Hăng hơdôm kơčăo bruă mă gơnam amăng gŭ lơ̆n hơmâo anŏ yom phara, khua mua pơ ala Đặng Đức Hiệp, Kơ-iăng khua grup pơ ala mơnuih ƀôn sang dêh čar ƀơi tơring čar Lâm Đồng rơkâo, kơsem min tơlơi phiăn pơkă kơ bruă mă glăi lơ̆n hơmâo pơkă thun blan ƀudah Kơnuk kơna apah yua lơ̆n mơ̆ng mơnuih ƀôn sang. Tui hăng khua pơ ala anai lăi, bruă mă eh pơsơi Bosit amăng đơ đam prong rơhaih ƀơi Lâm Đồng pơdjơ̆ nao lu boh sang anŏ mơnuih ƀôn sang, lơ̆m anun bruă mă gơnam amăng gŭ lơ̆n ăt ƀơi tal lơ̆n đil đôč, amăng sa rơwư̆ abih yơh laih anun dưi jao glăi lơ̆n anun glăi hăng hơđăp. Tơdah mă hĭ lơ̆n hlong lar, prăk duh glăi, pơklaih ala lơ̆n hăng pơdong plơi phrâo kơ pô lơ̆n đang amra ngă tơnap kơ prăk kăk kơnuk kơna tơring čar. Khua pơ ala ơi Đặng Đức Hiệp rơkâo đĭ:

“Ƀing ta ăt khom kơsem min tong ten bruă mă glăi lơ̆n pơkă thun blan ƀudah Kơnuk kơna apah glăi lơ̆n mơ̆ng mơnuih ƀôn sang, kiăng pơhlom kơ bruă mă kông ngăn amăng gŭ lơ̆n. Tui anun, ngă pơhrŏ ƀiă tơlơi tơnap prăk kăk, laih anun anŏ duh glăi lơ̆n, pioh jao glăi mă kông ngăn, čuk jơlan, pơdong glăi plơi phrâo; pơhrŏ rơnoh yua lơ̆n pơhlom anŏ pơhno djơ̆ rơnoh gơnam sĭ mơdrô pơkra ming tơdơi anai. Tơlơi anun kiăng kơsem min pơhrua glăi dơ̆ng amăng tơlơi phiăn juăt ngă gêh găl kơ bruă ĕp mă kông ngăn amăng lơ̆n hăng rơđah hloh lĕ mă Bosit ƀơi Lâm Đồng”.

Khua pơ ala ơi Bùi Xuân Thống, Kơ-iăng khua grup pơ ala mơnuih ƀôn sang dêh čar ƀơi tơring čar Đồng Nai, rơkâo ngă pơrơđah hloh tơlơi pơkă lơ̆n glai, pla kyâo pơtâo, pơsir anŏ ngă plehploh mrô čih yap plah wah anom bruă wai lăng lơ̆n mơnai hăng anom bruă wai lăng glai kyâo. Khua pơ ala mơnuih ƀôn sang rơkâo đĭ pơgang anŏ tŭ yua kơ mơnuih ƀôn sang, mơ̆ng ƀing pơblih nao rai, sĭ mơdrô jao glăi lơ̆n mơnai, tŭ mă pơčruh ngăn prăk kăk hăng hră yua lơ̆n laih anun kông ngăn dŏ glăi ƀơi lơ̆n anun, pơhlom pơgang bruă yua lơ̆n djơ̆ tơhnal pơkă amăng thun blan dŏ glăi. Mơ̆ng bruă hơmâo sit nik ƀơi Đồng Nai, khua pơ ala rơkâo tui anai:

“Ƀuh rơđah bruă mă hơmâo sit nik ƀơi Đồng Nai, hơdôm kual hơmâo tơlơi kiăng mă gơnam amăng gŭ lơ̆n, pioh ba yua man pơdong bơwih brơi ring bruă phun, yom lơ̆m anun anŏ ba yua lơ̆n hơmâo wơ̆t lơ̆n pla kyâo sui thun boh troh, lơ̆n ngă hmua pla pơjing rĭm thun pơkŏn. Yua kơ anun, rơkâo anăm pơkă sa hnơ̆ng ôh hăng glai lơ̆n pioh ngă hmua pla pơjing, khom kơsem min tơlơi pơkă tui hơdră pơhlom djop djop mơta lơ̆n či mă yua, amăng anun lơ̆n pla kyâo sui thun, lơ̆n pla gơnam amăng sa thun pơkŏn kiăng ngă atur tơlơi phiăn ba yua lơ̆n hăng djơ̆ găl sit nik sit hơmâo”.

Kơ anăp ngă bruă pơblih glăi tơlơi phiăn, Khua dêh čar ơi Lê Minh Hưng brơi thâo, tơlơi phiăn čih pơkra glăi Tơlơi phiăn Lơ̆n Mơnai čih pơhrua glăi, wơ̆t bruă pơpha djuai lơ̆n, pơtum nao klâo khul lơ̆n kah hăng lơ̆n ngă hmua, lơ̆n dŏ ƀu djơ̆ lơ̆n ngă hmua hăng lơ̆n pơgang pioh kiăng pơđĭ kyar. Hơdră kah pơpha djuai anai, bơwih brơi bruă pơkă hnơ̆ng hăng kơnuk kơna wai lăng, mơ̆ng bruă mă glăi, jao, brơi apah yua lơ̆n truh pơ pơblih hơdră yua lơ̆n, jŭ yap rơnoh mă yua lơ̆n, prăk apah yua lơ̆n hăng ngă brơi hră yua lơ̆n. Kơ bruă duh glăi lơ̆n, djru laih anun pơdong plơi phrâo, Khua dêh čar rơkâo pơblih tơlơi pơmin duh glăi kông ngăn mă glăi, lơ̆n sang đang hmua mă glăi anun, jing bruă akŏ pơjing glăi tơlơi hơdip mơda, bruă mă kơ mơnuih ƀôn sang.

“Kơčăo bruă tơlơi phiăn pơkă, mơnuih hơmâo lơ̆n kơnuk kơna mă glăi dưi tŭ mă prăk duh glăi hăng prăk ƀudah hăng lơ̆n pơkŏn djơ̆ hrŏm pơkă anŏ ba yua, kah hăng lơ̆n sang đang hmua ăt hrup ƀudah duh glăi hăng prăk ăt khom lăp djop rơnoh mơ̆n. Dua dơ̆ng lĕ dưi djru ba anih dŏ ƀơi plơi pla phrâo tui anŏ pơkă pơdong plơi pla ƀôn prong. Klâo lĕ dưi pơblih jao glăi lơ̆n rơnoh bơkơnar đơ lơ̆n hơđăp, kơnuk kơna glăi, jao glăi lơ̆n phrâo ăt bơkơnar hăng anun mơ̆n ƀudah rơnoh prăk djop hăng đơ đam lơ̆n mă glăi ƀơi să, plơi pla anun. Rơngiao kơ bruă dăp brơi sang dŏ, anih pơdong sang, dŏ sem lăng tơlơi hơdip mơda, tơlơi bơwih ƀong huă, jơlan glông nao rai gêh găl ăt kah hăng gru grua hiam, sang hră, sang ia jrao hơmâo djop, hnun kah dưi ngă djơ̆ anŏ kiăng amăng tơlơi hơdip mơda mơnuih ƀôn sang, lơ̆m kơnuk kơna mă pơhrui glăi lơ̆n hmua”.

Hrŏm hăng jơlan hơdră duh glăi, pơtong rơnoh yua lơ̆n boh yom phun ăt pơčrong sai lu, pơgang anŏ tŭ yua kơ mơnuih ƀôn sang, prăk mơ̆ng sang bruă mơdrô hăng prăk pơhrui glăi ngăn drăp kơnuk kơna. Pơtong rơnoh yua lơ̆n, khom djơ̆ lăp, tơpă, pơhaih rơđah, kơnang kơ rơnoh jŭ yap lơ̆n mơnai hăng gah anom bruă wai lăng lơ̆n mơnai, laih dơ̆ng pơgang djơ̆ lăp plah wah anŏ tŭ yua mơ̆ng kơnuk kơna hăng mơnuih ƀôn sang, mơnuih yua lơ̆n, pô lơ̆n hăng sang bruă tuh pơ alin prăk kăk. Pơgôp hiăp kơ tơlơi anai, Khua pơ ala mơnuih ƀôn sang dêh čar ơi Trần Thanh Mẫn rơkâo, ngă pơgiong tơlơi phiăn tui hơdră ĕp lăng anih anom sĭ mơdrô samơ̆ ăt pơhlom hơđong, tơpă, anăm ngă rơnoh lơ̆n đĭ tui ča čot sit hơmâo tơlơi duh glăi hăng prăk yua lơ̆n đĭ pơmă, bơbeč djơ̆ kơ bruă duh glăi hăng jao glăi ala lŏn či mă bruă.

“Pơhrua nao tơlơi pơkă pơgang boh tŭ yua kơ kơnuk kơna, mơnuih yua lơ̆n, sang bruă tuh pơ alin; hơmâo pơkă rơnoh mrô čih pơhrua rơnoh lơ̆n djơ̆ lăp rơđah rơđong. Pơnăng čih rơnoh lơ̆n rim sa rơwang bruă 5 thun ƀudah pơblih beč bal hloh djơ̆ lăp, pôr pơthâo tañ tui hluai anŏ gêh găl čih pơkra pơhrua glăi yua lơ̆n mơnai nua đĭ trun. Khom ĕp glăi, ngă rơđah rơđong djơ̆ lăp, dăp mrô čih pơmut. Ngă rơđah ba yua ngă tui rơnoh prăk duh glăi yua lơ̆n, anmă kiăo tui kơ rơnoh nua lơ̆n sĭ mơdrô ôh. Sem lăng lu bơnah, pơsit djơ̆ tong tui hơdră pơmut lăi real-time rĭm hrơi. Tơhnal pơkă yua lơ̆n sui thun, kiăng huăi hơmâo tơlơi tơgŭ kơđi, ngă hră ƀom kiơng, rơngiă prăk pơhrui ngăn drăp, ngă kơtrâ̆o kơ anom bruă mơdrô, mơnuih ƀôn sang; pơjing rơnoh jŭ yap lăi lui hlâo djơ̆ hăng rơnoh sĭ mơdrô”.

Hơdôm tơlơi pơgôp hiăp ƀơi mông jơnum brơi ƀuh, čih pơkra glăi Tơlơi phiăn Lơ̆n mơnai kiăng lir hơbit hăng tơlơi hơmâo sit nik, boh nik ñu hơdôm tơlơi bơbeč djơ̆ tơlơi hơdip mơda mơnuih ƀôn sang hăng pơgang tơlơi tŭ yua kơ pô lơ̆n. Ngă pơgiong tơlơi phiăn pơkă kơ bruă duh glăi lơ̆n, pơdong glăi plơi phrâo, pơsit rơnoh lơ̆n hăng tơlơi phiăn pơkă kơ bruă mă kông ngăn gŭ lơ̆n ƀu kơnong djru pơsir hĭ tơlơi tơnap tap amăng bruă wai lăng, mă yua lơ̆n đôč ôh, dŏ pơhlom klă tŭ yua plah wah kơnuk kơna, mơnuih ƀôn sang, sang bruă mơdrô, laih dơ̆ng ngă atur brơi anŏ pơđĭ kyar bơwih ƀong huă mơnuih mơnam hơđong kơjăp.