Hăng tơlơi kiăng “Ƀu lui čơđai sang hră pơpă ôh yua kơ tơnap tap mơ̆ khom pơdơi hĭ hrăm hră”, anom bruă pơtô hrăm tơring čar Dak Lak pơphun lu bruă mă đing nao kơ čơđai sang hră hlâo kơ truh thun hrăm phrâo.

Nai pơtô hrăm hră Hoàng Trọng Hải, pơtô ƀơi sang hră gưl dua Čư̆ Pui, să Čư̆ Pui, tơring glông Krông Bông, tơring čar Dak Lak, rơbêh 10 thun ngă nai pơtô hrăm hră ăt hơdôm thun anun mơ̆n ñu nao tơl sang phiang tơl adring, pơpoh bah amăng jak iâu čơđai nao san hră. Nai Hoàng Trọng Hải lăi: Čư̆ Pui lĕ să tơnap tap kual 3, ƀun rin biă mă, čơđai sang hră mơnuih djuai ƀiă truh kơ 80%. Ƀing amĭ ama čơđai sang hră brơi mơtam ană bă lui sang hră, yua kiăng djru amĭ ama mă bruă ngă hmua. Bruă nao jak iâu nao hrăm hră lĕ sa bruă mă ƀu amuñ ôh. Samơ̆ hăng nai Hải lĕ mah tơnap tap dơ̆ pă hai, ñu ăt khom ngă đôč yua kơ tơlơi hơdip tơdơi anai kơ ƀing čơđai sang hră.

“Nai pơtô khom hyu ĕp tơl sang, jak iâu ƀing amĭ ama kiăng gơñu brơi ană bă nao hrăm hră. Dua dơ̆ng lĕ pơtô lăi, pơčrâo ba jak iâu pơtrut pơsur lu sang anŏ ƀu brơi ƀing čơđai nao hmua mă bruă ôh yua aka ƀu djop thun mă bruă. Sang hră ngă hrŏm gong gai kơnuk kơna khom nao pơtô lăi, jak iâu na nao”.

Ăt să kual ataih, tơnap tap mơ̆n să Ea Sin, tơring glông Krông Ƀŭk, tơring čar Dak Lak rim thun kiăng kơ čơđai dưi nao hrăm hră djop lĕ khom hơmâo tơlơi djru hrŏm mơ̆ng abih bang glông bruă kơđi čar. Ơi Trần Văn Tiến, Khua jơnum min mơnuih ƀôn sang să brơi thâo, amăng să hơmâo sa boh sang hră gưl muai hăng sa boh sang hră gưl sa, gưl dua. Mrô čơđai sang hră thun hrăm 2024-2025 năng ai ñu 500 čô. Mơ̆ng akŏ blan 8, să git gai djop khul grup mơnuih tơpuôl, čih pioh ană čơđai djop thun hrăm hră brơi nao sang hră, boh nik ñu čơđai sang hră gưl muai hăng gưl sa pioh nao tơl sang pơtrut pơsur amĭ ama gơñu ba nă bă nao sang hră djơ̆ hăng tơlơi phiăn pơkă.

“Hrơi blan rơgao hrŏm hăng khua mua sang hră hơmâo ngă hrŏm djop khul mơnuih tơpuôl hyu pơtô pơblang, brơi ba ană bă nao sang hră sit truh thun. Ƀuh rơđah bruă iâu pơmut hrăm anih sa hăng gưl muai thun anai djop rơnoh jao. Truh mông anai djop sang hră hơmâo čih anăn djop mrô čơđai sang hră prăp kơ thun hrăm phrâo”.

Bruă đing nao kơ čơđai sang hră kual ataih ăt dưi pơtrut kơtang. Ƀơi Anih wai lăng khul tơpuôl mơnuih mơnam, amăng sang hră gưl sa Tô Hiệu, plơi prong Ƀuôn Ma Thuột, tơring čar Dak Lak hơdôm hrơi anai, hơmâo na nao ƀing nai pơtô tŭ mă hơdrôm hră hrăm, hră čih, sum ao kơ čơđai sang hră pioh ba ƀơk kơ čơđai sang hră tơnap tap hrăm thun tơdơi. Nai neh Đoàn Thị Tuyết Yến, Khua sang hră brơi thâo: Thun hrăm 2024-2025, sang hră hơmâo 1.200 čô čơđai sang hră, mơ̆ng anih 1 truh anih 5. Sa črăn lơ̆m amăng mrô anun lĕ čơđai sang hră mơnuih djuai ƀiă Êđê, Ƀuôn Alê B, lu sang anŏ ƀun rin biă mă.

“Sang hră hơmâo pok pơhai jŭ yap glăi abih bang čơđai sang anŏ ƀun rin hơmâo anăn đing nao hlâo djru ba. Sang hră brơi čih anăn yap glăi abih bang hăng hơmâo gơnam ƀơk brơi amăng hră mut thun hrăm phrâo. Kiăng pơhlôm djop brơi hơdrôm hră čih hră hrăm kơ ƀing čơđai nao sang hră, hơmâo djop gơnam yua hrăm hră kah hăng ƀing gơyut pơkŏn mơ̆n. Dua dơ̆ng lĕ pơčruh gơnam mơ̆ng sang hră, ƀing čơđai sang hră thun hlâo pơgôp sum ao, gơnam yua hrăm hră pioh brơi glăi kơ ƀing čơđai sang hră thun hrăm tơdơi”.

Ƀơi tơring glông giăm guai dêh čar Ƀuôn Đôn, tơring čar Dak Lak hrơi blan anai, djop sang hră hơmâo prăp lui laih kơ thun hrăm phrâo. Tui hăng ơi Đỗ Ngọc Anh, Khua anom pơtô bruă Pơtô hăng Pơjuăt tơring glông, thun hrăm 2024-2025, đơ đam tơring glông hơmâo 16.000 čô čơđai sang hră ƀơi 34 boh sang hră mơ̆ng gưl muai truh pơ gưl klâo hăng anih pơtô hrăm re se. Ha mơkrah amăng mrô čơđai sang hră anun lĕ djuai ania ƀiă, tơlơi hơdip mơda dŏ lu tơlơi tơnap tap. Kiăng ƀing čơđai dưi nao hră djop, Anom bruă Pơtô hăng pơjuăt hơmâo lăi pơthâo khua mua tơring glông, ngă hrŏm djop anom brua tañ pok pơhai hơdra djru ba kơ čơđai sang hră ƀun rin. Laih dơ̆ng, ngă hrŏm hăng djop sang hră hơmâo akŏ bruă rơđah rơđong tum teč brơi pơtrut abih bang čơđai sang hră nao hrăm hră, pơtrut bruă ngă hrŏm mơnuih ƀôn sang hăng anom bruă mơ̆ng kơnuk kơna, ngă tui tŭ yua bruă gum hrŏm čơđai sang hră tơnap tap. Ơi Đỗ Ngọc Anh lăi pơthâo:

“Djop sang hră hơmâo pơtruh nao rai hăng lu khul mơnuih ngă bruă djru tơlơi khăp pap, ƀing mơnuih čơmah pioh djru ba kơ ƀing čơđai kơdung hră, hơdrôm hră čih, gơnam yua hrăm hră, sum ao djru kơ gơñu hor ƀiă nao hrăm hră”.

Ƀơi tơring glông Ea Sup, ăt jing tơring glông ƀơi guai dêh čar mơ̆n tơring čar Dak Lak, thun hrăm phrâo anai, him lăng hơmâo 18.000 čô čơđai sang hră nao hrăm hră. Hrŏm hăng bruă prăp lui djop sang hră, gơnam yua pơtô hăng hrăm kơ čơđai sang hră, ƀing nai ăt nao hrăm glăi hơdră pơtô hrăm, anom bruă pơtô pơhrăm tơring glông hơmâo brơi jŭ yap glăi abih djop sang hră, čih anăn čơđai sang hră tơnap tap kiăng thâo hŭi pơdơi hrăm hră, jak iâu djop anom bruă mơnuih tơpuôl, ƀing hơmâo pran jua čơmah djru ba kiăng abih bang ƀing čơđai sang hră tơnap tap huăi tơbiă sang hră. Ơi Nguyễn Văn Khóa, Khua anom pơtô hăng pơjuăt tơring glông Ea Sup, tơring čar Dak Lak brơi thâo:

“Anom bruă pơtô hăng pơjuăt hơmâo git gai djop sang hră jŭ yap glăi mrô čơđai sang hră ƀun rin tơnap tap pioh jak iâu pơtrut pơsur djru hơdrôm hră, gơnam yua hrăm hră kiăng pơtrut pran jua nao hrăm hră thun hrăm phrâo 2024-2025. Truh ră anai, hơmâo tŭ mă rơbêh 18.700 hơdrôm hră hrăm hăng jao 50 boh rơdêng tang rơwang hăng 50 anung gơnam kơ čơđai sang hră mơnuih djuai ƀiă, sang anŏ ƀun rin”.

Thun hrăm  2024-2025, đơ đam tơring čar Dak Lak hơmâo giăm 500.000 čô čơđai sang hră djop gưl. Ƀơi kual ataih, kual tơnap tap ăt dŏ lu čơđai sang hră sang anŏ ƀun rin tơnap tap. Samơ̆ hăng bruă mă djru pơtrut pơsur pran jua nao sang hră kơ ƀing čơđai ƀun rin dưi hơmâo anom bruă pơtô pơhrăm tơring čar Dak Lak ngă hrŏm hăng djop tơring glông, anom bruă pok pơhai tañ djru kơ ƀing čơđai tơnap tap hơmâo anŏ gêh găl prăp lui gơnam yua mut hrăm hră tong ten, djop djel. Bruă ngă tŭ yua anun, yôm pơphăn biă mă ƀu kơnong djru kơ djă bong kjăp tơlơi khăp pap, gru grua mơ̆ng đưm, thâo pơdjru nao rai tơdruă dŏ ngă pơtrut pran jua, tơlơi đăo kơnang, h’ĭn hloh djru čơđai sang hră sang anŏ ƀun rin hơđong pran jua mut hrăm amăng thun hrăm phrâo truh laih.