Grŭp hyu mă bruă hmâo nao čuă, hơ-ưč hmưi tết hăng ƀơk gơnam tam kơ mơnuih apăn bruă tơhan, ling tơhan Puih kơđông pơgang guai dêh čar ƀơi Tuy Đức (Ƀirô git gai Ling tơhan pơgang guai dêh čar tơring čar”; Khul tơhan Bộ binh 3 (Grŭp git gai Khul ling tơhan tơring glông Tuy Đức). Tal anai, Grŭp hyu mă bruă mơ̆ng Ping gah dêh čar hmâo jao laih 50 anung gơnam brơi kơ hơdôm bôh sang anô̆ tơnap tap hăng 20 anung gơnam truh ƀing čơđai lĕ ană rông hơdôm puih kơđông pơgang guai dêh čar.

Ƀơi să kual mrô 3 Dăk Ngo, čuă, hơ-ưč hmưi tết mơnuih apăn bruă tơhan, ling tơhan hăng mơnuih ƀôn sang ƀơi să, Kơ-iăng Khua git gai pơ ala mơnuih ƀôn sang dêh čar pơsit yôm bruă gong gai ƀơi anai hmâo gir run ngă klă bruă bơwih brơi tết kơ mơnuih ƀôn sang. Tơña bla, hơ-ưč hmưi tết ƀing tha plơi, mơnuih hmâo arăng đăo kơnang lĕ djuai ania ƀiă, Kơ-iăng Khua git gai pơ ala mơnuih ƀôn sang dêh čar ăt lăi rơđah mơn bruă mă mơ̆ng tha plơi, mơnuih hmâo arăng đăo kơnang. Anai lĕ khul ba jơlan hlâo, djru ngă brơi tơlơi pơtrun, jơlan gah, hơdră bruă hăng tơlơi phiăn mơ̆ng Ping gah, Kơnuk kơna truh hăng mơnuih ƀôn sang, hrŏm hăng anun gum hrŏm klă bruă pơdŏng pran gum hrŏm hơbit abih bang mơnuih ƀôn sang. Ƀrô̆ djơ̆ tal Bơyan bơnga Ất Tỵ, Kơ-iăng Khua git gai pơ ala mơnuih ƀôn sang dêh čar ơi Trần Quang Phương ƀơk 90 anung gơnam kơ sang anô̆ ƀun rin, čơđai sang hră ƀun rin yak rơgao tơlơi tơnap hăng tha plơi, mơnuih hmâo arăng đăo kơnang ƀơi să Dak Ngo.

Kiăo tui anun, Kơ-iăng Khua git gai pơ ala mơnuih ƀôn sang dêh čar, Thượng tướng Trần Quang Phương hmâo nao čuă, ƀơk gơnam tam kơ mơnuih apăn bruă tơhan, tơhan Kông ang tơring čar Dak Lak. Kơ-iăng Khua git gai pơ ala mơnuih ƀôn sang dêh čar hmâo hmư̆ khua Kông ang tơring čar lăi pơthâo kơ tơlơi, bruă mă amăng thun 2024, hơdôm bôh tơhnal ƀuh rơđah amăng bruă pơhlôm hơđong rơnuk rơnua, hrưn đĭ pơgang pơgăn ƀing ngă soh, hăng pok pơhai hơdôm jơlan hơdră djru hơđong tơlơi hơdip mơda mơnuih mơnam; Jơlan gah bruă jao amăng thun 2025, đing nao kơtưn bruă pơgang rơnuk rơnua, pơgang pơhlôm klă kơ hơdôm bruă jơnum prong hăng djru pơđĭ kyar bơwih ƀong – mơnuih mơnam ƀơi plơi pla.

Kơ-iăng Khua git gai pơ ala mơnuih ƀôn sang dêh čar, Thượng tướng Trần Quang Phương pơsit yôm hơdôm tơlơi gir run hăng bôh than dưi ngă mơ̆ng Khul Kông ang tơring čar Dak Lak hmâo ngă amăng thun rơgao. Biă ñu bruă pơphun “Abih bang mơnuih ƀôn sang pơgang rơnuk rơnua plơi pla lŏn ia”, Akô̆ bruă pơdŏng brơi 1.200 bôh sang dô̆ khăp pap kơ sang anô̆ tơnap tap kơ sang dô̆, sang anô̆ gah hơdră bruă, neh wa djuai ania ƀiă ƀơi tơring čar hmâo ngă giong hlâo kơ 3 blan bơhmu hăng kơčăo bruă ba tơbiă dưi hmâo Gong gai dêh čar pơsit yôm, bruă pơplih hơdră bruă čar mơ̆ng gơnong bruă hmâo lu tơlơi pơplih klă.

Lăi rơđah tơhnal yôm phăn mơ̆ng bruă pơhlôm rơnuk rơnua hơđong mơnuih mơnam ƀơi tơring čar, Kơ-iăng Khua git gai pơ ala mơnuih ƀôn sang dêh čar ta pơtă: Kông ang tơring čar Dak Lak khom gơgrong hlâo kiăo tui anih anom, thâo tơlơi mơ̆ng tañ, mơ̆ng ataih.

“Ngă tui jơlan gah: thâo kơjăp tơlơi, lăi pơthâo tơlơi pơhing, tŭ ư hrŏm tơlơi pơsit pioh pơphô djơ̆, đam, hmao tlôn pơsir tañ rơguăt ƀu pioh hmâo kah mơ̆ng pơsir”.

Grŭp hyu mă bruă nao čuă, brơi gơnam tam kơ mơnuih apăn bruă tơhan, ling tơhan Puih kơđông pơgang guai dêh car Ia Rvê, Grŭp bơwih ƀong Khul ling tơhan 737, mơnuih apăn bruă, tha plơi hăng sang anô̆ gah hơdră bruă, čơđai sang hră tơnap tap ƀơi tơring glông guai dêh čar pơ̆ Ea Sŭp. Ƀơi hơdôm anih nao čuă, ƀơk gơnam tam, Kơ-iăng Khua git gai pơ ala mơnuih ƀôn sang dêh čar ơi Trần Quang Phương mơ-ĭt tơlơi hơ-ưč hmưi klă hiam hloh truh hăng mơnuih apăn bruă tơhan, ling tơhan, gong gai hơdôm gưl hăng mơnuih ƀôn sang Ea Sup. Ñu rơkâo khul ling tơhan pơgang guai dêh čar tơring čar Dak Lak hruă kơjăp pran jua mơnuih ƀôn sang hăng tơhan, ngă klă dong hơdôm hơdră ba glăi bôh tơhnal kah hăng mơnuih ping gah jơnum hăng grŭp Ping gah plơi guai dêh čar, "Bơyan bơnga guai dêh čar pơđao pran jua ană plơi", "Ană rông puih kơđong”, “Čung tơkai adơi nao sang hră”.

Ăt ƀơi tơring čar Dak Lak mơn, pơ ala kơ Khua git gai Ping gah, Kơnuk kơna, Kơ-iăng Khua git gai pơ ala mơnuih ƀôn sang dêh čar ơi Trần Quang Phương hmâo tơña bla, pơsur mơnuih apăn bruă khul mut phung, mơnuih amăng khul, mơnuih mă bruă kơ sang bruă, biă ñu mơnuih amăng khul, mơnuih mă bruă hmâo tơlơi hơdip mơda tơnap tap, hmâo tơlơi truh lơm dô̆ mă bruă, tơlơi ruă tơnap pơjrao, mơnuih ƀu hmâo hlơi kơnang amăng mơnuih mơnam. Kơ-iăng Khua git gai pơ ala mơnuih ƀôn sang dêh čar hrŏm hăng grŭp hyu mă bruă hmâo ƀơk laih 300 anung gơnam Tết truh mơnuih amăng khul, mơnuih mă bruă hmâo tơlơi hơdip mơda tơnap tap./.