Bruă mă dưi pơphun tơdơi kơ Hră pơtrun mrô 36 mơ̆ng Kơnuk kơna dưi ngă tui dơ̆ng mơ̆ng kơnôl 1/8, hăng lu tơlơi pơkă hơmâo čih pơkra glăi ngă amuñ hloh hơdră ngă hră pơar, ƀiă hrơi mông pơkă pioh pơsir hră pơar hăng pơpha gưl mơnuih mă bruă djru ba gru mrô kơnăl anih ngă hmua pla pơjing, jao kơ gưl khua Jơnum min mơnuih ƀôn sang să pô kĭ.

Ƀơi mông jơnum, lu khua mua pơtô brơi sang bruă mơdrô, sang bruă ngă hrŏm hăng mơnuih pơkra gơnam sĭ mơdrô hơdră čih anăn rơkâo, wai lăng gru mrô kơnăl pơčrâo anih pla, anih dưm amăng kơdung; lăi pơthâo hră pơar, lăi pơthâo phun tơdŭ anih pla pơjing boh troh đang hmua, bruă ngă hmua hăng anih sang bruă sĭ mơdrô pơkra ming laih anun dưm amăng hruh čih anăn gơnam sĭ mơdrô pơčrâo rơđah anih, plơi pla, hrơi blan dưm amăng kơdung hruh kiăng ba nao sĭ mơdrô pơ tač rơngiao thâo tong ten. Ƀơi hơdôm anih, sang bruă wai lăng amăng plơi pla, khul grup pơsur ngă hmua ƀơi să hăng grup pơsur ngă hmua amăng plơi pla pơtô brơi čih anăn, rơkâo pơsit anăn gru mrô, kiăng mơnuih ƀôn sang thâo mut ĕp amăng plăng tơlơi pơhing dêh čar, ngă giong hră pơar hơduah ĕp phun akha hăng ngă tui djơ̆ hơdră pơkra ming gơnam sĭ mơdrô  hơđong hơdjă rơgoh.