Sang bruă pơsur ngă hmua dêh čar brơi thâo, Hră pơtrun 36 mơ̆ng Kơnuk kơna pơtrun kơnôl 31/7 hơmâo ngă amuñ ƀiă laih hră pơ-ar brơi gru mrô anih pla, anih anung gơnam. Bruă brơi hră hăng wai lăng mrô pơčrâo brơi glăk hơmâo ngă amăng plang internet, kiăo tui tơlơi pơtrun mơ̆ng anom bruă kơnuk kơna, mơnuih ngă hmua čih mă anăn, gơgrong mă pô, wơ̆t hăng hơmâo sem lăng glăi tơdơi kơ ngă hră laih anun ĕp ƀuh anih pla pơjing. Tơdơi kơ giăm 2 blan ngă tui, dêh čar ta hơmâo brơi phrâo 787 gru mrô pơčrâo anih pla.

Ƀơi Gia Lai, yă Nguyễn Thị Tố Chân, Kơ-iăng khua gơnong bruă ngă hmua hăng ayuh hyiăng brơi thâo, tơring čar hơmâo brơi nao 43 gru mrô anih pla, pơđĭ tui mrô đang hmua hơmâo mrô anih pla amăng tơring čar lĕ 424: “Bruă čih pơmut djŏp hră pơ-ar, tơlơi pơhing brơi buh mơnuih ƀôn sang kiăng biă mă bruă anai. Khă hnun, aka ƀu bơkơnar ôh, anun kiăng hyu pôr pơthâo, pơtô brơi dong kiăng arăng thâo hluh bruă hơmâo sa gru mrô anih pla lĕ ta tŭ mă sa anih pơsit anŏ yom mơ̆ng gơnam ta pơkra rai. Lơ̆m mơnuih ƀôn sang thâo hluh baih, amra nao ngă hră pơ-ar pơsit phun atur, ĕp ƀuh anih pla, pơkra gơnam. Mơ̆ng anun, hơdôm anom ngă ƀong hrŏm, sang bruă mơdrô pơtruh nao rai hluai tui tơlơi pơhing hơmâo mơ̆ng mơnuih ngă hmua”.

Mah bruă ngă hră pơsit mrô anih pla amuñ ƀiă laih, samơ̆ ƀing pơ ala sang bruă mơdrô hăng anom ngă ƀong hrŏm lăi, bruă bong kjăp mrô anih pla kiăo tui rim bơyan tơjŭ pla phrâo jing bruă yom biă, kiăng răng kơđiăng. Kiăng dưi ngă tơlơi anun, pô ngă hmua pơkra gơnam khŏm čih pioh bruă tơjŭ pla, rông phun pla, wai lăng djŏp gơnam blơi blung a, čih pơmut amăng hră; anih anung gơnam khŏm ngă na nao tui tơlơi pơkă lơ̆m ngă hră mơn. Anai jing tơlơi pơhing kiăng ĕp ƀuh anih pla, wai lăng anŏ klă gơnam mơ̆ng hmua. Hơdôm sang bruă ăt rơkâo hơmâo hơdră ngă bruă hiưm pă, kiăng grup pơsur ngă hmua gum hrŏm, pơtô brơi boh thâo ia rơgơi, djru brơi mơnuih ngă hmua ngă tui hăng bong glăi hơdôm tơlơi pơkă mơ̆ng gru mrô.

Ơi Lê Quốc Thanh, Khua sang bruă pơsur ngă hmua dêh čar brơi thâo, hrơi blan pơ anăp, anom bruă pơsur ngă hmua amra pơtô brơi mơnuih ƀôn sang thâo rơđah hloh bruă ngă hmua pơkra gơnam, pơtô pơjuăt mơnuih mă bruă amăng plơi pla, pơtruh sang bruă mơdrô hăng anom ngă ƀong hrŏm wơ̆t hăng mơnuih ngă hmua; laih dong pơƀut glăi djŏp tơlơi dŏ tơnap, tơlơi gun đah mơ̆ng rơkâo pơsir hĭ: “Khul mơnuih djru ngă hmua khŏm gum hrŏm hăng neh met wa, bưp ƀơi anăp, tơña bla tong ten. Ta khŏm pơplih hơdră djru, tap năng pơplih ƀơi đang pla sâu riêng, đang kơphê, đang boh kruăi hrĕ, lơ̆m neh met wa glăk jik bruă ngă hmua, lơ̆m anun khul djru ngă hmua nao djru neh met wa ngă hlao ƀơi anăp, pơtô brơi dưm pơmut amăng plang điện tử hiưm pă, hăng hơdôm bruă neh met wa lăng tơnap kiăng djru brơi”./.