Ƀơi Dak Lăk - anih ngă kơphê prong hloh mơ̆ng tơring čar, lu anom mơdrô glăk pơplih glăi djŏp bruă ba glăi anŏ yom, tuh pơ alin klă mơ̆ng đang hmua, pơkra gơnam truh kơ ba sĭ pơ čar rơngiao. Ơi Lê Đình Tư, Khua kông ti TNHH Sa ding kơna Aeroco brơi thâo, anom mơdrô ƀrô sem lăng - đĭ kyar gơnam, ƀrô ngă pơhưč tour hyu čuă ngui pơ jar kmar rah, či sem lăng bruă pơkra gơnam. Gơnam mơ̆ng đang hmua hơmâo ruah sĭ pơ anih mơdrô điện tử ƀơi anih yơyom hăng ƀơi hơdôm boh tơdron rơdêh por jar kmar mơ̆ng Việt Nam, pơhrui prăk hơmâo biă. Ơi Lê Đình Tư čang rơmang:“Ƀing ta hơmâo lu biă tơlơi gêh găl či đĭ kyar kơphê Robusta  mơ̆ng Dak Lăk lăi hơjăn hăng Việt Nam lăi hrŏm. Amăng hơdôm thun rơgao, Aeroco hơmâo laih pri jar kmar, pơhrui glăi boh tŭ yua lăp hơdor biă mă. Thun anai, khŏm gir hloh dong, brơi ƀing gơyut amăng dêh čar wơ̆t hăng čar rơngiao hmư̆ ư hloh hăng ngă marketing klă hloh dong”.

Hrom pran jua đăo kơnang kơ thun phrâo, lu anom mơdrô yua hlăk ai ngă pô ăt glăk pioh glăi tơlơi lăp hơdor prong mơn ƀơi hră lơkak mơdrô kơphê jơman jar kmar. Yă Dương Nữ Thiên An, Khua kông ti TNHH sĭ mơdrô bơwih bơwang ba sĭ pơ čar rơngiao Si Cafe lăi, thun 2026 jing thun pơphun brơi gêh găl biă yơh lơ̆m mơ̆ng akŏ thun mơtăm, anih mơdrô pơ Japan tŭ ư blơi 100% kơphê Robusta asar hna yua kông ti pơkra, congtenơ blung a hơmâo ba sĭ amăng akŏ blan 1/2026 laih anun prăp či ba nao congtenơ tal dua dong yơh:“Amăng thun anai, gơmơi pơƀut abih bang tơlơi hơmâo kơ anih mơdrô Japan, mơ̆ng ruah gơnam, đĭ kyar gơnam truh kơ pơkra hruh, kơdung, jĕp amăng hruh kiăng hiam mơn, đah mơ̆ng hơđong hăng pok prong tui anih mơdrô hơđong”.

Ƀu kơnong pơƀut amăng bruă sĭ mơdrô ôh, anom bruă bơwih ƀong gah kơphê jơman hmư̆ hing ăt pơtruh, hyu ĕp, ba jơlan hăng akŏ pơjing anih sĭ mơdrô gơnam anai. Ơi Hòang Sanh Hữu, pô akŏ pơjing anăn kơphê Miss Êđê - anom mơdrô ba sĭ kơphê pơ čar Mi, Hàn Quốc, Singaparo hăng Nga - lăi lĕ, bruă hơduah ĕp thâo hluh anih sĭ mơdrô yom hăng tơlơi kiăng mơ̆ng ƀing kơhnâo jar kmar jing boh pơkhuă yom biă kiăng kơphê jơman mơ̆ng Việt Nam dưi nao pơ ataih hloh. Amăng thun 2026, anom mơdrô amra ngă bruă pơtom hiăp sĭ mơdrô či djru ba hơdôm kual ngă kơphê jơman dưi ba sĭ gơnam pơ anih mơdrô yơyôm mơ̆ng Hàn Quốc:“Lơ̆m thâo hluh anih sĭ mơdrô arăng kiăng anŏ hơget, gơmơi amra pơthâo glăi hơdôm tơlơi kiăng, tơlơi pơkă anun kiăng sang măi pơkra kơphê, khul hăng anom mơdrô amăng dêh čar thâo, kiăng ĕp sa jơlan pơtruh hrŏm, sa anih anom djru ba hơdôm kual ngă hmua huăi nao hơjăn, laih anun huăi hơmâo ôh bruă lông ngă lăng đôč mơ̆ ƀu dưi ba sĭ”.

Gum djru prong amăng bruă pơtŏng sit anŏ yom kơphê Robusta jơman, jing tơlơi ba jơlan mơ̆ng anom mơdrô ba sĭ gơnam pơ čar rơngiao. Ƀơi Dak Lăk, Kông ti TNHH sa ding kơna Sĭ gơnam pơ čar rơngiao 2-9 Dak Lăk (Simexco Dak Lăk), nao hlâo akŏ pơjing anih pơkra gơnam ba sĭ djơ̆ hrŏm mơ̆ng akŏ truh pơ tlôn, wai lăng anŏ klă, ĕp ƀuh anih pơkra, pơtruh hăng gum hrŏm sui tom bruă pơkra kơphê jơman hmư̆ ư. Ơi Nguyễn Tiến Dũng, Kơ-iăng khua Kông ti Simexco Dak Lăk brơi thâo, anom mơdrô hơmâo gum djru laih kơ hơdôm ƀut ngă ƀong hrŏm, sang anŏ ngă hmua hăng pơgang ba anih mơdrô djơ̆ hơnong pơkă jar kmar, čang rơmang djru pơjing anŏ klă jing nua yom sĭ mơdrô sit nik.

“Gơmơi glăk pơtruh hăng 50.000 boh sang anŏ kual Dap Kơdư či pơkra kơphê hơđong. Yua dah kiăng dưi pơkra kơphê jơman hăng klă hloh ta khŏm hơmâo anih, hơmâo măi, hmutu kah hăng măi ƀhu hna anai, măi mok kiăng pơkra rai kơphê jơman ăt kah hăng pơkra kơphê yom, pơđĭ tui anŏ yom mơ̆ng asar kơphê amra ngă pơplih tơlơi bơwih ƀong kơ mơnuih ngă hmua hloh dong”.

Hăng tơlơi čang rơmang kơtang kơ anŏ klă kơphê Dak Lăk lăi hơjăn, Việt Nam lăi hrŏm, thun 2026, čang rơmang amra jing ha thun pơplih kơtang mơ̆ng kơphê Robusta jơman, ƀu kơnong pok prong anih ba sĭ đôč ôh, ăt kjăp tơkai pơđĭ tui anŏ yom, kơdrưh mơ̆ng kơphê Việt Nam ƀơi rŏng lŏn tơnah, amăng tơlơi pơmin khin ngă, prăp mă pô hăng bă kơ tơlơi čang rơmang kơtưn đĭ amăng rơwang bruă phrâo.