VOV4.Jarai - Tui hăng Kơ-iăng Khua ding jum ia jrao ơi Nguyễn Trường Sơn, hrơi blan arăng lăng yôm hloh amăng bruă pơgang klin Covid-19 hơđuh đĭ klin tal 4 dong mơng lơ 23/8 - lơ 30/9. Amăng hơdôm hrơi anai, gơnong bruă ia jrao hơmâo pok pơhai hơdôm bruă pơčrang lăng brơi lăp djơ̆ amăng djop anih hăng pơphun tañ ƀiă pơhmu hăng virus Sars-Cov2 lar hyu. Yua anun, mrô mơnuih phrâo ƀă klin amra tañ ƀuh, kiăng kơ hơmâo hơdră wai lăng, pơjrao lăp djơ̆. Gơnong bruă ia jrao ăt hơmâo hơdôm anŏ pơplih amăng pơjrao brơi mơnuih ƀă klin Covid-19; mă yua hơdôm ia jrao phrâo hloh….Yua anun, mrô mơnuih ƀă klin, mrô mơnuih djai hrŏ trun hăng mrô mơnuih pơjrao suaih rĭm hrơi lu tui. Tui jŭ yap mơng Ding jum ia jrao truh ră anai, mrô mơnuih ƀă klin hrŏ trun 44,7% pơhmu hăng 2 wŏt hrơi tơjuh hlâo anun. Sit biă ñu, hơmâo 91% mrô mơnuih ƀă klin Covid-19 dưi pơjrao suaih laih. Hơmâo 7 amăng 62 boh tơring čar, ƀôn prong găn rơgao 14 hrơi ƀu hơmâo hlơi dong tah ƀă klin, 12 boh tơring čar, ƀôn prong ƀu ƀuh mơnuih pơwŏt glăi ƀă klin amăng 14 hrơi laih rơgao.

Siu Đoan: Pơblang