Tui hăng Khua git gai pơ ala mơnuih ƀôn sang dêh čar, kơnong kơ tơdơi 4 blan pơphun bruă mă gong gai kơnuk kơna dua gưl, ăt dŏ hơmâo mơ̆n tơlơi kơƀah, bruă tơnao, lu hră pơar tơlơi phiăn pơtrun, pơpha bruă mă dŏ bơrơkua nao rai, hră pơar pơtrun aka ƀu hmao kru, biă mă ñu bruă gah lŏn mơnai, bruă man pơdong, bruă pơgang ayuh hyiăng, lŏn sang đang hmua, ngă hră pơar ană akŏ sang, mrô mơnuih amăng plơi pla.

Ơi Trần Thanh Mẫn lăi lĕ, anŏ rơbêh, kơƀah mơnuih mă bruă, apăn bruă kơnuk kơna dŏ hơmâo, anih mă bruă pơtum glăi lĕ kơniă, ƀu djop anih mă bruă. Khă hnun, Gơnong glông ăt brơi tơring čar pơsir bruă mă tui hluai anŏ gêh găl, yua aka ƀu man pơdong sang bruă phrâo, aka ƀu hơmâo anŏ gêh găl, djop sang bruă kơnuk kơna gưl să amra pơdong ƀơi lu anih mă bruă phara. Lơ̆m tơring čar pơtrut hmar bruă mă hăng ia rơgơi mrô, ba yua boh thâo ia rơgơi, kiăng ƀiă mơnuih đôč, samơ̆ bruă ăt hruaih.

Khua git gai pơ ala mơnuih ƀôn sang dêh čar bơhmutu, jơnum lok 9 phrâo anai, ƀing pơ ala mơnuih ƀôn sang dêh čar sem lăng lu tơlơi phiăn, tơdah ƀu ba yua ôh boh thâo ia rơgơi mrô, ba yua ia rơgơi ană mơnuih pơčeh mă juăt AI, sit mơ̆n amra ƀu giong bruă jao ôh, čih pơkra tơlơi phiăn; laih dơ̆ng lăi pơtong, anai lĕ sa bruă mă hơkrŭ tơnap tap, lông lang prong mơ̆ djop pô khom gir run ngă bruă, hlơi ƀu thâo lĕ khom pơdơi yơh.

Khua git gai pơ ala mơnuih ƀôn sang dêh čar lăi lĕ, amăng bruă krăp lăng ngă tui kơnuk kơna gong gai dua gưl, dŏ kơƀah bruă krăp lăng tong ten, ba truh ngă kơƀah hĭ bruă ngă hnang blung, aka ƀu ba glăi boh tŭ yua ôh, biă mă ñu ƀơi lu plơi pla hăng plơi prong. Yua kơ anun, gưl tơring čar khom krăp lăng na nao ƀơi să, kơƀah anŏ hơgĕt, khom pơhrua mơtam laih anun sa tơlơi dơ̆ng yom hloh lĕ:

“Ƀu hơmâo pô pơkŏn ôh rơngiao kơ kơnuk kơna dêh čar, Ding jum bruă čar, djop tơring čar pok pơhai lu hơdră sa amăng plĕ pơblih phrâo bruă ngă hră pơar, pơđĭ tui djru ba mơnuih mă bruă. Sa lĕ khom ngă giong tơlơi phiăn pơtrun djơ̆ găl, pơtô brơi ngă tui. Ră anai, tơlơi phiăn ƀing ta hơmâo djop laih, dŏ glăi lĕ Hră pơtô ba. Dua lĕ ngă hiư̆m pă čih pơkra hră pơar pơblih phrâo djơ̆ tơlơi phiăn, rơđah rơđong pơpha bruă mă, tơlơi dưi kah hăng ră anai. Klâo lĕ, čih pơkra jŭ yap mrô mơnuih mă bruă, ngă tui tui tơlơi dưi jao pơpha bruă mă kiăng găl, anăm ôh ngă rah dua klâo bruă sa čô, ƀu thâo hruaih ôh”.

Hrŏm hăng anun, khom pơtô brơi djop tơring čar ngă tui, jŭ yap glăi mơnuih apăn bruă, ngă khua djơ̆ găl; tañ akŏ pơjing djop sang bruă gah kơnuk kơna, pơphun brơi bruă mă ƀơi gưl să, laih anun pơtrut pơsur sang bruă mơdrô gah rơngiao kơnuk kơna ngă hrŏm; pơđĭ tui tơlơi thâo kơ mơnuih mă bruă, pơtô pơhrăm, pơhrăm glăi bruă kơ ƀing ngă khua, mơnuih apăn bruă, ƀing hyu ĕp lăng bruă mă amăng plơi pla, khom ĕp lăng re se djop bruă mă, jơnum amăng plơi pla kiăng pơtong glăi rbuă mă, laih dơ̆ng ngă tui bruă krăp lăng.

Biă mă ñu, mơ̆ng ră anai truh abih thun, pơtum lu bruă mă tuh pơ alin, man pơkra glăi sang bruă ƀơi să. Ră anai, dŏ năng ai 2000 boh sang bruă aka ƀu djơ̆ hnơ̆ng pơkă.

Kơ bruă pơđĭ kyar bơwih ƀong huă mơnuih mơnam, Khua git gai pơ ala mơnuih ƀôn sang dêh čar ơi Trần Thanh Mẫn ăt lăi, kiăng mă prăk tuh pơ alin tañ hloh, đing nao kơ bruă pơđĭ kyar, samơ̆ hơđong kơjăp; anih anom yua prăk kăk, sĭ mơdrô lŏn mơnai, sang dŏ, rơnoh sĭ mah khom dưi pơgang djơ̆ hnơ̆ng; pơblih mă bruă pơgang mơtah mơda, ba yua ia rơgơi mrô, kiăng pơđĭ tui boh tŭ yua amăng bruă mă, djơ̆ tơhnal pơkă pơđĭ  kyar.

Hăng tơhnal pơkă mơ̆ng Ping gah pơtrun mơ̆ng rĭm čăl tum teč laih, tui hăng ơi Trần Thanh Mẫn lĕ, sa bruă mă yom hloh lĕ khom ngă hơđong tơlơi bơwih ƀong huă mơtah mơda, pơgang ayuh hyiăng hơdjă rơgoh, bơwih ƀong rơgơi. Hrŏm hăng anun, khom pơblih glăi bruă mă bơwih ƀong huă tui anŏ ba rai lu boh tơhnal, dăp glăi bruă mă, bơwih ƀong huă, pơđĭ tui tơlơi gơgrong ba mơ̆ng kơnuk kơna, pơ anăp anai, Ding jum kơđi čar amra hơmâo hră pơtrun kơ tơlơi bơwih ƀong huă yua kơnuk kơna ngă pô, dăp glăi kual lŏn hăng tuh pơ alin kơ bruă čar.

Ơi Trần Thanh Mẫn lăi pơtong, kiăng dưi ngă djơ̆ tơhnal pơkă tui tơlơi phiăn pơtrun, Kơnuk kơna dêh čar, khua mua pơala mơnuih ƀôn sang sem glăi, pơsir hĭ, pơđĭ tui tơlơi git gai bơwih ƀong huă ƀơi dêh čar kiăng rơđah rơđong, tui hăng khua git gai pơ ala mơnuih ƀôn sang lăi, hăng  hơdôm bruă aka ƀu dưi ngă lĕ, ƀu hơmâo hlơi ôh pơkŏn, rĭm čô mơnuih ngă khua, mơnuih ping gah, khom kơtưn amăng bruă kơđi čar, tơlơi pơmin hrŏm hăng mơnuih ƀôn sang kơjăp pran jua đăo kơnang ba lŏn ia pơđĭ kyar hloh.