Kơphê lĕ phun pla pơhrui glăi lu hloh amăng pơplih ngă hmua ƀơi tơring čar Dak Nông. Ră anai tơring čar hơmâo rơbêh 142.000 ektar kơphê, pơhrui glăi 360.000 tơ̆n, dong tal 3 đơ đam dêh čar. Hơdôm thun rơgao, lu anom bơwih ƀong sĭ mơdrô, anom bơwih ƀong hrŏm, grup ngă hrŏm hăng mơnuih ngă hmua ƀơi Dak Nông hơmâo đing nao tuh pơ alin, mă yua boh thâo phrâo amăng pla pơjing, yua anun kơphê pla glăk ƀơƀrư̆ hiam hơdjă.

Tơring čar hơmâo rơbêh 23.000 ektar kơphê pla tui hơdôm hơnong pơkă mơng dêh čar hăng jar kmar, hăng lu hơbô̆ bruă pla kơphê hơđong kjăp tui hơdră pơlir rơnoh yôm. Sit biă ñu lĕ 2 thun giăm anai, Dak Nông hơmâo akŏ pơjing 54 grup pơsur ngă hmua ƀon lan, pok pơhai črâo ba, gum djru mơnuih ƀôn sang, anom bơwih ƀong hrŏm ngă tui hơdră pla pơjing pơhlôm tui hơnong pơkă hiam hơdjă hloh.