Amăng hrơi mông pơđao pran jua hơdôm hrơi rơnuč thun Giáp Thìn, Khua git gai pơ ala mơnuih ƀôn sang dêh čar ơi Trần Thanh Mẫn hơmâo lăi pơthâo hăng khua mua, ding kơna jơnum min apăn bruă Khua pơ ala mơnuih ƀôn sang djop rơwang thun kơ boh than mơ̆ lŏn ia ta lăi hrŏm hăng Ƀirô Khua pơ ala mơnuih ƀôn sang dêh čar dưi ngă amăng thun rơgao. Khua git gai pơ ala mơnuih ƀôn sang dêh čar ơi Trần Thanh Mẫn pơsit tong, Khua pơ ala mơnuih ƀôn sang dêh čar tal 15 hơmâo tŏ tui, ngă tui tơlơi dưi, tơlơi găn rơgao mơng djop rơwang mă bruă hlâo anun kiăng tŏ tui pơgiong klă bruă mă mơng anom bruă pơ ala mơnuih ƀôn sang prong hloh, anom bruă kơdrưh ang prong amăng dêh čar ta.

“Amăng rĭm tơlơi yak nao mơng Ƀirô Khua pơ ala mơnuih ƀôn sang dêh čar, ƀu djơ̆ kơnong lĕ boh than mơng tơlơi gir run ră anai đôč ôh mơ̆ ăt lĕ tơlơi tŏ tui hơdôm tơlơi hiam klă mơ̆ djop rơnuk khua mua, ƀing apăn bruă, mơnuih mă bruă amăng djop rơwang thun hơmâo pơjing hăng tŏ tui. Ƀing khua mua, mah pơdơi bruă, samơ̆ hăng tơlơi thâo thăi, pran hur har hăng tơlơi găn rơgao mơng ƀing gơñu, lêng gum hrŏm, pơlăi nao rai hăng pơgôp hiăp kiăng Ƀirô Khua pơ ala mơnuih ƀôn sang dêh čar jai hrơi prong kơtang ƀiă; čung ba, pơtrut pơsur, pioh glăi gru hiam mơng rơnuk nao hlâo brơi kơ rơnuk tơdơi hrăm tui”.

Thun 2025 yôm phăn biă mă, hơmâo lu hrơi pioh hơdor pơprong amăng lŏn ia, anai lĕ thun Ping gah, abih bang mơnuih ƀôn sang, khul ling tơhan gir run prong hloh kiăng ngă bruă tañ, ngă tui tơlơi pơtrun mơng Jơnum Ping gah tal 13. Sit biă ñu, Khua pơ ala mơnuih ƀôn sang dêh čar dŏ 3 tal jơnum hăng lu bruă čih pơkra tơlơi phiăn pơkŏn. Him lăng hluai tui 34 tơlơi phiăn hăng pơplih pơkra, pơhrua lu tơlơi phiăn pơkŏn kiăng djru brơi bruă dưm dăp anih anom mă bruă.

Tui anun, tơdơi kơ hrơi pơdơi ngui ƀong tết, Khua pơ ala mơnuih ƀôn sang dêh čar amra jơnum ƀu tui tơđar amăng tong krah blan 2 kiăng pơgiong ha amăng plĕ hơdră bruă djru pok pơhai tŭ yua tơlơi črâo trun kơ bruă dưm dăp anih anom mă bruă brơi hơbot, ngă bruă klă, tŭ yua mơng gơnong glông truh pơ ƀon lan.

Yua anun, hăng pran jua pơplih phrâo kơtang bruă mă mơng Khua pơ ala mơnuih ƀôn sang dêh čar, sit biă ñu lĕ thun 2025, kiăng prap lui jơnum Ping gah djop gưl anăp nao Jơnum Ping gah đơ đam dêh čar kah hăng ruah Khua pơ ala mơnuih ƀôn sang dêh čar tal 16 hăng Khul pơ ala mơnuih ƀon sang djop gưl rơwang thun 2026-2031, Khua git gai pơ ala mơnuih ƀôn sang dêh čar ơi Trần Thanh Mẫn čang rơmang ƀing khua mua, kơ-ăng Khua pơ ala mơnuih ƀôn sang, ƀing ding kơna jơnum min apăn bruă Khua pơ ala mơnuih ƀôn sang dêh čar, mơnuih apăn bruă amăng khul djuai ania, djop Jơnum min mơng Ƀirô Khua pơ ala mơnuih ƀôn sang dêh čar tŏ tui dong yua prong ƀiă dong pơ anăp anai.

Khua git gai pơ ala mơnuih ƀôn sang dêh čar pơsit tong, Ƀirô Khua pơ ala mơnuih ƀôn sang dêh čar lêng kơ đing tơngia hmư̆ hăng lêng pơplih phrâo kiăng bruă čih pơkra tơlơi phiăn, bruă krăi lăng, tơlơi pơsit hơdôm bruă yôm phun amăng lŏn ia jai hrơi klă tui.

Đĭ pơhiăp amăng mông bưp, kơ-iăng Khua pơ ala mơnuih ƀôn sang dêh čar Uông Chu Lưu hok mơ-ak brơi thâo, pơ-ư ang hăng tơlơi pơđĭ kyar djop mơta mơng lŏn ia ta amăng thun 2024; lăi pơtong, amăng tơlơi dưi hrŏm lŏn ia ta hơmâo tơlơi gum pơgôp prong mơng Ƀirô Khua pơ ala mơnuih ƀôn sang dêh čar. Mah bruă mă kơtrâ̆o, lu bruă phrâo, glêh tơnap samơ̆ ƀirô Khua pơ ala mơnuih ƀôn sang dêh čar lêng mut hrŏm, pơplih phrâo, tum pơƀut boh thâo hăng hrơi mông mă bruă, pơgiong klă bruă jao amăng djop mơta bruă čih pơkra tơlơi phiăn, krăo lăng hăng pơsit hơdôm bruă yôm phun amăng lŏn ia ta.

Thun 2025 lŏn ia ta yak amăng rơnuk pơplih phrâo, rơnuk hrưn đĭ mơng djuai ania hăng lu tơlơi dưi hăng tơlơi lông, hăng tơlơi gơgrong lĕ anom bruă čih pơkra tơlơi phiăn, anom bruă pơ ala mơnuih ƀon sang prong hloh, anom bruă kơdrưh krên mơng kơnuk kơna, kơ-iăng Khua pơ ala mơnuih ƀôn sang dêh čar hơđăp Uông Chu Lưu đăo gơnang Ƀirô Khua pơ ala mơnuih ƀôn sang dêh čar amra pơgiong bruă jao, djơ̆ hăng pran đăo gơnang mơng mơnuih ƀôn sang đơ đam dêh čar; laih dong pơsit tong, ăt lêng đing nao hăng amra pơgôp ha bơnah amăng bruă pơđĭ kyar hrŏm amăng lŏn ia hăng amăng Ƀirô Khua pơ ala mơnuih ƀôn sang dêh čar./.