Kiăng dưi ba rơnoh đĭ kyar gơnam tam mơ̆ng tơring čar Dak Lăk thun 2026 hơmâo mơ̆ng 10% truh pơ ngŏ, anom bruă ngă hmua hăng ayuh hyiăng kiăng bong kjăp rơnoh đĭ kyar amăng ha thun mơtăm, mơ̆ng 5,86% truh pơ ngŏ. Amăng 5 blan dŏ glăi, gir pơkra rai rơbêh 66.100 klai prăk nua gơnam tam. Amăng anun, pơƀut ƀơi dua mơta gơnam mơ̆ng hmua ba sĭ pơ čar rơngiao anun lĕ kơphe hăng sâu riêng.

Ơi Đỗ Hữu Huy, Khua jơnum min mơnuih ƀôn sang tơring čar Dak Lăk kiăng anom bruă hmua hăng ayuh hyiăng mơ̆ng anai truh kơ abih thun khŏm kiăo tui rơnoh đĭ kyar ba tơbiă rim blan, rim kŭi; sem lăng na nao mrô rơnoh, lăi lui hlâo, tañ mơtăm hăng pơplih glăi hlao tơdah hơmâo tơlơi ƀu lăp. Pô ngă khua khŏm nao hlâo ngă bruă, ngă bruă tui pran jua “6 rơđah, 1 hruaih mơ̆ng anăp truh pơ tlôn”, gơgrong bruă hăng hrơi blan ngă bruă, kaih ƀudah tañ khŏm kơđiăng, wơ̆t hăng boh than ba glăi tuč rơnuč ñu./.