Bruă ngă “30 hrơi mlăm” pơmut boh thâo mrô anih pla, anih anung gơnam hơmâo Dak Lăk pơphun ngă mơ̆ng kơnôl 7/8 truh kơnôl 7/9, pơƀut lăng glăi, djă pioh, pơkra ming djơ̆ hăng pơmut amăng boh thâo djă pioh anih pla, anih anung gơnam ƀơi boh thâo ia rơgơi mrô kơ phun sâu riêng.

Hơdôm grup ngă bruă hơmâo ngă hrŏm hăng gong gai trun nao tơl anih, pơsit rơđah tơlơi pơhing, ƀơ ƀrư̆ ba tơlơi pơhing anih pla pơmut amăng glông wai lăng, hơmâo đơ đam đang hmua, anih pla, pô wai lăng, hră pơ-ar tơlơi phiăn hăng bruă tơjŭ pla pơkra gơnam ră anai. Rơngiao kơ 60% đơ đam đang hmua hơmâo mrô anih tơjŭ pla hăng anih anung gơnam hơmâo pơmut boh thâo mrô, Dak Lăk ăt ƀuh mơn hơdôm bruă glăk hơmâo kah hăng anih pla, kah hăng sư̆ rơbư̆ bruă mă, boh thâo ia rơgơi, hăng hră pơ-ar aka ƀu hơmâo djŏp./.