Ƀơi puih kơđông tơhan wai lăng bah amăng jang jar kmar Lệ Thanh, hơbô̆ bruă “Rĭm rơwang hrơi tơjuh djru brơi sa boh sang anŏ ƀunrin kual giăm guai” hơmâo pok pơhai hăng 52 čô mơnuih Ping gah gơgrong djru brơi 132 boh sang anŏ, lu hloh lĕ sang anŏ ƀun rin. Ling tơhan hơmâo djru brơi hrơi mă bruă, črâo ba mơnuih ƀôn sang bruă pla pơjing, pơplih pơkra lŏn hmua, hrưn đĭ boh tŭ yua amăng ngă hmua. Amai Hi Kri, djuai ania H’rê, sang anŏ ƀun rin amăng plơi Bi, să Ia Dom, tơring čar Gia Lai, lĕ sa amăng ƀing mơnuih hơmâo ling tơhan wai pơgang guai djru brơi. Tơlơi gum hrŏm, črâo ba abih pran jua mơng ling tơhan djru brơi sang anŏ amai Hi Kri hơmâo dong tơlơi gal amăng bơwih ƀong huă hăng tơlơi hơdip mơda. “Hok mơ-ak biă mă, dŏ hrŏm hăng ling tơhan ngă gơmơi mơ-ak. Ƀơi kual giăm guai sang anŏ ăt dŏ giăm ling tơhan, ƀing tơhan djru brơi sang anŏ gơmơi lu biă. Kâo bơni biă mă.”

Ƀu djơ̆ kơnong gum hrŏm mơnuih ƀôn sang amăng bruă bơwih ƀong ngă hmua, ƀing apăn bruă, ling tơhan Puih kơđông tơhan wai lăng bah amăng jang jar kmar Lệ Thanh ăt đing nao bruă djru brơi hơdôm boh sang anŏ tui hơdră djru, mơnuih djru hơkrŭ. Rĭm blan, anom bruă pơphun nao tơña bla, ƀơk gơnam, khăm pơjrao hăng ƀơi jrao brơi hơdôm boh sang anŏ tui hơdră djru amăng ƀon lan. Hơdôm bruă gum djru pơgôp bơwih brơi tơlơi hơdip mơda, pơdah tơlơi glăm ba mơng ling tơhan hăng ƀing mơnuih tuh rơyut pran jua, djai pơsăn drơi yua kơ bruă wai pơgang lŏn ia. Tơhan rơka 4/4 Rčom Nich, dŏ amăng plơi Moóc Đen, să Ia Dom, ƀuh tong ten pran pơlir hơbit anun hluai tui hơdôm wŏt ling tơhan nao tơña bla, djru brơi lơm ñu ruă kă hăng amăng bơyan ngă yang thun phrâo dong: “Tơdah duam ruă mơ̆ ƀu dưi nao pơ sang ia jrao să, ƀing gơmơi amra nao pơjrao pơ sang ia jrao plơi Bi yua ling tơhan pơdong. Ƀing ling tơhan wai pơgang guai amăng hrơi ngui ngor, ngă yang thun phrâo lêng kơ rai tơña bla, ƀơk gơnam. Bruă mă ƀing gơñu ngă kơ ană plơi pla bơni biă.”

Mơng bruă mă sit nik amăng bơwih brơi tơlơi hơdip mơda, bruă pơtô ba mơnuih ƀôn sang ăt pơgôp ngă kơtưn pran pơlir kơplah wah mơnuih ƀôn sang hăng ling tơhan amăng bruă wai pơgang guai. Đại Úy Trần Tuấn Linh, Kơ-iăng Khua puih kơđông tơhan wai pơgang bah amăng jang jar kmar Lệ Thanh brơi thâo, anom bruă hơmâo pok pơhai lu bruă mă anăp nao ƀon lan anun lĕ man pơdong sang djru khăp pap, sang gum pơgôp, nao tơña bla sang anŏ tui hơdră djru, djru brơi prăk kak hăng boh thâo pơđĭ kyar bơwih ƀong huă. Mơng anun, mơnuih ƀôn sang hơmâo dong tơlơi gal hơđong tơlơi hơdip mơda, hrưn đĭ pran thâo hluh, tơlơi glăm ba amăng gum hrŏm wai pơgang rơnuk rơnua, hơđong amăng ƀon lan. “Hluai tui hơdôm hơbô̆ bruă djru brơi mơnuih ƀôn sang pơđĭ kyar bơwih ƀong huă, mơnuih ƀôn sang kual giăm guai ăt đăo gơnang nao Ding jum ling tơhan. Sit biă ñu hrŏm hăng tơhan wai pơgang guai jing sa “gong guai hơdip” mă bruă, bơwih ƀong, găn nao rai ƀơi guai lŏn ia, gum hrŏm hăng Ling tơhan wai pơgang guai, anom bruă bơdjơ̆ nao amăng kual bah amăng jang pơhlôm rơnuk rơnua, hơđong brơi mơnuih mơnam.”

Rôk tui jơlan guai dêh čar tơring čar Gia Lai, bruă bơwih brơi tơlơi hơdip kơ mơnuih ƀôn sang lêng pơlir hăng bruă jao pơtrut pơsur mơnuih ƀôn sang mut hrŏm wai pơgang jơlan guai, gong guai. Ƀơi puih kơđông tơhan wai pơgang guai Ia Puch, ƀing apăn bruă, ling tơhan juăt hyu tơl anih, gum hrŏm hăng gưl Ping gah, gong gai hăng ƀing mơnuih arăng đăo gơnang pơtô pơblang, pơtrut pơsur mơnuih ƀôn sang răng kơđiăng, gơgrong mut hrŏm wai pơgang rơnuk rơnua. Trung tá Nguyễn Đăng Dũng, grup pơsur mơnuih ƀôn sang, puih kơđông tơhan wai pơgang guai Ia Puch brơi thâo: “Bruă mă rĭm hrơi lĕ ƀing gơmơi juăt hyu tơl anih, gum hrŏm hăng mơnuih ƀôn sang, laih dong pơphô bruă brơi tha plơi, khua plơi, čang rơmang neh met wa hrŏm hăng gưl Ping gah, gong gai ƀon lan hăng ling tơhan wai pơgang guai wai pơgang rơnuk rơnua. Hrŏm hăng anun ăt pơtrut pơsur, pơblang brơi neh met wa thâo bơwih ƀong huă”.

Hrŏm hăng bruă jê̆ giăm mơnuih ƀôn sang, hyu tơl plơi pla, hơdôm jơlan hơdră anun lĕ “Čung ba čơđai nao sang hră”, “Ană rông puih kơđong tơhan”, “Sang khăp pap kual giăm guai” hăng bruă hyu tơña bla, djru brơi mơnuih ƀôn sang amăng bơyan ngui ngor, bơyan ƀong tê̆t tŏ tui pơgôp ngă tui hơdră djru mơnuih mơnam, bơwih brơi rơnuk hlăk ai čơđai hăng hơdôm boh sang anŏ tơnap tap. Yă Siu H’Ler, Khua git gai Ping gah, Khua jơnum min pơ ala mơnuih ƀôn sang să Ia Puch pơsit tong, tơlơi rô nao rai kơplah wah ling tơhan hăng gưl Ping gah, gong gai hăng mơnuih ƀôn sang jai hrơi hơkrŭ, ba glăi pran kơtang amăng pơđĭ kyar bơwih ƀong huă-mơnuih mơnam pơlir hăng wai pơgang guai lŏn ia. “Ƀing tơhan amăng anom bruă tơhan wai pơgang guai juăt gơgrong gum hrŏm hăng pơphô bruă brơi gưl Ping gah, pok pơhai hơdôm bruă jao bơdjơ̆ nao bruă wai pơgang guai lŏn ia. Laih dong, djru brơi mơnuih ƀôn sang pơhrŏ trun ƀun rin, man pơdong plơi pla phrâo, gum hrŏm hăng ling tơhan hyu tir, wai pơgang hơđong ƀơi guai lŏn ia.”

Tơlơi sit nik ƀơi hơdôm ƀon lan kual giăm guai brơi ƀuh, wai pơgang guai lŏn ia ƀu djơ̆ kơnong gơnang nao bruă hyu tir, wai lăng đôč ôh mơ̆ ăt kiăng hơmâo tơlơi mut hrŏm, gum tơhan hrŏm mơng mơnuih ƀôn sang. Lơm mơnuih ƀôn sang đăo gơnang, gơgrong gum hrŏm hăng ling tơhan, bruă wai pơgang amăng abih bang mơnuih dưi hơkrŭ kjăp mơng ƀon lan. Đại tá Đoàn Ngọc Báu, Khua khul git gai Anom bruă ling tơhan wai pơgang guai tơring čar Gia Lai brơi thâo, anai lĕ atur phun kiăng hơdôm boh ƀon lan kual giăm guai dưi pơgang hơđong, ngă gêh gal pơđĭ kyar bơwih ƀong huă hăng hrưn đĭ tơlơi hơdip neh met wa amăng djop plơi pla ala ƀon. “Pok pơhai hơdôm bruă jao hyu tơl plơi pla, laih dong kiăo tui lăng ƀing mơnuih juăt ngă soh kiăng thâo wai pơgang hơđong kual giăm guai, laih dong pơđĭ kyar rông hlô, pla pơjing kiăng djru brơi mơnuih ƀôn sang pơđĭ kyar bơwih ƀong huă, gru grua, mơnuih mơnam.”

Wai pơgang hơđong guai lŏn ia hăng bơwih brơi tơlơi hơdip kơ mơnuih ƀôn sang lĕ dua bruă jao pơlir hơbit kjăp. Mơng hơdôm hrơi mă bruă djru brơi mơnuih ƀôn sang bơwih ƀong huă, djru brơi hơdôm sang anŏ tui hơdră djru truh pơ bruă pơtrut pơsur neh met wa mut hrŏm wai pơgang guai lŏn ia, gong guai, anom bruă git gai ling tơhan wai pơgang guai tơring čar Gia Lai glăk pơgôp ngă hơkrŭ kjăp pran mut hrŏm mơng mơnuih ƀôn sang, pơjing kual giăm guai rơnuk rơnua, hơđong. Lơm tơlơi hơdip jai hrơi hơmâo arăng djru brơi, pran đăo gơnang hăng tơlơi glăm ba mơng mơnuih ƀôn sang amăng bruă wai pơgang guai lŏn ia ăt hơmâo hơbôr đĭ, ngă atur phun kiăng kual giăm guai Gia Lai pơđĭ kyar hơđong kjăp./.