Jơlan hơdră anai lĕ sa amăng hơdôm bruă mă yom biă mă, pơdah rai pran jua tơlơi đing nao prong mơ̆ng Khua mua tơhan pơgang guai dêh čar tơring čar; djop gưl anom bruă ping gah, gong gai kơnuk kơna, djop sang bruă, khul mơnuih mut phung hăng ƀing mơnuih čơmah djru ba wai lăng, pơtô hrăm ƀing čơđai muai tơnap tap dŏ amăng kual giăm guai dêh čar, mơ̆ng anun pơtrut pơsur pran jua gir run hrăm hră, pơhrăm drơi jăn, pran jua tơlơi thâo, kơtưn hrăm thâo, kiăng jing mơnuih tŭ yua kơ lŏn čar tơdơi anai. Amăng jơlan hơdră, Khul khua mua ling tơhan pơgang guai dêh čar tơring čar Lâm Đồng, gong gai plơi pla hăng ƀing mơnuih čơmah hơmâo ƀơk 450 anung gơnam hăng abih tih rơnoh prăk lĕ 200 klăk.

Khul grup anom bruă čar pơ Dak Lăk gir jak iâu abih bang mơnuih ƀôn sang gum djru či pơphun tơlơi ngui ngor, brơi gơnam kơ hơdôm rơbâo čô čơđai ƀun rin, čơđai drơi jăn ƀu klă amăng tơring čar, kiăng ƀing čơđai ñu mơak hrŏm amăng hrơi ngui blan bơrơmi. Hăng anăn “Ok or jua puăi tlao - kah pơpha tơlơi kiăp ƀu-eng” yua anih hrăm bruă kơđi čar gah sang hră Trung cấp lý luận chính trị Dak Lăk pơphun,  hơmâo brơi 210 anung gơnam kơ ƀing čơđai amăng sang hră. Ƀơi să Ea Mdroh, 300 anung gơnam hơmâo brơi kơ ƀing čơđai amăng plơi, hluai tui jơlan hơdră Apui kơđen dian tŭi rơđah tơlơi kiăng khăp. Pơ ƀơi ƀuôn Čư̆ Kŏ Emông, Khul hlăk ai să Dang Kang ngă hrŏm hăng grup khăp pap pơphun ngui suang kơdăt ania čơgrai, rơyă sup ƀun riêu, yuă ƀuk, hăng brơi sum ao, gơnam hrăm hră, gơnam ngui blan bơrơmi kơ giăm 700 čô čơđai mơ̆ng 2 boh plơi Čư̆ Păm hăng Čư̆ Kŏ Êmông. Hơdôm gơnam anai djru brơi ƀing čơđai sang anŏ tơnap, drit druai ƀơi Dak Lăk mơak hrŏm amăng hrơi ngui Tê̆t trung thu thun anai.