Ƀơi hơdôm kual ngă đang hmua akŏ phun mơng Dak Lak, tơlơi pơplông hơmâo tơlơi dưi čơkă Jơnum Ping gah tal XIV hơmâo pơdah tong ten hluai tui hơdôm bơyan pơhrui, rĭm hơbô̆ bruă bơwih ƀong tŭ yua. Ayong Lyby Niê Siêng, mơnuih ngă hmua să Krông Buk brơi thâo, neh met wa hur har biă mă ƀơi anăp hơdôm tơlơi dưi ngă hăng lêng kơ anăp nao Jơnum hăng pran jua glăm ba prong hloh.

“Hur har pran jua čơkă, pơplông hăng hơdôm hơnong pơkă ngă hiưm pă kiăng neh met wa amăng hơdôm khul ngă hmua ƀơi Dak Lak lêng kơ pơđĭ kyar klă hloh kiăng pơgôp pơjing lŏn ia jai hrơi hiam klă ƀiă dong”.

Hăng pran pơplông čơkă Jơnum tal XIV mơng Ping gah ăt lar hyu kơtang hloh amăng hơdôm anom bơwih ƀong sĭ mơdrô, sit biă ñu amăng bruă sĭ mơdrô gơnam đang hmua pơ tač rơngiao-akŏ phun brơi bơwih ƀong huă amăng tơring čar. Ƀơi kông ti TNHH sa ding kơna sĭ mơdrô pơ tač rơngiao lơ 2/9 Dak Lak (Simexco Dak Lak), bruă jao bơwih ƀong huă, sĭ mơdrô hơmâo pơlir hăng hơdôm hơnong pơkă pơplông tong ten. Ơi Nguyễn Tiến Dũng, kơ-iăng Khua kông ti brơi thâo:

“Čơkă Jơnum ruah khua mua Ping gah, blan anai ƀing gơmơi ba tơbiă hơnong pơkă lĕ amra blơi pơhrui 25.000 tơ̆n hăng sĭ mơdrô pơ tač rơngiao 20.000 tơ̆n hăng abih bang pơtum pơƀut ngăn rơnoh mơng mơnuih Ping gah truh ƀong apăn bruă, kông ñơn, mơnuih mă bruă kiăng ngă bruă tong ten ba glăi tơlơi dưi kah hăng ba glăi boh than bơwih ƀong sĭ mơdro klă ƀiă”.

Hrŏm hăng anom bơwih ƀong sĭ mơdrô kơnuk kơna, kual bơwih ƀong sĭ mơdrô mơnuih ƀôn sang ngă pô ăt pơdah pran gum hrŏm hăng čang rơmang nao jơlan gah pơprong mơng Ping gah. Yă Dương Nữ Thiên An, Khua kông ti TNHH sĭ mơdrô bơwih bơwang sĭ mơdrô pơ tač rơngiao Si Café brơi thâo:

“Amăng jơnum tal XIV, đing nao lu bruă pơtrut gơnong bruă ngă hmua. Yua anun hơdôm anom bruă bơwih ƀong sĭ mơdrô amăng bruă ngă hmua kar hăng ƀing gơmơi anai tŭ ư ngă tui. Amăng bơwih ƀong, amăng sĭ mơdrô, wŏt hăng bruă ba gơnam tam lăi pơthâo pơ tač rơngiao ƀing gơmơi ăt hluh rơđah tơlơi gum djru prong biă mă mơng hơdôm hơdră bruă. Pơ anăp anai čang rơmang amra hơmâo tơlơi djru ba lu ƀiă dong mơng hơdôm hơdră bruă phrâo mơng Kơnuk kơna”.

Mơng tơlơi sit nik ƀơi ƀon lan, hơdôm tơlơi pơplih prong amăng pơđĭ kyar bơwih ƀong huă-mơnuih mơnam ƀơi ƀon lan lĕ pơdah rơđah brơi boh tŭ yua mơng jơlan gah, tơlơi črâo trun mơng Ping gah amăng hrơi blan rơgao. Pơhmutu lĕ ƀơi să Ea Knuêč, tơring čar Dak Lak. Thun 2025, să ngă pơgiong hăng rơgao hơnong pơkă pơđĭ kyar bơwih ƀong huă-mơnuih mơnam, rơnoh pơđĭ kyar giăm 10%, pơhrui rĭm akŏ mơnuih ƀu pơdơi hrưn đĭ. Anai lĕ ƀon lan arăng lăng lĕ “kual phun pla sầu riêng” mơng tơring čar Dak Lak, Ea knuêč hơmâo pơjing kual ngă hmua pok prong, pơlir hăng tuai čuă ngui pơ đang hmua hăng pơhrui mơng gơnam hluai tui bruă sĭ mơdrô amăng internet, pok prong sĭ mơdrô pơ tač rơngiao. Yă Nguyễn Thị Cẩm Loan, kơ-iăng Khua Jơnum min djop djuai ania mơnuih mơnam Việt Nam să Ea Knuêč čang rơmang:

“Kiăng pơpŭ bơni biă mă kơ Ping gah, kơnuk kơna hơmâo hơdôm hơdră bruă hăng jơlan gah kiăng mơnuih ngă hmua ƀing gơmơi mơng pơhrui hơmâo hmăi jing ƀing mơnuih pơdrong sah…sit biă ñu hrưn đĭ tơlơi hơdip gah bơngăt jua, gơnam tam brơi mơnuih ngă hmua, pơplih tơlơi hơdip, bruă djru mơnuih mơnam, hrưn đĭ bruă ia jrao, pơtô pơjuăt hăng hơmâo tơlơi mut hrŏm.”

Hăng pran hur har pơplông dik dak, tơlơi mut hrŏm mơng mơnuih ngă hmua, anom bơwih ƀong sĭ mơdrô hăng anih anom kơđi čar, Dak Lak glăk anăp nao Jơnum tal XIV mơng Ping gah hăng hơdôm tơlơi dưi sit nik, đăo gơnang nao hơdôm hơdră bruă phrâo amra tŏ tui pơtrut brơi bruă ngă hmua, mơnuih ngă hmua hăng ƀon lan pơđĭ kyar hơđong kjăp./.