VOV4.Jarai - Pơjrao, ƀư̆ ară pơsuaih brơi mơnuih ruă tơdơi kơ ruă tơtăng ară drah dlô lĕ kiăng biă mă, tơlơi anai amra ngă kơ mơnuih ruă tañ suaih, huăi ngă djô tơkai tơngan, tañ pơwŏt glăi tơlơi hơdip tui hơđăp. Samơ̆, tơdah ƀu ƀư̆ ară kiăng kơ añrăng brơi mơnuih ruă tañ hloh amra pioh glăi kơ mơnuih ruă lu tơlơi sat amăng drơi jăn. Ơi ia jrao Chuyên khoa I Lương Công Toàn, Khua anom pơjrao ƀư̆ ară pơsuaih brơi mơnuih ruă kă, Sang ia jrao Y học cổ truyền tơring čar amra lăi pơthâo rơđah dong amăng mông bơră ruai kiăo tui anai:

- Ơ ơi ia jrao, ih dưi lăi pơthâo mơn kơ tơlơi yôm amăng bruă pơjrao ƀư̆ ară tañ hloh brơi mơnuih ruă tơtăng ară drah dlô ?

Ơi ia jrao Lương Công Toàn: “Ƀing ta ăt ƀuh mơn, mơnuih ruă tơtăng ară drah dlô lĕ ƀing mơnuih ruă bơdjơ̆ nao ară drah amăng akŏ dlô. Amăng hơdôm hrơi blung a, mơnuih ruă hơmâo pơjrao hăng hơdôm ia jrao gah tây y kiăng kơ pơjrao pơsuaih brơi ƀing mơnuih ruă. Ƀing ruă tơtăng ară drah glô juăt ƀuh djô ha bơnah drơi jăn, djô tơkai, tơngan ha bơnah, tơlơi anai pioh glăi kơ mơnuih ruă kă lu tơlơi glêh tơnap. Mơnuih ruă amra ƀu thâo rơbat hyu, mah thâo rơbat hyu samơ̆ ăt ƀu-ai buai lơi laih dong ngă kơ mơnuih ruă ƀu thâo hiăp bit, ƀu hluh, ƀu hơdor hơget ôh, amăng akŏ glô suek suak mơtăm. Hơdôm tơlơi pơglăi mơng tơlơi ruă tơtăng ară drah dlô lĕ kơtang biă mă tơdah mơnuih ruă kơtang pơjrao gah nội khoa, pơjrao ječ ƀing ta kơnong dưi bong glăi tơlơi hơdip đôč, tơdah mơnuih ruă ƀu triang pơpư̆ lư̆, ƀư̆ hyu drơi jăn kiăng kơ ară, tut tơ-ut dưi pơpư̆ na nao amra ngă kơ mơnuih ruă djô hlao mơtăm yơh. Yua anun, ƀing mơnuih ruă tơdơi kơ pơjrao hơđong kiăng kơ kơ ngă tui hơdră ƀư̆ ară kiăng añrăng tui ƀơƀrư̆ hrŏm hăng pơjrao tui y học cổ truyền dong.

- Hnun hă, ơ ơi ia jrao truh hơbin tơlơi ruă tơtăng ară drah dlô, ƀing ta amra pơjrao ƀư̆ ară kiăng kơ añrăng brơi mơnuih ruă klă hloh ?

Ơi ia jrao Lương Công Toàn: “Tui hăng kơsem min, tơlơi ruă tơtăng ară drah dlô ta kiăng kơ ƀư̆ nao rai drơi jăn tañ hloh amra tŭ yua hloh. Mah lơ̆m ba nao pơjrao ječ, ƀơi anom bruă ICU, ƀing mơnuih ruă ăt dưi ƀư̆ hyu, peč amăng drơi jăn, kơnong hơmâo sa, dua tơlơi đôč ƀing ơi ia jrao kŏm ngă, bơ tơdơi anun tơdah hơđong, ơi ia jrao amra brơi ƀing mơnuih ruă ƀư̆ hyu, bơrơguăt drơi jăn. Ƀing mơnuih ruă kiăng ƀư̆ hyu drơi jăn tui hluai gal. Blung hlâo lơ̆m ruă tơtăng ară drah glô, ƀing mơnuih ruă amra ƀư̆ hyu tut tơkai tơngan, peč amăng huăi drơi jăn mơnuih ruă. Tơdah ƀuh hơđong, huăi hơget ôh, ƀing ta amra pơphun ƀơƀrư̆ tui mơng rơnang truh pơ kơtang tui. Yôm hloh lĕ ƀing ta kiăng kơ pơpư̆ lư̆, ƀư̆ hyu drơi jăn amăng 6 blan blung a. Ƀing mơnuih ruă tơtăng ară drah glô kơtang, tơdah amăng 6 blan blung a ƀu nao pơjrao pơsuaih mơtăm tơdơi kơ 6 blan amra pioh glăi tơlơi sat hlao mơtăm yơh tơdơi anun bruă pơjrao ƀư̆ ară kiăng kơ añrăng amra tơnap tap biă mă, tơdah dưi suaih amra ngă kơ mơnuih ruă kơnong dưi rơbat nao rai, bơ dŏ glăi tơnap tap biă mă yua anun kiăng kơ nao pơjrao pơsuaih hĭ tañ hloh”.

- Ơ ơi ia jrao, amăng hrơi blan laih rơgao, anŏ tŭ yua mơng bruă ƀư̆ ară kiăng kơ añrăng brơi mơnuih ruă tơtăng ară drah dlô pơ Sang ia jrao Y học cổ truyền hiưm pă ñu ?

Ơi ia jrao Lương Công Toàn: “Sang ia jrao Y học cổ truyền lĕ anih amăng tơring čar juăt pơjrao brơi mơnuih ruă tơtăng ară drah dlô, yua anun ƀing mơnuih ruă djop anih ba rai pơjrao lu biă mă. Rĭm hrơi Anom pơjrao pơsuaih brơi mơnuih ruă, Sang ia jrao Y học cổ truyền tơring čar črâo brơi bruă pơsuaih brơi tơdơi kơ drơi jăn mơnuih ruă ƀuh tơlơi sat brơi kơ giăm 100-150 čô mơnuih. Samơ̆ hluai tui ruă kơtang ƀudah rơnang mơ̆ amra pơjrao pơsuaih brơi phara mơn. Samơ̆, tui sem lăng mơng sang ia jrao, abih bang mơnuih ruă tơtăng ară drah dlô tơdơi kơ ba nao pơjrao ƀơi Sang ia jrai Y học cổ truyền tơring car hơmâo giăm 70 - 80% mrô mơnuih ruă dưi rơbat nao rai. Dŏ glăi mơng 2 truh pơ 30% khŏm pơjrao sui dong, mơ̆ lu mơnuih dưi pơjrao suaih hăng dưi rơbat nao rai”.

- Hai, bơni kơ ih hŏ!

Siu Đoan: Pơblang