Lơ 21/1, anom bruă pơdong ƀơi kual Dap kơdư, Gong phun jua pơhiăp dêh čar Việt Nam gum hrŏm hăng anom bruă git gai ling tơhan tơring čar Dak Lak hăng kông ti ia săng, ia jâo Nam Tây Nguyên pơphun jao sang dŏ brơi tơhan Xa Văn Thắng, glăk mă bruă ƀơi anom bruă ling tơhan tơring glông Krông Bông, tơring čar Dak Lak. Ayong Xa Văn Thắng lĕ sang anŏ tơnap tap, glăk dŏ sang apah, rông ba amĭ ama tha rơma hăng dua čô ană anet glăk amăng thun hrăm hră.

Sang phrâo prong giăm 100 met karê, abih tih prăk man pơdong 260 klăk prăk. Amăng anun, VOV Tây Nguyên hăng kông ia ia săng, ia jâo Nam Tây Nguyên djru brơi 80 klăk prăk, dŏ glăi ayong Thắng čan mă ƀing gŏp tơhan hăng sang bruă prăk djru mơnuih mơnam. Sang phrâo hơmâo jao ƀrô bơyan čơkă thun phrâo tui phiăn juăt, anai lĕ gơnam djru yôm phăn, ba glăi tơlơi hok mơ-ak hăng pơsur sang anŏ, djru brơi ayong Thắng hơmâo anih dŏ, hơđong pran mă bruă. Hơmâo thâo, anai lĕ sang tal 5 mơ̆ VOV Tây Nguyên hrŏm hăng hơdôm anom bruă djru man pơdong brơi mơnuih ƀôn sang amăng tơring čar Dak Lak amăng thun rơgao.

 Amăng rơwang dik dak čơkă Tết tui phiăn juăt Ất Tỵ 2025, sang anô̆ amai Ka Nhing (djuai ania K’ho) ƀơi grŭp mơnuih ƀôn sang Di Linh Thượng 2, tơring kual Di Linh, tơring čar Lâm Đồng, hmâo ol kơdol pran jua lơm dưi jao “Sang dô̆ khăp pap”. Sang phrâo pơdŏng hăng abih bang nua 160 klăk prăk. Amăng anun, Khul pơlir hơbit đah kơmơi tơring glông Di Linh djru 50 klăk prăk mơ̆ng Keh prăk yua kơ đah kơmơi ƀun rin, črăn dô̆ glăi yua kơ sang anô̆ hyu čan mă.

Yă Ka Hương – Kơ-iăng Khua Khul pơlir hơbit đah kơmơi tơring glông Di Linh brơi thâo, hrŏm hăng jao “Sang dô̆ khăp pap”, tal anai dô̆ hmâo lu bruă mă bơwih brơi Tết kơ adơi amai hmâo tơlơi hơdip mơda tơnap tap.

“Khul pơlir hơbit đah kơmơi tơring glông Di Linh iâo pơthưr abih bang hlơi hmâo pran jua čơmah thâo tơngia, hăng mơnuih amăng khul gum tơngan hrŏm djru ba... Rơngiao kơ anun ƀing gơmơi ăt gum hrŏm mơ̆n hăng sa dua khul grŭp ƀơi anai kah hăng Sang bruă Apui lơtrik pioh pơphun hyu tơña bla, jao gơnam brơi kơ adơi amai ƀun rin tơnap, ƀu hmâo anih kơnang pioh gơñu hmâo ƀiă gơnam pơđao pran jua mơ-ak bơyan bơnga čơkă Tết. Amăng sa thun, lơm pơphun jơlan hơdră “Amĭ djru ba”, ƀing gơmơi hmâo iâo pơthưr ƀing čơmah thâo tơngia, hơdôm khul grŭp, mơnuih pioh hyu čuă hăng brơi gơnam kơ 45 čô čơđai drit druai, ƀu hmâo anih kơnang. Rim blan, juăt hmâo grŭp pơphun hyu tơña bla, bơwih brơi tơlơi suaih pral. Rơnuč thun lĕ nao čuă tơña bla, brơi gơnam tam pioh ƀing čơđai hmâo dong tơlơi mơ-ak čơkă tết”./.