Rơđah biă ñu, ƀơi Hră pơtrun mrô 190, lơ 20/1/2025, Kơ-iăng Khua dêh čar ơi Hồ Đức Phớc, jao kơ Ding jum prăk kăk mă yua ba nao djru soh sel kơ tơring čar Kon Tum rơbêh 105 tơn braih, amăng anun 58 tơn braih djru mơnuih ƀôn sang ƀong têt Ất Tỵ hăng rơbêh 47 tơn braih djru mơnuih ƀôn sang hŭi ư̆ rơpa amăng bơyan tơjŭ pla thun 2025.

Tơdơi kơ Kơnuk kơna hơmâo hră pơtrun brơi mă rơbêh 105 tơn braih djru 2.300 boh sang anŏ mơnuih ƀôn sang bơyan ƀong têt anai hăng pơhlôm hlâo pơgang ư̆ rơpa bơyan pơjŭ pla thun 2025, tơring čar Kon Tum pok pơhai ngă tui mơtam, tŭ mă braih djru pioh hyu ƀơk kơ mơnuih ƀôn sang hmao klôn, djơ̆ anăn, mơnuih kơƀah mơnong ƀong huă bơyan têt Ất Tỵ 2025. Hrŏm hăng tơring čar Kon Tum, ƀrô djơ̆ tal anai, Kơnuk kơna ăt brơi mă abih bang 2.500 tơn braih hlăk djă pioh amăng hơjai dêh čar pioh ba nao djru kơ hơdôm tơring čar: Hà Giang, Cao Bằng, Ninh Thuận, Dak Lak ƀrô bơyan čơkă thun phrâo Ất Tỵ hăng bơyan tơjŭ pla thun 2025.