Hơdôm boh sâu riêng glăk hơmâo pĕ mơng đang hmua prong 3,6ha mơng sang anŏ yă Hồ Thị Huệ, thôn 19/5 să Krông Pač, tơring čar Dăk Lăk. Bơyan anai, sang anŏ ñu hơmâo rơbêh 90 tơn boh sâu riêng. Abih bang hơmâo sang bruă mơdrô kĭ hră blơi nua ñu 68.000 prăk/kg. Yă Huệ brơi thâo, nua anai hơmâo pơdah thâo hlao ƀơi mông jơnum pơjuă nua pơ đang mơtăm yơh: "Gơmơi čang rơmang hơdôm tal jơnum pơjuă nua djơ anai amra đĭ tui, ba gơnam mơng neh met wa dưi sĭ rơđah rơđông, abih bang mơnuih thâo".

Hrŏm hăng đang sâu riêng yă Huệ, 9 boh sang anŏ pơkŏn ƀơi să Krông Pač Dăk Lăk prong rơbêh 14ha, hơmâo ruah či pơjuă nua. Anai jing hơdôm blah đang sâu riêng Dona hơmâo hră pơ-ar, hơmâo mrô čih anih pla hăng hơmâo tơlơi pơhing kơ bruă pơkra gơnam, hơdjă rơgoh hăng dưi ba sĭ pơ tač rơngiao. 

Hlâo či blơi, sang bruă mơdrô nao lăng tơl anih pla ƀơ̆i. Mơng nua  blung a lĕ 55.000 prăk/kg, tơdơi kơ dua tal plĕ hră, sâu riêng hơmâo blơi hăng nua 68.000 prăk/kg. Abih tih sâu riêng hơmâo blơi giăm 24 klai prăk, pơmă hloh kơ nua blơi năng blung 4,5 klai prăk. Yă Đinh Thị Hoa, Khua kông ti TNHH sĭ mơdrô gơnam mơng hmua pơ čar rơngiao Nguyên Thuận brơi thâo:"Kông ti gơmơi nao lăng tơl anih pla laih anun ƀuh 10 blah đang sâu riêng mơng 10 boh sang anŏ djơ̆ hăng anŏ či kiăng mơng Kông ti. Gah gong gai să ăt djru brơi mơn kiăng kông ti gơmơi dưi pơjuă nua, kiăng sang bruă mơdrô dưi pơbưp nao rai".

Lăp đing nao, mông jơnum pơjuă nua ƀu kơnong hơmâo nua 68.000 prăk/kg đôč ôh, ăt pôr pơthâo kơ anih pla amăng mông blơi sĭ gơnam. Sang bruă mơdrô dưi sem lăng abih bruă rông pla hiưm pă, pơtŏng lăng djơ̆ hăng anih blơi kiăng mơn: mơnuih pla hơmâo djŏp tơlơi či pơsit phun pla gơñu klă. Anai jing bruă hrăm tui tơlơi pơmin bơwih ƀong mơng hmua rơgơi hloh: mơng sĭ gơnam jing sĭ anŏ klă, tơlơi pơhing, hră pơ-ar hăng dưi ĕp ƀuh anih pla, pơkra gơnam. Ơi Lại Đức Đại, Khua jơnum min mơnuih ƀôn sang să Krông Pač, lăi anai jing bruă lông ngă lăng năng blung amăng bruă akŏ pơjing bruă bơwih ƀong pơkra gơnam, pơtruh ƀơi anăp mơnuih pla hăng anih sĭ mơdrô: "Mơnuih ngă hmua hơmâo sĭ ƀu djơ̆ gơnam đôč ôh, anun lĕ gơnam hơmâo nua djơ̆ hăng pran gơñu glêh glar ngă bruă. Gơmơi čang rơmang kiăng dưi pơtruh anih mơdrô hăng mơnuih ngă hmua ƀơi anăp, tañ hloh, tŭ yua hloh, ba glăi anŏ mơak kơ pô sĭ wơ̆t hăng pô blơi."

Tui anun, pơjuă nua dưi jing bruă pơtrut sĭ mơdrô, biă ñu lĕ đang hnua klă hloh, gơnam hiam, hơmâo hră pơ-ar laih anun djơ̆ hăng anih blơi mơng čar rơngiao kiăng. Yom hloh dong, ngă lu mơnuih lăp đing nao, pơƀuh hyu anŏ klă laih anun djru anih mơdrô thâo krăn hơdôm anih pla gơnam klă. Yă Đặng Thị Thủy, Kơ-iăng khua gơnong bruă hmua hăng ayuh hyiăng Dăk Lăk lăi bruă ngă tui anai pơtrut pơsur mơnuih ngă hmua pơđing nao hloh kơ anŏ klă mơng gơnam laih anun pơtruh nao rai pơkra gơnam: "Bruă ngă pơčeh phrâo rơgơi hăng sit nik kiăng neh met wa hok mơak laih anun pơplih tơlơi pơmin ngă hmua tui hơđăp jing ngă hmua bơwih ƀong ba sĭ, lăng anŏ klă yơh yom hloh".

Ha wơt jơnum pơjuă nua ƀu dưi pơplih mơtăm ôh bruă sĭ mơdrô mơng abih bang gơnam. Samơ̆ tơdah ta ngă klă tui, bruă pơtŏng sit anŏ klă, mrô gơnam pơhrui glăi hăng bruă rông pla ngă hmua hiưm pă ăt jing phun atur kơ bruă pơtrut sĭ mơdrô tŭ yua, biă ñu hăng hơdôm anih pla, gơnam klă, djơ̆ hăng anŏ či kiăng mơng anih mơdrô./.