Thun 2025, mah bơbeč djơ̆ ayuh hyiăng hlim hơjan ƀu gêh găl đơi ôh laih anun pơblih bruă ngă hmua pla pơjing, pơblih sang bruă git gai wai lăng mơ̆ng kơnuk kơna, ngă tui gong gai tơring čar dua gưl, bruă ngă hmua pla pơjing amăng kual ăt hơđong, pơđĭ kyar mơ̆n.

9 blan thun 2025, prăk sĭ mơdrô kơphê pơ dêh čar tač rơngiao pơhrui glăi 7 klai USD, sĭ añăm pơtam hơbơi pơtơi, boh čroh rơbêh 6 klai USD, asar boh ñông, boh kuel sĭ pơhrui glăi rơbêh 3 klai USD. Mơ̆ng bruă mă rim hrơi ƀuh rơđah, mơnuih apăn bruă ngă hmua ƀơi să, lu tơring čar rơkâo Ding jum Bruă hmua hăng Ayuh hyiăng ăt djru kơ bruă pơtô hrăm, kah pơpha tơlơi thâo amăng bruă ngă hmua; tañ ngă giong hră pơtô ngă tui hơdră pơsir hră pơar pơpha tơlơi dưi mă bruă tơdơi kơ pơmut glăi sang bruă kơnuk kơna. Ơi Hoàng Trung, Kơ-iăng khua ding jum bruă hmua hăng ayuh hyiăng čih pioh tơlơi pơgôp hiăp ƀơi mông jơnum, laih anun lăi lĕ hơdôm tơlơi hơmâo lăi pơthâo ƀơi mông jơnum jing sa tơlơi kiăng ječ ameč biă pioh pơhlom ba bruă mă anŏ gêh găl prong ngă hmua ƀơi kual Dap Kơdư hăng Dơnung Tong krah dêh čar kiăng ba glăi boh tơhnal tŭ yua hloh.