Hăng akŏ bruă či ngă “Hlơi hơmâo anŏ hơgĕt, djru hrŏm anŏ anun, hơmâo pran djru pran jua, hơmâo gơnam djru brơi gơnam, hlơi hơmâo lu djru ba lu, hlơi hơmâo ƀiă djru ba ƀiă”, mơguah lơ 18/9, ƀơi plơi prong Kon Tum, tơring čar Kon Tum pơphun jơnum jak iâu bruă mă bơkơtưn “Gum tơngan hrŏm lui sang tơ̆i, sang hluh” hăng anŏ kiăng ngă truh abih thun 2025 amra ƀu hơmâo sang anŏ ƀun rin, sang anŏ giăm ƀun rin khom dŏ amăng sang tơ̆i rơ̆i.

Hơdôm thun rơgao, mah hơmâo pơtrut đing nao kơ bruă ngă anai, samơ̆ tơlơi gêh găl bơwih ƀong huă mơnuih mơnam dŏ tơnap tap, truh ră anai tơring čar Kon Tum dŏ đôč 1.500 boh sang anŏ kiăng djru ba pơdong sang phrâo, ruh hĭ sang tơ̆i rơ̆i; amăng anun hơmâo rơbêh 1000 boh sang kiăng djru ba man pơdong phrâo hăng giăm 500 boh sang anŏ kiăng ming pơkra glăi sang dŏ. Pơhiăp ƀơi mông jơnum jak iâu, ơi Lê Ngọc Tuấn, Khua Jơnum min mơnuih ƀôn sang tơring čar Kon Tum brơi thâo, tơhnal pơkă truh thun 2025 abih bang djop sang anŏ amăng tơring čar hơmâo anăn sang anŏ rin ƀun dưi hơđong soh. Ƀơi mông jak iâu jơnum bơkơtưn “Gum tơngan hrŏm lui sang sô, tơ̆i rơ̆i” mơ̆ng tơring čar Kon Tum, djop khul grup mơnuih tơpuôl, mơnuih ƀôn sang hơmâo pran jua čơmah djru ba rơbêh 500 klăk prăk hăng čih anăn djru abih tih rơnoh prăk lĕ 3 klai.