Ƀơi pơsat dor tơhan djai pơsăn drơi jăn yua kơ lơ̆n ia Ninh Thuận, să Xuân Hải, tơring čar Khánh Hòa, ƀing khua mua nao h’ŭ dưm guang bơnga hăng čuh ñang hơdor glăi kơ ƀing tơhan khin hơtai tuh drah pơčah asar yua kiăng rơngai, mơai pô lơ̆n ia. Giong ngă yang h’ŭ hăng pioh sa mơnit kup akŏ, 25 per tơlang tơhan pơsăn drơi anun ba dor glăi ƀơi pơsat dor ƀing tơhan djai pơsăn drơi jăn yua kơ lơ̆n ia tui hăng tơlơi phiăn pơkă.

Dơ̆ng mơ̆ng hrơi ngă tui tơlơi pơtrun ječ ameč “500 hrơi mlam pơtrut kơtang bruă hơduah ĕp, rŭ kuai hăng pơsit anăn krăn pô tơlang tơhan pơsăn drơi jăn yua kơ lơ̆n ia”, tơring čar Khánh Hòa hơmâo rŭ kuai 84 per tơlang. Boh tơhnal anai hơmâo ngă hrŏm plah wah ƀing tơhan blah ngă, tơhan djop sang bruă kơnuk kơna, gong gai plơi pla hăng mơnuih ƀôn sang lăi pơthâo tơlơi pơhing, ƀing ƀuh anih dor, pơsat, gru nam rơnuk blah ngă, bơwih brơi hyu sem, klơi, rŭ kuai mă tơlang amăng lơ̆n. Tơring čar Khánh Hòa ăt pơtrut kơtang bruă hyu ĕp, rŭ kuai kiăng pơsit anăn krăn pô tơhan djai pơsăn drơi jăn yua kơ lơ̆n ia, ba glăi dor djơ̆ anih, plơi pla, glăi hăng sang anŏ tui tơlơi či kiăng mơ̆ng phung wang sang anŏ.