hiam klă sĭ mơdrô boh sầu riêng hơđong kjăp.