Amăng hơdôm bôh sang Amĭ Việt Nam Sông kơtang Võ Thị Đủ (97 thun), ƀơi să Đông Sơn, tơring čar Quảng Ngãi, dik dăk pơhiăp klao. Hrơi anai, ƀing apăn bruă tơhan, ling tơhan Ƀirô git gai Khul ling tơhan tơring čar Quảng Ngãi, Grŭp git gai Khul ling tơhan să, khul ling tơhan plơi hăng hlăk ai amăng khul tơdăm dra să nao čuă, ră ruai, djru amĭ Võ Thị Đủ rơmet agaih pưk sang. Rơkơi hăng ană đah rơkơi ñu leng kơ gum hrŏm hơdôm bruă blah ayăt pơgang Lŏn ia hăng pơsăn drơi ƀơi anih blah ngă. Lơm lŏn ia rơnuk rơnua, amĭ Võ Thị Đủ hmâo čơkă mă na nao tơlơi gum djru, bơwih brơi mơ̆ng ƀing apăn bruă tơhan, ling tơhan ƀơi plơi pla pô dô̆.

“Ră anai pran tơdu laih, ƀu thâo nao pơ̆ hơpă ƀu thâo ngă hơget ôh. Kơnang kơ adơi ayong ling tơhan gum djru kơ Amĭ sang dô̆ kiăng kơ rơ-ơ̆, bơ̆ thun anai pơ-iă hang đơi ñu ngă hang anun yang hrơi dŏng khom krư̆ bah amăng glăi. Dô̆ đih lĕ pơmin amăng akô̆ djop mơta. Hrơi anai dưi hmâo adơi ayong rai čuă brơi gơnam anai, gơnam adih hăng bơwih brơi pưk sang, bah amăng hăng bơwih brơi kơ pô djop mơta, Kâo bơni hăng mơ-ak lu biă”.

Ƀơi tơring čar Quảng Ngãi, rơbêh kơ 6.800 čô Amĭ đưi pơanăn, hyu ƀơk brơi anăn Amĭ Việt Nam Sông kơtang, ră anai 106 čô Amĭ dô̆ hơdip. Amăng anun, Ƀirô git gai Khul ling tơhan tơring čar Quảng Ngãi čơkă rông ba 21 čô Amĭ. Hơdôm thun rơgao, mơnuih apăn bruă tơhan, ling tơhan tơring čar Quảng Ngãi ngă tui klă na nao bruă bơwih brơi, čơkă rông ba Amĭ Việt Nam Sông kơtang, mơnuih djru ngă hơkrŭ đưm hăng ngă hơkrŭ, hơdôm bôh sang anô̆ gah hơdră bruă. Ơi Lê Văn Công, Kơ-iăng Khua git gai, Grŭp git gai Khul ling tơhan să Đông Sơn, tơring čar Quảng Ngãi brơi thâo:

“Kâo ƀuh rơgao kơ bruă mă anai tŭ yua biă, djru brơi kơ hlăk ai ră anai thâo hluh hơdôm anô̆ yôm phăn, tơlơi tuh rơyuh rơngiă ngiom mơ̆ng ƀing Amĭ ăt kah hăng ƀing adơi ayong, ƀing neh met hmâo rơbuh đĭ mă glăi tơlơi rơngai kơ lŏn ia. Rơgao hơdôm bruă mă anai lĕ kiăng biă kơ rơnuk hlăk ai ƀing gơmơi, pioh hlăk ai ƀing gơmơi sa wot dong dưi hơdor tơngia hăng anun ăt lĕ tơlơi pơtă pơtăn rơnuk hlăk ai ƀing gơmơi hmâo bruă mă hăng hmâo bôh tŭ yua bruă gơgrong hloh”.

Hơdôm bôh anom amăng khul ling tơhan tơring čar Quảng Ngãi hmâo hăng glăk gum hrŏm hăng hơdôm gơnong bruă đing nao pơsir hmao tlôn, djop tum hơdôm hơdră bruă mơ̆ng dêh čar, mơ̆ng tơring čar pioh kơ ƀing gah hơdră bruă gum djru. Bruă hyu hơduah ĕp, tum pơƀut tơlang tơleh pơsăn drơi lu thun rơgao ăt dưi hmâo Ping gah Ƀirô git gai Khul ling tơhan biă ñu đing nao. Mơng akô̆ thun truh ră anai, Grŭp gah hơdră bruă gum djru mơ̆ng Ƀirô git gai Khul ling tơhan tơring čar Quảng Ngãi hmâo tŭ mă, pơsit, rơkâo pơsir hơdră djru 24 pok hră ling tơhan rơka ruă dô̆ glăi tơdơi kơ blah wang, pơtô ba pơsit hră pơ-ar, rơkâo tŭ yap tơhan pơsăn drơi.

 Hrŏm hăng anun, Ƀirô git gai Khul ling tơhan tơring čar Quảng Ngãi gum hrŏm hăng hơdôm ding jum, gơnong bruă hăng plơi pla bơdjơ̆ nao pioh pơsit tơlơi pơhing hăng čang rơmang ba hơdôm gơnam mơ̆ng ling tơhan pơsăn drơi glăi hăng sang anô̆, mơnuih amăng kơnung djuai. Puih kơđông jao laih 20 pok hră čih gơnam anun truh hăng sang anô̆.

 Hăng pran jua hơdor tơngia dơlăm hơdôm rơnuk ơi yă nao hlâo, hơdôm hrơi anai, mơnuih apăn bruă tơhan, ling tơhan tơring čar Quảng Ngãi pơphun lu bruă mă sit nik bơwih brơi kơ hơdôm bôh sang anô̆ ling tơhan rơka ruă, tơhan pơsăn drơi; pơphun hyu čuă, pel ĕp tơlơi ruă, pha brơi ia jrao gun kơ hơdôm bôh sang anô̆ gah hơdră bruă gum djru, mơnuih djru ngă hơkrŭ đưm amăng tơring čar. Đại tá Võ Tấn Tài, Apăn bruă Ƀirô git gai Khul ling tơhan tơring čar Quảng Ngãi pơtŏng sit:

 “Bruă gum djru, pơ ala pran dưi hmâo Ping gah Khul ling tơhan tơring čar đing nao biă. Amăng hơdôm hrơi rơgao ăt hmâo pơdŏng laih sang dô̆ hơdor tơngia, sang dô̆ gah hơdră bruă gum djru hăng biă ñu đing nao truh hơdôm mơnuih ră anai sang anô̆ ƀu tâ̆o yâo, amăng anun hmâo hơdôm bôh sang anô̆ pơpŭ ƀing ling tơhan pơsăn drơi, khul grŭp hyu čuă hăng hơdor tơngia hơdôm mơnuih anai”./.