Hơdôm anom bruă ngă giang mah hơmâo đing nao djru brơi neh met wa pơhrŏ trun ƀun rin, hăng hơdôm bruă djru brơi phun pla, hlô rông, kmơk, ia jrao pruih pơgang phun pla; pơkiăo nao ƀing apăn bruă gum hrŏm hrŏm anom bruă pơsur ngă hmua črâo brơi mơnuih ƀôn sang amăng plơi ngă giang mah pơplih phun pla hăng boh thâo pla pơjing, rông hlô mơnong. Boh than ba glăi, hơdôm anom bruă, sang bruă djop gưl hơmâo pơkiăo nao rơbêh 212.000 čô mơnuih apăn bruă glăi pơ plơi pla, ƀơk rơbêh 200.000 anung gơnam, hăng abih tih giăm 262 klai prăk hăng lu tơlơi gum djru pơkŏn.

Kiăng tơlơi ngă giang mah djơ̆ hăng tơlơi sit nik, pơdah djơ̆ hăng hơnong pơkă, pơ anăp anai, ơi Nguyễn Đình Trung, Ding kơna Khul apăn bruă Ping gah, Khua git gai Ping gah tơring čar Dak Lak rơkâo djop anom bruă, sang bruă, gong gai ƀon lan tŏ tui pơplih phrâo boh tơhnal, hơdră bruă tui jơlan hơdră ngă giang mah hăng plơi pla djuai ania ƀiă amăng tơring čar brơi lăp djơ̆ hăng tơlơi rơkâo pơđĭ kyar bơwih ƀong huă, gru grua, mơnuih mơnam amăng rơnuk phrâo.