Ngă tui Jơlan hơdră tơhnal pơkă mơ̆ng dêh čar pơđĭ kyar bơwih ƀong huă-mơnuih mơnam kual mơnuih djuai ƀiă hăng čư̆ siăng, hơdôm thun laih rơgao, să Ba Vinh, tơring čar Quảng Ngãi đing nao hlâo mă prăk kăk tuh pơ alin man pơdong sang bruă, čuk pơkra jơlan glông nao rai amăng kual plơi pla, pơdong sang gru grua plơi, lu ring bruă bơwih brơi tơlơi či kiăng amăng plơi pla hăng wai lăng tơlơi suaih pral kơ mơnuih ƀôn sang. Hrŏm hăng prăk kăk kơnuk kơna djru, tuh pơ alin, lu jơlan hơdră čan prăk hơmâo sang bruă kơnuk kơna gơgrong brơi anăn, čan djru kơmlai, kah hăng pran kơtang, anih ưh kơnang mơ̆ng lu sang anŏ khin tuh pơ alin pơđĭ kyar bruă ngă hmua pla pơjing. Ƀuh rơđah kah hăng sang anŏ ơi Phạm Văn Rôm. Mơ̆ng rơnoh prăk čan djru kơmlai, ơi Phạm Văn Rôm tuh pơ alin pla 4 hektar đang kyâo mi, rông bui, mơnŭ, yua kơ anun sang anŏ gơñu bơwih ƀong huă đĭ đăi gŏ amŏ, ƀơƀrư̆ hơđong tui:

 “Hơmâo tơlơi djru mơ̆ng kơnuk kơna, Sang bruă prăk djru mơnuih mơnam tơnap hơmâo ngă gêh găl brơi mơnuih ƀôn sang čan prăk bwih ƀong huă, sit mơ̆n ră anai hơmâo atur tơlơi pơđĭ kyar sang anŏ, ƀơƀrư̆ lơ̆m lui tơlơi ƀun rin ư̆ rơpa”.

Mơ̆ng thun 2026-2035, să Ba Vinh hơmâo pơtong laih bruă kiăng pơđĭ kơtang pran jua, anŏ gêh găl amăng să pô, djă pioh hăng pơđĭ tui bruă mă gru grua đưm, anăp ngă kiăng pơsir tơlơi  ƀong huă kơ mơnuih ƀôn sang. Yă Trần Thị Thanh Thúy, Kơ-iăng khua Jơnum min mơnuih ƀôn sang să Ba Vinh brơi thâo:

 “Jơlan hơdră mơ̆ng dêh čar djru pơdjơ̆ nao prăk čan bơwih ƀong huă, akŏ pơjing bruă mă, blung hlâo să pơtum brơi yua djru hrŏm pơsir hăng pơtrut ngă tui hơbô̆ bruă hơđong brơi kơ ană plơi pla, hơmâo ngă laih mơ̆ng anai pơ klôn. Bơmhutu pok anih mơñam mrai, rơngaih mrai đưm, anai lĕ bruă ngă djru ba kiăng pơlar prong tui hăng pơjing khul gơnam sĭ mơdrô yua mơnuih ƀôn sang pô pơkra ming rai. Samơ̆ rơnoh prăk djru kơ bruă anai lĕ kơnuk kơna brơi ƀu lu ôh anun să čang rơmang pơtlep hrŏm abih bang lu jơlan hơdră tơhnal pơkă tuh pơ alin kiăng pơsir bruă mă, pơkra ming gơnam yua ană plơi pla pô pơkra hăng sĭ mơdrô”.

5 thun laih rơgao, mơ̆ng prăk jơlan hơdră dêh čar djru, tơring čar Quảng Ngãi pok pơhai 26 kơčăo bruă djru pơđĭ kyar bruă pơkra ming hăng 399 kơčăo bruă pơđĭ kyar amăng kual plơi pla, djru mơnuih ƀôn sang pơkra ming, plai ƀiă kơnang nao kơ tơlơi djru soh sel. Kơnong amăng thun 2026, Quảng Ngãi hơmâo rơbêh 1000 klai prăk mơ̆ng Jơlan hơdră dêh čar djru bơwih ƀong huă-mơnuih mơnam kual mơnuih djuai ƀiă hăng čư̆ siămg thun 2025 mă glăi ba yua. Anun lĕ, pơđĭ kyar kual pla  gơnam či ming pơkra djơ̆ găl pioh pơtrut tui anŏ gêh găl brơi kơ rim tơring.

Anun jing pơđĭ kyar kual pla phun pla pioh pơjing gơnam pơkra gơnam sĭ mơdrô ƀơi să Ba Vì, pok pơhư prong hơdră pla boh mơnang, rông hlô mơnong ƀơi Ba Xa hăng pơđĭ kyar anih pla phun jrao akha kyâo ƀơi Măng Ri. Ơi Xiêng Thanh Phúc, Khua Gơnong bruă Djuai ania hăng Tơlơi đăo tơring čar Quảng Ngãi, brơi thâo:

“Jơlan hơdră dêh čar djru mơ̆ng črăn thun 2026-2030, bruă pok pơhai ngă tui hơdôm jơlan hơdră dêh čar djru pơđĭ kyar amăng kual mơnuih djuai ƀiă amra pok pơhai tong ten djơ̆ găl tơlơi pơhing sit nik. Amra pok pơhai lu hơbô̆ bruă ƀing ba gru mơ̆ng mơnuih djuai ƀiă amăng tơring čar tŭ yua hloh, jĕ giăm tong ten hloh, hơmâo boh tơhnal hăng pơkra ming gơnam sĭ mơdrô, lir hơbit djru ba mơnuih ƀôn sang pơklaih mơ̆ng tơlơi ƀun rin hăng pơklaih ƀun rin hơđong kơjăp”.

Hăng tơlơi djru ba mơ̆ng Ping gah, Kơnuk kơna laih anun tơlơi hrưn đĭ pô mơ̆ng mơnuih ƀôn sang, lu jơlan hơdră tơhnal pơkă mơ̆ng dêh čar amra djru ba ăt pơtrut tui boh tŭ yua, ngă anŏ pơtrut kơtang pơđĭ kyar bơwih ƀong huă-mơnuih mơnam ƀơi kual djuai ƀiă hăng tiơrng čư̆ siăng mơ̆ng tơring čar Quảng Ngãi amăng rơnuk phrâo.