VOV4.Jarai-Tlam lơ 20/10, Anom pel ĕp kman duăm ruă tơring čar Dak Lak brơi thâo: Amăng plơi prong Ƀuôn Ma Thuôt phrâo čih dơ̆ng 17 čô mơnuih arăng test hmar ƀuh kman sars-cov-2 ƀơi 2 boh anih amăng phường Tân Tiến hăng Tân Lập. Amăng 17 čô mơnuih ƀă ƀơi dua boh phường anai, hơmâo 4 čô dŏ ƀơi jơlan Hồ Tùng Mậu, phường Tân Tiến boh tơhnal pơčrang PCR ƀuh kman sars-cov-2 soh. Lơ̆m ƀuh hơmâo kman, lu tơhan anom bruă kơnuk kơna brơi guang dar mơtam anih plơi pla gơñu dŏ, mă ia khak, ia mơdung abih bang ană plơi pla rơbêh 1000 čô grup plơi mrô 3 phường Tân Tiến ƀuh dơ̆ng 1 čô ƀă kman sars-cov-2.

Rơngiao kơ anun, mơguah lơ 20/10, sa krop rơkơi bơnai hlăk dŏ pơ jơlan čơlah anet 129 Ama Khê, phường Tân Lập, ñu duăm ayuăm amăng drơi jăn anun nao ĕp lăng tơlơi ruă. Pơ anai, 2 čô arăng mă ia khak ba pơčrang, boh tơhnal ƀuh mơtam ƀă kman sars-cov-2. Pơdjơ̆ nao kơ tơlơi pơhing covid 19 ƀơi tơring čar Dak Lak, amăng lơ 20/10, tơring čar anai hơmâo čih pioh 35 čô mơnuih ƀă kman Covid 19 ƀơi hơdôm tơring glông, plơi prong amăng tơring čar.

Nay Jek: Pơblang