Trung tướng Nguyễn Anh Tuấn, khua ping gah Tơhan pơgang guai brơi thâo, čơkă bơyan bơnga thun anai, Ping gah, Anom git gai tơhan pơgang guai git gai hơdôm anom bruă čih pơkra hơdră ngă bruă, prăp rơmet klă, pơkiăo nao hơdôm rơbâo grup mă bruă pơ plơi pla ngă hrŏm hăng ping gah, gong gai hơdôm anom bruă pơphun brơi ling tơhan hăng mơnuih ƀôn sang čơkă Tê̆t, mơ-ak bơyan bơnga hăng ngă hơđong rơnuk rơnua ƀơi hơdôm boh plơi pla pơ guai dêh čar.

Phrâo anai mơn, ƀơi să Pa Tần, tơring glông Sìn Hồ, tơring čar Lai Châu, pơphun jơlan hơdră “Bơyan bơnga Puih kơđông tơhan pơgang guai pơđao pran jua ană plơi”, hơmâo lu bruă mă sit nik. Glăi pơhmư̆ hăng pơhiăp ƀơi mông bưp, Khua mir sir ơi Lương Cường lăp hơdor hăng ol kơdol yua ƀing khua, ling tơhan pơgang guai glăk ngă hrŏm hăng ping gah, gong gah plơi pla, djŏp gưl, anom bruă lăng ba Tê̆t kơ mơnuih ƀôn sang pơ guai dêh čar. Khua mir sir lăi, anai jing bruă pơdah pran jua gơgrong bruă, thâo gum djru nao rai mơ̆ng djuai ania ta, laih dong anai jing kơnuih hiam mơ̆ng Tơhan mơnuih ƀôn sang Việt Nam sông kơtang, ngă ƀhêm tui rup “Ling tơhan Wa Hồ” rơnuk phrâo.

“Jơlan hơdră anai hơmâo pơphun hăng lu bruă ngă sit nik, yôm biă mă, jê̆ giăm hăng mơnuih ƀôn sang djŏp djuai ania; yua anun hơmâo lu mơnuih gum tơngan ngă tom, mơ̆ng Ping gah gơnong dlông truh pơ plơi pla hăng djŏp anom bơwih ƀong. Hăng rơmô ania pioh rông, kơdung gơnam, braih, ƀañ čưng, brơi prăk kơ čơđai sang hră ƀun rin tơnap tap, “Čung ba tơkai adơi nao pơ sang hră” hăng djru 400 boh sang dŏ hơdor tơngia...Jơlan hơdră anai djru brơi, anun ƀu kơnong gơnam đôč đač ôh, anai jing gơnam pơtrut pơsur pran jua, djru ba rim boh sang anŏ rin pơ guai dêh čar hrŏm hăng ƀing tơhan - mơnuih ƀôn sang amăng dêh čar čơkă Tê̆t tui tơlơi phiăn dêh čar ta pơđao pran jua, mơ-ak mơ-ai hloh”.

Ƀrô tal anai, Khua mir sir ơi Lương Cường brơi 200 boh sang dŏ kơ sang anŏ pơ guai dêh čar Lai Châu hăng nua 10 klai prăk hăng brơi 11 anung gơnam kơ sang anŏ hơmâo anăn kơnuk kơna djru. Tui hăng tơlơi lăi pơthâo mơ̆ng Grup pơphun bruă, nua gơnam mơ̆ tơhan hăng mơnuih ƀôn sang amăng dêh čar ta brơi kơ mơnuih ƀôn sang pơ guai dêh čar tui jơlan hơdră “Bơyan bơnga Tơhan pơgang guai pơđao pran jua ană plơi” thun 2025 giăm 25 klai prăk.

Ăt amăng thun blan rơgao, pơ guai dêh čar amăng hơdôm boh tơring kual Dap Kơdư ăt pơphun mơn jơlan hơdră “Bơyan bơnga tơhan pơgang guai pơđao pran jua ană plơi”. Ƀơi să Ia Lốp, tơring glông Ea Súp, tơring čar Dak Lăk, Jơlan hơdră anai hơmâo brơi 5 boh sang dŏ kơ sang anŏ tơnap tap ƀun rin, brơi giăm 400 anung gơnam kơ sang anŏ hơmâo anăn kơnuk kơna djru, sang anŏ ƀun rim, sang anŏ rơgơi mơbruă, khăm brơi ia jrao kơ rơbêh 300 čô ană plơi. Ƀơi să guai dêh čar Ia Pnôn, tơring glông Đức Cơ, tơring čar Gia Lai, Jơlan hơdră “Bơyan bơnga Tơhan pơgang guai pơđao pran jua ană plơi” hơmâo brơi 100 anung gơnam kơ sang anŏ hơmâo anăn kơnuk kơna djru; 20 anung gơnam kơ ƀing čơđai sang hră tơnap tap; khăm, pơjrao, brơi ia jrao kơ rơbêh 200 boh sang anŏ. Ƀơi să Thuận Hạnh, tơring glông Dak Song, tơring čar Dak Nông, Jơlan hơdră anai hơmâo brơi 250 anung gơnam kơ sang anŏ rin, sang anŏ tơnap tap hăng sang anŏ hơmâo anăn kơnuk kơna djru, ƀing čơđai sang hră sang anŏ rin hăng nua ñu 150 klăk prăk; brơi 3 boh sang dŏ gum pơgôp djuai ania kơ sang anŏ tơnap tap biă mă.

Ta dưi pơsit Jơlan hơdră “Bơyan bơnga Tơhan pơgang guai pơđao pran jua ană plơi” hơmâo pơphun ƀơi djŏp anih pơ guai dêh čar, bul pơtâo plao ia rơsĭ, jing sa amăng hơdôm bruă djru mơnuih mơnam tŭ yua hloh, sit hloh mơ̆ng Ling tơhan, djru lăng ba hrơi Tê̆t kơ mơnuih ƀun rin tơnap tap, ba glăi tơlơi hok mơ-ak kơ mơnuih ƀôn sang pơ guai dêh čar. Mơ̆ng anun, pơđĭ tui pran kơtang gum pơgôp djuai ania, pơsit gru grua hiam mơ̆ng djuai ania ta lĕ thâo khăp pap, thâo hơdor tơngia; jing tơlơi pơmin pran jua hiam mơ̆ng “Ling tơhan Wa Hồ”.