Anih črâo ba lĕ anih mơnuih ngă hmua, anom bơwih ƀong hrŏm, anom bruă sĭ mơdrô hăng hơdôm anih anom ngă hmua dưi pơbưp pơlăi nao rai, thâo hơdôm bruă yua boh thâo, măi mok hăng hơdră pơplih mrô. Boh tơhnal črâo ba đing nao hơdôm bruă sit nik amăng bruă ngă hmua anun lĕ boh thâo pla pơjing, pơgang hlăt mŏt, dưm răk pioh hră pơ-ar, pơƀuh tong ten anih pla, pơlir hăng anih anom sĭ mơdrô hăng blơi pơhrui gơnam đang hmua. Ơi Nguyễn Công Vương, pô pơ ala sa anom bruă sĭ mơdrô mut hrŏm jơlan hơdră anai brơi thâo, bruă ba anom bơwih ƀong sĭ mơdrô yua boh thâo phrâo tơl giăm ƀiă dong mơnuih ngă hmua amra ngă gêh gal kiăng hơdôm hơdră bruă phrâo hơmâo sem lăng tong ten hăng mă yua lăp djơ̆ tơlơi sit nik: “Anom bơwih ƀong sĭ mơdrô amra hrŏm hăng anom bruă pơsur ngă hmua pok pơhai hơdôm hơbô̆ bruă ngă hmua yua boh thâo phrâo dưi ngă tui sit nik. Mơng hơdôm hơbô̆ bruă ngă lông lăng hơmâo pơlir kơplah wah hơdôm anom bơwih ƀong sĭ mơdrô hăng anom bruă pơsur ngă hmua, bruă mă yua boh thâo phrâo amra ngă lar hyu hăng ba pơmut amăng ngă hmua tañ ƀiă.”

Hrŏm hăng hơdôm anih črâo ba, 4 grup črâo ba boh thâo hăng bơwih bơwang gah pơsur ngă hmua hơmâo akŏ pơjing, anăp nao pơjing hơdôm anih anom djru brơi bruă mă, tŭ mă tơlơi kiăng mơng ƀon lan hăng pơlir mơnuih ngă hmua, anom bơwih ƀong hrŏm, anom bruă sĭ mơdrô hăng hơdôm hơdră bruă yua boh thâo pla pơjing, boh thâo măi mok lăp djơ̆.

Yă Đặng Thị Thủy, Kơ-iăng Khua gơnong bruă ngă hmua hăng ayuh hyiăng tơring čar Dak Lak brơi thâo, bruă akŏ pơjing hơdôm anih črâo ba hăng hơdôm grup črâo ba amra jing anih pơlir dua bơnah kơplah wah anom bruă pơsur ngă hmua hăng mơnuih ngă hmua; mơng anun hmao tlôn thâo tơlơi tơnap tap, tơlơi rơkâo sit nik kiăng črâo ba, djru brơi. Yă Thủy lăi pơtong, bruă pơsur ngă hmua ră anai ƀu djơ̆ kơnong dŏ glăi amăng pơtô brơi boh thâo pla pơjing đôč ôh mơ̆ ăt kiăng pơlir thâo yua boh thâo ia rơgơi, anih anom sĭ mơdrô hăng pơphun ngă hmua: “Tơlơi kiăng mơng ƀing gơmơi anun lĕ hơdôm anih črâo ba anai jing anih djru ba jê̆ giăm mơnuih ngă hmua, anom bruă sĭ mơdrô hăng anom bơwih ƀong hrŏm; djru brơi mơnuih ngă hmua dưi mă yua boh thâo pla pơjing, laih dong pơlir hăng hơdôm anih blơi pơhrui gơnam. Ƀu djơ̆ kơnong črâo brơi boh thâo ngă hmua kar hăng hlâo anun, anai amra jing anih tơkuh nao rai kơplah wah 4 boh sang, pơsir hĭ hơdôm tơlơi ngă tơnap tap sit nik mơng bruă ngă hmua, mơng anun pơjing rai hơdôm glông pơlir ngă hmua hăng tŏ tui ngă lar hyu, pok prong hơdôm hơbô̆ bruă anai.”./.

 Hương Lý/VOV - Tây Nguyên