Tong krah blan 10, amai Bàn Mùi Diết, djuai ania Dao, ƀơi thôn 12, să pơ guai Ia Rvê, prôk nao mơ̆ng mơguah mơtăm ƀơi sang să či huak mă hră brơi lŏn dŏ arăng dưm amăng kơthung. Rơkơi ñu nao mă bruă pơ čar rơngiao, ñu dŏ pơ sang rông dua čô ană. Sang rơkơi bơnai ñu hơmâo pơdong jang jai ƀơi lŏn sang amĭ ama đôč. Hơdip mơ̆ng bruă pla añăm, rông mơnŭ, prăk kăk ƀơi hơmâo ƀơi ƀô̆. Yua hnun, bruă hơmâo kơnuk kơna brơi lŏn dŏ ngă kơ ñu mơak ƀu thâo kơdŏp dong tah:“Kâo mơak biă mă yơh, lơ̆m hơmâo kơnuk kơna brơi lŏn sang, brơi đang hmua tui hăng anai, mơak biă, bơni kơ Kơnuk kơna lu hŏ”.

Hrŏm tơlơi mơak anun mơn, ơi Đặng Tòn San, ƀơi thôn 13, hơdip pơ Ia Rvê giăm 10 thun anai laih, samơ̆ aka ƀu hơmâo lŏn sang đang hmua ôh. Kiăng dưi hơdip, ơi San juăt hyu mă bruă arăng pơ anai pơ adih yơh. Lơ̆m Kơnuk kơna hơmâo hơdră djru brơi lŏn tơnah, ơi San dŏ tơguan rim hrơi či tŭ mă lŏn kơnuk kơna brơi, mơ̆ng anun, ñu thâo bơwih ƀong, hơmâo anih dŏ dong ƀong huă hơđong hloh:“Hlâo adih ƀu hơmâo lŏn ôh, bơ ră anai Kơnuk kơna djru lŏn sang đang hmua kơ neh met wa, gơmơi bơni biă, hlâo adih hyu mă bruă arăng đôč yơh, bơ mông anai ta hơmâo đang hmua baih, ta ngă bruă pơ plơi pla đôč yơh”.

Hăng hơdôm boh sang anŏ kah hăng amai Diết, ơi San, lŏn sang jing anŏ khŏm hơmâo, hnun kah mơ̆ng hơđong kjăp; đang hmua lĕ anŏ ta či bơwih ƀong, plai ƀiă kơnang kơ bruă arăng apah. Tui hăng tơlơi jŭ yap mơ̆ng să Ia Rvê, abih bang să hơmâo 155 boh sang anŏ kiăng djru ba lŏn sang đang hmua, hăng hră pơ-ar lŏn tơnah. Amăng anun, 92 boh sang anŏ ƀu hơmâo lŏn dŏ, lŏn ngă hmua; 6 boh sang hơmâo laih đang hmua, samơ̆ aka ƀu hơmâo sang dŏ, hrŏm hăng lu sang anŏ pơkŏn dong kiăng djru ngă hră yua lŏn.

Ngă tui Hră pơtrun mrô 104 mơ̆ng Khua dêh čar kơ đĭ kyar bơwih ƀong huă - mơnuih mơnam hrŏm hơbit hăng pơgang rơnuk rơnua, pơgang lŏn ia ƀơi Dap Kơdư hăng Hră pơtrun mrô 28 mơ̆ng Khua mua pơ ala mơnuih ƀon sang tơring čar Dak Lăk kơ bruă dru ba lŏn sang đang hmua hăng mơnuih ƀon sang djuai ania ƀiă, să Ia Rvê hơmâo hơdră djru ĕp brơi lŏn sang đang hmua djơ̆ hăng anŏ či kiăng.

Kual lŏn dŏ hơmâo čuk pơkra giăm 8ha, rôk tui jơlan plơi mơn, mơ̆ng thôn 8 truh kơ thôn 10, kah jing 198 blah lŏn. Tui hăng bruă prăp rơmet, rim boh sang hơmâo kăng brơi 400 m2, , hơmâo 200 m2 lŏn dŏ hăng 200 m2 hmua đang tơjŭ pla rim thun.

Hlâo či ngă bruă, hră čih anăn hơdôm boh sang anŏ dưi hơmâo lŏn, hră lơkak pơčrâo anih, hăng tơlơi pơkă bơdjơ̆ nao, hơmâo tĕp rơđah rơđông amăng 15 hrơi pơ sang să. Khul wai lăng plơi ăt nao lăi pơthâo kiăng neh met wa thâo, pơgôp hiăp brơi. Tal huak hră ruah mă anih dŏ tong krah blan 10 pioh kơ 28 boh sang aka ƀu hơmâo lŏn dŏ, hơmâo ngă rơđah rơđông abih bang mơnuih thâo, hơmâo gong gai, Jơnum min djŏp djuai ania mơnuih mơnam hăng mơnuih ƀon sang.

Ơi Nông Văn Gióng, Khua thôn 4, să Ia Rvê, brơi thâo, amăng tal blung a ngă tui Akŏ bruă 104, plơi hơmâo 6 boh sang anŏ dưi hơmâo lŏn. Anai jing sang anŏ tơnap kơtang biă, hơdip amăng plơi sui sin laih, samơ̆ aka ƀu hơmâo lŏn dŏ, lŏn ngă hmua ôh:“Hơmâo Ping gah, Kơnuk kơna ta lăng ba, jing 6 boh sang anŏ anai hơmâo djru lŏn sang đang hmua, jing ană plơi hok mơak biă. Mông anai nao tŭ mă lŏn tơnah, 6 boh sang anŏ amăng plơi gơmơi prôk nao mơ̆ng mơguah mơtăm, abih bang nao soh, ƀu hơmâo pô rơkut ôh”.

Hơmâo anih dŏ phrâo lĕ dưi pơsir brơi ha bơnah anŏ tơnap đôč. Kiăng mơnuih ƀon sang hơđong biă mơtăm, dưi pơklaih ƀun rin, să Ia Rvê glăk prăp rơmet djru brơi 266 ha hmua đang ƀơi hơdôm boh plơi, thôn 7, 12 hăng 13. Tui hăng hơdră ngă bruă mơ̆ng tơring, rim boh sang anŏ hơmâo djru brơi 1 ha. Hrŏm hăng lŏn ngă hmua, să djru brơi čan prăk kơmlai aset đôč, pơtô brơi ngă hmua, ruah anah pơjeh phun pla, djuai hlô rông lăp djơ̆ hăng lŏn adai, tơlơi thâo mơ̆ng rim boh sang anŏ mơn.

Ơi Nguyễn Huy Tiến, Khua ping gah să Ia Rvê, brơi thâo să sem lăng glăi dong mơn pô kiăng djru, lŏn hmua, hăng pơtrut ngă tañ tơlơi djru, laih dong brơi lŏn sang đang hmua khŏm djru brơi bruă bơwih ƀong, ngă hmua pla pơjing kơ mơnuih ƀon sang mơtăm:“Pơ anăp, Ping gah, Jơnum min mơnuih ƀon sang să git gai anom bruă bơwih ƀong lăng glăi dong đah mơ̆ng brơi lŏn sang, đang hmua, djru brơi neh wa hơmâo hmua či tơjŭ pla, djru ngă hơđong tơlơi hơdip mơda pơ guai lŏn ia să Ia Rvê. Hrŏm hăng brơi lŏn, să ăt hơmâo mơn hơdră djru bơwih ƀong, pơplih bruă mă, hnun kah neh met wa mơ̆ng dŏ dong ƀong huă kjăp pơ guai anai”.

Mơ̆ng hơdôm blah lŏn dŏ blung a truh kơ bruă prăp rơmet nih hmua la đang, hơdră djru lŏn tơnah ƀơi Ia Rvê glăk anăp nao pơsir brơi anŏ kiăng mơ̆ng mơnuih ƀon sang djuai ania ƀiă. Tŭ yua mơ̆ng hơdră djru anai ƀu kơnong mrô sang anŏ hơmâo brơi lŏn đôč ôh, ăt ƀuh ƀơi bruă djru brơi mơnuih ƀon sang hơmâo sang dŏ hơđong, hơmâo nih hmua la đang hăng hơmâo prăk kăk hơđong. Anai ăt jing anŏ yom biă mă, kiăng neh met wa hơđong pran jua ngă bruă, dŏ kơtă huă kơtit pơ guai dêh čar, djru đĭ kyar bơwih ƀong huă - mơnuih mơnam laih anun bong kjăp rơnuk rơnua ƀơi să./.