Mơ̆ng mơguah sing bring hrơi tơdơi kơ kơthel abih, sang gưl 4 mơng rơkơi bơnai bơn amai Nguyễn Thị Xuân phrâo pơdong đôč ƀơi plơi Hòa Mỹ, să Xuân Cảnh, pong glăi tôl phrâo abih 35 klăk prăk, prăk pơkom pioh mơ̆ng abih sa thun laih rơgao ră anai pok pơđuăi abih tôl bơbung sang. Ƀu hmao hning rơngôt ôh, dua rơkơi bơnai hlong dik dăk kih rơmet djah djâo, bư̆ bôr, pơdong glăi pơnang sang dŏ glăi tơ̆i tel, kiăng hơmâo anih kơđăp jăng jai adai pơ-iă hăng hơjan. Hmư̆ tơlơi pơhing arăng iâu nao pran jua mơak pơđao biă mă yơh, kơnuk kơna djru ba 10 klăk prăk yua ƀơi să gum pơčruh kiăng  pong glăi tôl bơbung sang angin rơbŭ phrâo tơpŏk đuăi.

“Ră anai bruă blung hlâo hloh lĕ khom nao blơi ƀrik, ngă bơbung hăng ƀrik ƀơ̆i. Dua anih sang gah ngŏ anun hơmâo anih dŏ ƀơ̆i, dŏ glăi pơmin mă tơdơi, hơmâo prăk lĕ ngă tui dơ̆ng, tơdah ƀu hơmâo lui hnun baih lah”.

Ƀu kơnong sang mơnuih ƀôn sang đôč ôh, jơlan glông nao rai, sang bruă kơnuk kơna ăt beč djơ̆ mơ̆n, 81 ƀĕ gong apui lơtrik bơrơbuh hĭ, giăm 400.000 sang anŏ thăm apui lơtrik. Anom bruă apui lơtrik khom nao pok pơhai mă bruă hmar, brơi nao 900 čô mơnuih trun nao mă bruă, rơbêh 50 boh rơdêh đĭ, kah pơpha mông mă bruă amăng hrơi mlam. Klâo hrơi tơdơi kơ anun, hơmâo glăi apui lơtrik amăng abih bang kual gah ngŏ tơring čar. Ơi Trần Văn Thuận-Khua kông ty apui lơtrik Dak Lak brơi thâo:

“Bruă ƀing gơmơi či pơdah thâo lĕ amăng 3 hrơi khom dưi pơkĕ glăi apui lơtrik yua, brơi kơ abih bang sang anŏ mơnuih ƀôn sang thăm apui ƀơi kual gah ngŏ”.

Ƀơi lu sang hră, rơbêh 70 boh anih hrăm, 26 boh sang hră pok bơbung, pơčah mơnil amăng phă. Yă Nguyễn Hồng Huệ, Khua sang hră gưl muai Xuân Quang 1, sa amăng hơdôm sang hră răm ƀăm kơtang ƀơi să Phú Mỡ brơi thâo, ƀu tơguan hơmâo tơlơi git gai ôh, ƀing nai pơtô, amĭ ama čơđai sang hră hrŏm hăng ƀing tơhan-kông an ƀơi să tañ nao pơdjru hrŏm rŭ pơdong glăi anŏ răm ƀăm kơthel ngă.

“Iâu pơtum lu khul mơnuih mă bruă ƀing tơhan blah ngă, tơhan kông an djru ba pơdong glăi sang hră, djop jơlan hơdră gum hrŏm kiăng ngă giong, pơrơgoh anih dŏ jum dar amăng sang hră kiăng kơ ană amôn čơđai gưl muai hơmâo anih hrăm hră hơđong”.

Mlam kơthel pưh kơtang ngă răm ƀăm lu, truh mơguah hrơi tơdơi, ƀing tơhan nao djru bruă pơ anăp ƀơi plơi pla amăng tơring čar Dak Lak hơmâo ƀuh ƀô̆ mơta amăng djop plơi pla, anih hơmâo tơlơi truh răm ƀăm kơtang. Ƀing tơhan pơlih pơhlom apui ƀong sang hăng djru pơklaih mơnuih mông ječ ameč brơi nao song nan măi, hrĕ akă yôl, rơdêh đĭ pơdŭ pơgiăng mơnuih ƀôn sang hăng djru pơdong glăi sang dŏ. Thượng tá, ơi Phạm Ngọc Vinh, Kơ-iăng tơhan pơlih pơhlom pơgang apui ƀong sang hăng pơklaih mơnuih ječ ameč mơ̆ng sang bruă kông an tơring čar Dak Lak kah pơpha:

“Tơdơi kơ kơthel pưh nao laih, tơhan pơlih pơčruih apui ƀong sang hăng pơklaih mơnuih ječ ameč truh hơdai gum hrŏm lu sang bruă pơkŏn brơi nao tơhan wơ̆t rơdêh đĭ, gơnam yua mă bruă djru mơnuih ƀôn sang. Bruă yom hlâo hloh, pơtum ming pơkra glăi jơlan kơđông hĭ, ngă gun ƀu dưi nao rai, rơnăk djop sang hră, djru ba ƀing mơnuih tha rơma hyiăl amăl, sang anŏ hơmâo anăn kơnuk kơna djru, pơdong glăi sang dlưh, pok bơbung kiăng mơnuih ƀôn sang dưi rŭ glăi anŏ răm ƀăm tơdơi kơthel pưh nao”.

Tui hăng tơlơi jŭ yap hnang blung, anŏ răm ƀăm đơ đam tơring čar truh 2 rơbâo klai prăk. Tơring čar kleč mă rơbêh 80 klai, pioh djru ba sang anŏ hơmâo mơnuih djai, mơnuih ruă, sang dlưh, pok bơbung; laih dơ̆ng iâu pơtum ƀing tơhan blah ngă, tơhan kông an nao djru rĭm plơi pla pong glăi bơbung sang tơpŏk, pơdong glăi sang hăng pơrơgoh ia yua, rơnăk sang ia jrao, sang hră, pơhlom klin. Khua Jơnum min mơnuih ƀôn sang tơring čar Dak Lak, ơi Tạ Anh Tuấn lăi pơtong:

“Anai lĕ kah hăng tơlơi sem lăng hăng gong gai kơnuk kơna dua gưl amăng bruă pơhlom pơgang tơlơi truh lŏn adai ngă. Ƀing gơmơi ƀuh lĕ gong gai dua gưl djơ̆ amăng mông ječ ameč biă mă hai ăt hơmâo mơ̆n nao djru, pơsir brơi tañ tơlơi truh tŭ yua hloh. Ră anai, pơtum pơsir hĭ tơlơi răm ƀăm jơlan glông, gong apui lơtrik, sang ia jrao kiăng huăi hơmâo klin hơđuh rai, laih dơ̆ng djru ba lu sang anŏ dlưh hĭ, pok bơbug kiăng tañ hơđong tơlơi hơdip mơda”.

Amăng mông nao ĕp lăng sit nik, Kơ-iăng khua dêh čar, ơi Mai Văn Chính čih pioh tơlơi gum hrŏm sa pran jua, ngă bruă hmar mơ̆ng Dak Lak, biă mă ñu bruă pơđuăi mơ̆ng mơnuih ƀôn sang mơ̆ng anih hŭi rơhyưt, prăp lui tong ten pơgang anih hŭi rơyưt, tơhan kông an, ling tơhan blah ngă, ƀing ngă bruă apui lơtrik nao truh pơ anih hơmâo tơlơi truh laih kơthel pưh nao.

“Pơ ala kơ kơnuk kơna dêh čar, Khua dêh čar kâo bơni kơ tơring čar Dak Lak, hơmâo prăp lui klă, hur har biă mă amăng bruă pơhlom hlâo kơthel 13. Kâo ƀuh anom bruă apui lơtrik, kông an, ling tơhan blah ngă nao tơl anih hơmâo tơlơi truh djru mơnuih ƀôn sang pơsir tañ tơlơi răm ƀăm ngă, hrup hăng kyâo joh, sang dlưh laih anun sang hră răm, ƀing gih hơmâo ngă klă pơsir tañ biă mă. Kâo rơkâo jŭ yap glăi abih, djop djơ̆ rơnoh răm rai kiăng lăi pơthâo hơmâo hơdră djru ba prăk kăk pơsir tơlơi răm ƀăm”.

Kơthel 13 kơtang biă mă, phă pơrai prong, sa tơlơi lông lăng  ƀu anet ôh, tui tơlơi ĕp lăng hăng thâo krăn tân anun yơh abih glông bruă kơđi čar hăng mơnuih ƀôn sang tơring čar Dak Lak thâo prăp lui hlâo pơgang. Mơ̆ng tơlơi lông lăng anun, tơlơi thâo, bruă mă beč bal mơ̆ng gong gai kơnuk kơna dua gưl ƀuh rơđah, anun lĕ tơlơi lăi lui hlâo djơ̆; pơphun bruă mă, prăp lui hlâo, bong ƀơi anăp hmar, giăm mơnuih ƀôn sang hloh. Anai lĕ sa tơlơi lăp đing nao kiăng pơtrut tui, kiăo tui ngă djơ̆ đah mơ̆ng dưi găn rơgao tơlơi lông lăng amăng jơlan man pơdong đĭ sa glông bruă kơđi čar, gong gai kơnuk kơna lir hơbit, mă bruă tŭ yua hloh.