Dơnao pơkŏng ia Ia Mơr hơmâo abih tih prăk tuh pơ alin giăm 3.000 klai prăk, dưi pơkŏng ia giăm 180 klăk met khô̆t, hơmâo dưm dăp pơhlôm brơi ia pruih kơ giăm 12.500 ektar đang hmua hăng ia yua brơi giăm 50.000 čô ƀơi 2 boh tơring čar Gia Lai hăng Dak Lak. Să giăm guai Ia Rvê, tơring čar Dak Lak hơmâo pel ĕp giăm 1.100 ektar ƀơi hơdôm ƀut plơi pla mrô 6,7,8,9 hăng 11 kiăng rơkâo pok prong kual pruih rơwang tal 2 mơng ring bruă dơnao pơkŏng ia Ia Mơr.

Mơng pel ĕp sit nik, ơi Lương Nguyễn Minh Triết, Khua git gai Ping gah tơring čar Dak Lak lăi pơtong, tuh pơ alin man pơkra dơnao pơkŏng ia ƀơi kual giăm guai yôm phăn biă mă amăng pơđĭ kyar bơwih ƀong huă, pơhrŏ trun ƀun rin hơđong kjăp, hơđong tơlơi hơdip ană plơi pla hăng hơkrŭ wai pơgang rơnuk rơnua. Yua anun, djop gơnong bruă, sang bruă bơdjơ̆ nao kiăng gum hrŏm hăng anom bruă gơnong glông pơjing akŏ bruă tuh pơ alin man pơkra king ia brơi 1.100 ektar hơmâo pel ĕp, pơhlôm tong ten, tơpă sit, anăm ngă luk puk hăng hơdôm akŏ bruă pơkŏn. Sui pơ anăp, dưm man pơkra dơnao pơkŏng ia kiăng djơ̆ tơlơi kiăng mơng 12 boh plơi pla amăng să.