Dơnao Ia Lâm, să Gào lĕ sa amăng hơdôm dơnao ia pơkŏng ia pioh pruih brơi phun pla mơng mơnih ƀôn sang, truh ră anai dơnao ia khŏt abih laih. Kiăng kơ hơmâo ia pruih brơi phun pla glăk krô kreñ amăng hơdôm hrơi pơ-iă hang, lu sang anŏ khŏm iâu măi kuăi, măi klơi tong krah dơnao kiăng ĕp atur ia dŏ glăi. Samơ̆, ia dŏ glăi anai hơdôm hrơi ăt amra khŏt hĭ. Ayong Nguyễn Phát, dŏ amăng plơi O Grang, să Gào, lăi pơthâo kơ bruă anai:

“Ră anai dŏ tơguăn ia ƀlĕ rai hơdôm ƀơ̆i, ăt gir pruih hĭ 5,7 phun, ăt dŏ bơrơsua ia mơn, mơ̆ hơmâo hơdôm ƀơ̆i pruih hơdôm anun. Ia yua amăng thun ăt khŏt tañ biă mă”.

Ƀu djơ̆ kơnong ƀơi dơnao Ia Lâm, 5 boh dơnao ia ƀơi să Gào lêng kơ thu khŏt mơtăm. Ơi Bùi Văn Thỏa hrŏm hăng lu sang anŏ glăk ƀô̆p ia mơng dơnai Ku Tông brơi thâo, neh met wa glăk ƀô̆p abih ia dŏ glăi. Tui ơi Thỏa, tơdah pơ-iă hang dŏ tŏ tui dong, kơnong hơdôm hrơi, dơnao ia amăng khŏt abih:

“Neh met wa glăk bơngô̆t biă mă, ƀu hơmâo ia pruih, bruă ngă hmua bưp tơnap. Sa, dua boh sang anŏ khuer ia bơmun mơ̆ ăt ƀu hơmâo ia lơi”.

Bruă kơƀah ia pruih brơi phun pla ƀơi Gia Lai glăk ƀuh lu anih, sit biă ñu ƀơi kual gah yŭ tơring čar. Ơi Rmah Hêng, kơ-iăng khua jơnum min mơnuih ƀôn sang să Ia Tôr brơi thâo, blung hlâo ƀon lan đing nao pơtô pơblang, pơtrut pơsur mơnuih ƀôn sang ngă tui hơdră pruih ia pơkrem kiăng tŏ tui bruă ngă hmua:

“Pơ-iă hang tui anai amra ngă kơƀah ia pruih, yua ia pioh pruih ră anai lĕ mơng ia bơmun hăng čroh ia, ƀu hơmâo dơnao pơkŏng ia. Ƀing gơmmơi tŏ tui pơtô pơblang, pơsur mơnuih ƀôn sang pruih ia pơkrem, pơhlôm ia pruih brơi phun pla”.

Tui sit nik brơi ƀuh, bruă kơƀah ia pruih brơi phun pla ƀơi Gia Lai lêng kơ ƀuh amăng bơyan không phang rĭm thun, sit biă ñu hăng kual gah yŭ tơring čar. Amăng hơdôm hrơi phrâo mut hrŏm, khua mua Ping gah tơring čar Gia Lai hơmâo rơkâo pok akŏ bruă pơplih bư̆ dơnao pơkŏng ia hăng abih tih prăk tuh pơ alin truh 17 rơbâo klai prăk, amăng rơwang thun 2025-2030. Bơ blung hlâo, hơdôm boh să kiăng tŏ tui mă yua hơdôm dơnao glăk hơmâo. Ơi Nguyễn Văn Phương, anom bruă bơwih ƀong să Gào brơi thâo:

“Să ăt rơkâo tơring čar djru brơi prăk kak kiăng pơkra ming hơdôm dơnao pơkŏng ia amăng să. Yua anun, ƀing gơmơi amra kuăi rơmet king ia, dơnao ia kiăng pơhlôm brơi djop ia pruih brơi phun pla amăng kual. Kơ bruă sui pơ anăp kiăng ĕp lăng hơdôm čroh ia kiăng man pơkra hơdôm dơnao pơkŏng đơđet, kiăng pơhlôm brơi ia amăng atur lŏn kah hăng pơjing hơdôm kual pruih anet phara amăng să”./.