Anăp nao čơkă mơak hơdor glăi 94 thun akŏ pơjing khul đah kơmơi Việt Nam hăng Hrơi pioh kơ đah kơmơi Việt Nam lơ 20/10, tom brơi, lơ 8/10, ƀơi plơi prong Kon Tum, Khul đah kơmơi mut phung tơring čar Kon Tum pơphun jơnum Hrơi đah kơmơi pơphun bruă mă hăng pơƀut bruă mă pơplông ƀing đah kơmơi pơphun mă bruă thun 2024 hăng akŏ ñu “Đah kơmơi Kon Tum pơđĭ tui kông ngăn amăng plơi pla hăng pơblih yua hơdră mơtah mơda”.Ngă hrŏm tal pơplông hơmâo 48 mơta tơlơi pơčeh phrâo, ba pơdah thâo, amăng anun 28 mơta tơlơi pơčeh phrâo pơphun bruă mă gưl tơring čar, 20 mơta tơlơi pơčeh phrâo gưl dêh čar.

Hăng akŏ bruă pơkra ming, pơjing rai gơnam sĭ mơdrô kah hăng boh čroh, añăm pơtam, hơbơi pơtơi hăng ia jrao akha kyâo rơnoh yôm ƀơi Kon Tum, kơčăo bruă mơ̆ng amai Nguyễn Thị Minh Ngọc, Khul đah kơmơi mut phung să Đak Hring, tơring glông Đak Hà hơmâo mă pri yôm mrô sa. Khul čom puang tal pơplông hơmâo jao 1 pri yôm mrô dua; 2 pri mrô klâo hăng 6 pri pơsur pran jua kơ hơdôm kơčăo bruă pơčeh phrâo pơphun bruă mă hơmâo anŏ gêh găl či ba yua sit nik. Kiăng dưi ngă tui sit nik hơdôm tơlơi pơmin pơčeh phrâo anun, kơčăo bruă pơphun bruă mă mơ̆ng ƀing adơi amai đah kơmơi mut phung, Khul đah kơmơi mut phung tơring čar Kon Tum hơmâo lăi pơthâo hăng Sang bruă prăk djru mơnuih mơnam kiăng djru brơi kơ pô 28 mơta tơlơi pơmin phrâo pơčeh bruă mă, kiăng dưi hơmâo prăk čan hăng rơnoh kơmlai prăk rơgêh hăng abih tih rơnoh prăk kiăng čan lĕ 7 klai.