Tui rơwang rơgao, Akŏ bruă mrô 8 amăng jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng hơmâo lăng lĕ sa “tơlơi yak nao yôm phun” lơm hơmâo ngăn drăp hăng bruă mă phara pioh pơtrut bơkơnar đah rơkơi đah kơmơi. Samơ̆, tui nai prin tha Phạm Thái Hưng-mơnuih rơgơi črâo ba hơdră bruă, tơlơi gir run anai ăt aka prong. Ñu brơi thâo, Akŏ bruă mrô 8 ră anai dưm dưm giăm 1,4% mrô prăk amăng djop jơlan hơdră, hơmâo wŏt hơdôm akŏ bruă prong hăng akŏ bruă anet phara. Mrô kah pơpha tui anun lĕ aset đơi kiăng glăm ba sa bruă jao pơprong. Nai prin tha Hưng lăi pơtong: “lăng biă ñu aka ƀu đing nao ƀudah aka ƀu tong ten amăng pơlir hơdră djru đah rơkơi đah kơmơi”.

Bruă anai ba glăi tơlơi lông prong, yua tơdah kơnong lăng nao sa akŏ bruă phara hăng ngăn rơnoh aset, bruă pơtrut bơkơnar đah rơkơi đah kơmơi ƀơi kual mơnuih djuai ania ƀiă hăng čư̆ siăng amra ngă tơnap kiăng ba glăi boh tŭ yua tui tơlơi kiăng. Ƀơi anăp kơ tơlơi sit nik anun, Nai prin tha Phạm Thái Hưng brơi thâo, kiăng pơplih tong ten amăng ngă tui rơwang pơ anăp. Ñu lăi pơtong, tơdah ƀing ta ƀu pơplih bruă mă, amra ngă tơnap kiăng dưi ngă tui hơnong pơkă ba tơbiă amăng bruă bơkơnar đah rơkơi đah kơmơi. Ñu rơkâo lĕ: Bruă pơlir hơdră djru đah rơkơi đah kơmơi amăng djop akŏ bruă prong, akŏ bruă anet hăng hơdôm boh tơhnal bruă mă amăng jơlan hơdră. Tui ñu, anai ƀu djơ̆ kơnong lĕ tơlơi glăm ba mơng kơnong Khul pơlir hơbit đah kơmơi Việt Nam ƀudah mơng Akŏ bruă mrô 8 đôč ôh mơ̆ ăt lĕ bruă jao tŏ tui na nao, kiăng “djơ̆ dơlăm nao rĭm ngăn rơnoh, rĭm bruă mă” mơng djop jơlan hơdră.

Kiăng bruă pơlir hơdră djru đah rơkơi đah kơmơi ƀu djơ̆ kơnong dŏ glăi ƀơi tơlơi črâo trun ƀudah tơlơi pơtrun pơsit, Nai prin tha Phạm Thái Hưng rơkâo kiăng črâo ba tong ten mơng djop Ding jum, gơnong bruă git gai ngă tui akŏ bruă prong, akŏ bruă anet, hăng tơlơi gum hrŏm mơng Anom bruă git gai gum hrŏm Jơlan hơdră. Ñu lăi pơtong, kiăng pơplih hơdră pok pơhai brơi sit nik hăng jê̆ giăm tơlơi sit nik.

“Pơsit tong glăi ƀon lan hăng ƀing mơnuih djru ba. Hăng hơdôm bruă mă kiăng hrưn đĭ bruă ngă klă hăng gru grua, kiăng pơplih mơng hơdră tŭ mă tui ƀon lan tơnap tap hloh hơdai nao tŭ mă tui ƀing mơnuih tong ten kiăng djru ba; hrưn đĭ tŭ yua pôr pơhing. Kiăng kơtưn hăng pơtrut yua boh thâo phrâo, samơ̆ yôm phăn ƀiă lĕ kiăng pơhlôm brơi ngăn rơnoh sit nik brơi hơdôm grup pôr pơhing hluai tui ƀon lan”.

Tui tơlơi sit nik ră anai, ƀơi lu anih, ƀing ta hơmâo akŏ pơjing hơdôm grup pôr pơhing, dưm truă loa pôr pơhing…samơ̆ boh tŭ yua mơng pôr pơhing ăt aka ƀu pơhlôm klă. Tơlơi ba truh phun lĕ yua kơƀah prăk kak kiăng tŏ tui hăng pok pơhai bruă mă. Nai prin tha Phạm Thái Hưng ăt lăi nao rơđah brơi Ding jum prăk kak aka ba rơnoh prăk djru anai amăng tơlơi pơtrutn mrô 55, ngă kơ lu ƀon lan aka ƀu hơmâo ngăn rơnoh kiăng pok pơhai, sit biă ñu lĕ ƀơi kual ataih, asuek. Ƀu dŏ glăi ƀơi anun, ñu ăt lăi pơthâo dong hơdôm anŏ aka ƀu klă amăng bruă pơtop hrăm brơi:

“Bruă pơtop hrăm brơi bruă bơkơnar đah rơkơi đah kơmơi ră anai glăk rơbêh rah, kơƀah rah; rơbêh hơdôm boh tơhnal ngă lok glăi, ngă pơƀuh ƀơi anăp; kơƀah tơlơi găn rơgao sit nik, hơdôm bruă mă pơčeh phrâo. Kiăng pơplih hrưn đĭ ngă bruă klă amăng hrơi blan ngă plih hĭ hơdôm tal pơtop hrăm phara, kiăng prap brơi ƀing apăn bruă djop gưl thâo pơlir hơdră djru đah rơkơi đah kơmơi brơi tŭ yua amăng bruă mă rĭm hrơi”.

Kơ bruă akŏ phun amăng hơdôm tơlơi kiăng đing nao pơ anăp, hrŏm hăng bruă tŏ tui pok pơhai tŭ yua hơdôm bruă bơwih brơi tơlơi suaih pral kơ ƀing pi kian, nai prin tha Phạm Thái Hưng rơkâo pok prong dong hơdôm boh tơhnal anun lĕ dưi tŭ mă ia yua hơdjă, sit biă ñu brơi ƀing đah kơmơi hăng čơđai. Tui ñu, anai lĕ tơlơi rơkâo kiăng hloh, bơdjơ̆ nao tơlơi suaih pral hăng tơlơi hơdip mơda hăng ƀing pô anai, samơ̆ tui tơlơi sit nik ră anai ăt jing lĕ tơlơi lông prong ƀơi lu ƀon lan kual ataih, asuek.

Kiăng hơdôm tơlơi rơkâo dưi ngă tui sit nik, nai prin tha Phạm Thái Hưng iâu pơthưr Khul pơlir hơbit đah kơmơi Việt Nam kiăng gơgrong gum hrŏm kjăp hăng anom bruă git gai gum hrŏm Jơlan hơdră tui hơnong pơkă dêh čar hăng djop Ding jum, gơnong bruă bơdjơ̆ nao, kiăng pơhlôm bruă đah rơkơi đah kơmơi hơmâo pơlir hơdră djru brơi dơlăm hăng sit nik amăng hơdôm akŏ bruă hăng pơmut hrŏm phrâo. Tơdah ƀu dưi pơlir hrŏm, kiăng tŏ tui sa grup bruă mă phara ƀudah dưi dưm dăp amăng akŏ bruă pơđĭ kyar ngăn rơnoh kar hăng sa hơdră lăp djơ̆ hăng dưi ngă sit nik./.