Lơm Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn phrâo truh, mơnuih pơ ala hăng mơnuih ƀôn sang să Nga My, tơring glông Phú Bình, tơring čar Thái Nguyên hmâo lăi pơthâo glăi kơ tơlơi răm rai yua kơ hơjan ia ling dăo ba truh, hăng pơdah pran jua čang rơmang dưi gum djru.

“Neh wa Thái Nguyên lăi hrŏm hăng mơnuih ƀôn sang Nga My lăi ha jăn čang rơmang biă tơlơi gum djru neh wa tơtlaih mơ̆ng tơlơi anai. Ƀing gơmơi hmâo lu hmua ia, ƀiă rơngiă ƀiă, lu rơngiă lu, ƀu dô̆ hơget pioh yuă hơpuă dong tah”.

Ol kơdol pran jua ƀơi anăp tơlơi răm rai yua kơ kơthel ia ling dăo ngă sang dô̆, kông ngăn hăng hmua pơdai mơ̆ng mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn pơsur pran jua, hăng pơtŏng sit hơdră pơtrun, hơdră bruă mơ̆ng Ping gah hăng Kơnuk kơna lăng ba na nao tơlơi hơdip mơda mơ̆ng neh wa.

“Ih hơđong pran jua, Ping găh hăng Kơnuk kơna. Jơnum min khul grŭp, hơdôm gơnong bruă, hơdôm gưl lăng ba na nao tơlơi hơdip mơda mơnuih ƀôn sang, biă ñu mơnuih ƀôn sang hmâo tơlơi hơdip tơnap tap tơdơi kơ kơthel tal 3 ngă, răm rai gah kông ngăn, đang hmua neh wa. Ngă hiưm hơpă hơdră pơtrun mơ̆ng Ping gah, Kơnuk kơna pioh kơ tơring čar lĕ khom hmao hơđong tơlơi hơdip mơda mơnuih ƀôn sang”.

Ƀơi anăp hyu čuă tơña bla mơnuih ƀôn sang ƀơi să Nga My, anih ăt dô̆ ia ling dăo mơn, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn hmâo jao laih 200 anung gơnam pơsur pran jua hơdôm bôh sang anô̆ gơgrong ba ƀơi anăp kơthel tal 3 ngă hăng hơjan ia ling dăo ba truh.

“Ƀing apăn bruă tơhan, ling tơhan lĕ kâo ăt thâo mơn glêh glar biă, yak rơgao tơnap, djru neh wa mơnuih ƀôn sang ƀơi anai pioh pơsir anô̆ răm rai yua kơthel tal 3 ngă. Biă ñu ia đĭ prong, ƀing tơhan khom ba đuăi hơdôm bôh sang anô̆ mơnuih ƀôn sang nao pơ̆ anih pơhlôm klă. Ră anai kâo dưi thâo lĕ abih bang mrô sang anô̆ mơnuih ƀôn sang hmâo glăi pơ̆ sang laih. Ƀing tơhan djru hơđong dong tơlơi hơdip mơnuih ƀôn sang, biă ñu djru mơnuih ƀôn sang rơmet agaih anih anom dô̆”.

Tơlơi lăi pơthâo glăi hăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn, Khua git gai Ping gah tơring čar Thái Nguyên Trịnh Việt Hùng brơi thâo, hmâo laih 4 čô mơnuih djai; yap him lăng răm rai gah kông ngăn rơbêh kơ 600 klai prăk; rơbêh kơ 25.000 bôh sang anô̆ khom rit đuăi ječ. Gah đang hmua răm rai năng ai ñu 10 rơbâo ektar. Hăng hơdôm kual ia lip, tơdơi kơ ia thu glăk hmâo tơhnal ngă hơƀak, amra hmâo klin ruă ngă.

Pơhiăp amăng mông mă bruă, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn brơi thâo, ƀơi anăp bơdjơ̆ nao prong mơ̆ng kơthel tal 3, Khua git gai Ping gah, Khua mir sir dêh čar ta ơi Tô Lâm hmâo tơlơi iâo pơthưr neh wa, mơnuih apăn bruă tơhan, ling tơhan đơ đam dêh čar đing nao pơsir anô̆ răm rai ƀơi hơdôm bôh tơring čar kual Kơdư hăng plơi prong jưh jom Hà Nội.

Khua git gai wai lăng pơ ala mơnuih ƀôn sang dêh čar ta ăt rơkâo mơn tơring čar Thái Nguyên khom pel ĕp glông hrĕ apui lơtrik, ia yua kơ mơnuih ƀôn sang; bruă agaih anih anom dô̆ khom pơhlôm pơgang, pơgăn klin ruă. Gah bruă anai, Khua git gai wai lăng pơ ala mơnuih ƀôn sang dêh čar ta biă ñu pơtă gơnong bruă ia jrao khom gum hrŏm khut khăt pioh pơhlôm tơlơi suaih pral kơ mơnuih ƀôn sang; khom pơđĭ dlông, pơkra glăi hơdôm sang hră anih hrăm kiăng pơhlôm abih bang ƀing čơđai sang hră hơdôm gưl leng kơ dưi nao sang hră; pơhlôm tơlơi rơnuk rơnua, bruă kơđi čar, hơđong pơhlôm mơnuih mơnam.

“Kâo čang rơmang lĕ, hăng pran jua gum djru tơdruă, “hla hnil gôm ba hla tơ̆i”, djru tơdruă, gum hrŏm hơbit lơm  anai jing yôm phăn biă, ƀing ta khom pơsur amăng hăng gah rơngiao tơring čar hmâo prăk pơsir tơlơi răm rai tơdơi kơ kơthel tal 3 ngă tui pran jua lĕ khom dưm kơnar, ƀu pioh hmâo tơlơi sat truh hơpă amăng gum djru pơgang pơgăn kơthel ia ling dăo ngă. Sa wot dong, pơ ala kơ khua git gai Ping gah, Kơnuk kơna, pơ ala kơ grŭp hyu mă bruă, kâo rơkâo mơ-ĭt truh Ping gah gong gai hăng mơnuih ƀôn sang tơring čar Thái Nguyên yak rơgao djop tơlơi tơnap, tơlơi lông pioh hơđong tơlơi hơdip mơda mơnuih ƀôn sang”.

Khua git gai wai lăng pơ ala mơnuih ƀôn sang dêh čar ta lăi lĕ, kơthel găn rơgao, truh ia ling dăo hăng lơm ia thu, anô̆ răm rai pioh glăi prong biă, anun lĕ jơlan nao rai, anom mă yua; pưk sang đang hmua mơnuih ƀôn sang, sang hră anih hrăm khom pơkra glăi, pơdŏng glăi; agaih rơmet anih anom dô̆. Kiăng pơsir anô̆ răm rai mơ̆ng kơthel tal 3 ngă, Khua git gai wai lăng pơ ala mơnuih ƀôn sang dêh čar ta rơkâo, abih bang glông bruă kơđi čar mơ̆ng tơring čar Thái Nguyên, mơ̆ng Ping gah tơring čar, Khul khua pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring čar Thái Nguyên, hơdôm khul grŭp, hơdôm gơnong bruă, hơdôm gưl khom gum hrŏm pơsir, khut khăt ƀu lui raih ôh./.