Hrŏm hăng bruă ngă djơ̆ hrơi mông pơkă tui tơlơi phiăn, bruă pơčrong sai čih anăn ruah khua, ruah mơnuih tơbiă anăn pioh ruah ngă khua hơmâo ngă hruaih, tơpă amăng anun đing nao ruah djop mrô pơ ala gah djuai ƀiă hăng đah kơmơi đĭ apăn bruă.

Ƀơi ƀuôn Kđoh, să Čư̆ Pơ̆ng, tơring čar Dak Lak, bruă hyu pơtô lăi kơ hrơi plĕ hră ruah khua pơphun mơ̆ng blan 11 thun hlâo kơ anai. Hrŏm hăng hyu yôl akă bơnal, păng ap, čih pơthâo, pôr tơlơi pơhing ƀơi akiăng jơlan phun, pôr amăng brô̆ jua pơhiăp, ƀing khua mua gong gai kơnuk kơna plơi pla hơmâo pơtrut bruă pơtô lăi, jơnum plơi, lăi pơthâo tơlơi phiăn pơkă kơ bruă ruah khua. Laih dơ̆ng čih pôr tơlơi pơhing, hră pơar pơdah thâo amăng plang facebook, Zalo, tik tok amăng bơnah khul apăn bruă, thâo mă tơdruă amăng plơi pla, kiăng hmao pôr brơi kơ mơnuih ƀôn sang thâo tong ten.

Ơi Y Hoh Niê, Khua khul wai lăng djop djuai ania mơnuih mơnam amăng plơi, ƀuôn Kđoh brơi thâo, boh yom phun tơlơi pơtô lăi, pôr pơhing, pơtum nao bruă pơtô, pơčrâo brơi ană plơi mơnuih dưi ruah khua ngă djơ̆ tơlơi dưi mơ̆ng gơñu ruah khua tui hăng tơlơi phiăn pơkă, ruah mă mơnuih kơnuih hiam hing ang, mă bruă tơpă, thâo mơbruă či pơ ala kơ mơnuih ƀôn sang.

“Pơtô lăi, pơblang brơi mơnuih ƀôn sang thâo hluh bruă plĕ hră ruah khua ruah djơ̆ pô ta đăo kơnang, ngă tui djop tơlơi kiăng pơ ala brơi mơnuih ƀôn sang, mă bruă glăm ba sit nik, pơgang brơi anŏ tŭ yua kơ mơnuih ƀôn sang hơmâo tơlơi hơdip mơda hiam klă hloh. Ƀing gơmơi ăt amra hmư̆ tơlơi git gai, pơčrâo bruă, anăp nao pơtô pơblang kơ mơnuih ƀôn sang ngă djơ̆ tơlơi phiăn, kiăng bruă ruah khua ba glăi boh tŭ yua hiam”.

Kơnang kơ bruă hyu pơtô pơblang djơh hăng anun, hơdôm tơlơi pơhing kơ bruă plĕ hră ruah khua hơmâo pôr pơthâo tong ten biă mă, mơnuih ruah khua ăt mơ-it nao tơlơi čang mơ̆ng ƀing gơnu hăng mơnuih ta đăo kơnang ngă pô pơ ala kơ mơnuih ƀôn sang, anun lĕ mơnuih thâo bruă, hur har, tơpă hơdip djơ̆ hnơ̆ng, thâo lu tơlơi phiăn kơnuk kơna, tơlơi phiăn juăt đưm djuai ania, jĕ giăm mơnuih ƀôn sang hăng thâo pơhiăp tơlơi pơhiăp djuai ania pô. Amĭ Lip, dŏ ƀơi ƀuôn Klŏk, să Čư̆ Pơ̆ng brơi thâo:

“Kâo čang rơmang tal ruah khua pơ anăp, ruah mơnuih hơmâo pran jua hiam klă, thâo rơgơi, đing nao kơ ană plơi pla lu hloh, ƀu kah pơpha ƀing pơdrong hăng ƀun rin ôh. Khom jĕ giăm ană plơi pla, thâo hluh tơlơi phiăn juăt, thâo hluh tơlơi hơdip mơda mơnuih ƀôn sang, djru ba tơlơi pơhiăp anŏ kiăng mơ̆ng mơnuih ƀôn sang kơ kơnuk kơna thâo”.

Tui hăng Jơnum min ruah khua tơring čar Dak Lak, truh ră anai, bruă pơčrong sai tŭ ư hĭ  tal sa hơmâo 28 čô tơbiă anăn pioh ruah mă 15 čô ngă pô pơ ala mơnuih ƀôn sang dêh čar tal XVI, amăng anun hơmâo 5 čô mơnuih djuai ƀiă, 9 čô đah kơmơi hăng 1 čô thun hlăk ai. Hăng ƀing pơ ala mơnuih ƀôn sang djop gưl ƀơi tơring čar lĕ anăn ba tơbiă 148 čô, či ruah mă 84 čô pơ ala sit nik. Ƀơi să, phường lĕ đơ đam tơring čar ruah mă 2.445 čô pơ ala sit nik.

Ƀơi djop plơi pla, anŏ pơkă ruah mơnuih ngă pô pơ ala lĕ hơmâo ƀing đah kơmơi hăng mơnuih djuai ƀiă, hơmâo lăi pơthâo rơđah rơđong tum teč amăng tal pơčrong sai blung a. H’Hương Ƀuôn Krông, Khua Jơnum min djop djuai ania mơnuih mơnam phường Ea Kao, tơring čar Dak Lak brơi thâo:

“Tơlơi gơgrong ba mơ̆ng ƀing đah kơmơi jai hrơi prong ƀiă, amra pơ ala kơ tơlơi pơhiăp, anŏ kiăng mơ̆ng ƀing đah kơmơi mơnuih ruah khua, lăi pơthâo tơlơi kiăng mơ̆ng ană plơi pla, biă mă ñu ƀing adơi amai đah kơmơi hrơi. Tui anun, bruă sem lăng dưm anăn đah kơmơi pioh ruah, dưm anăm mơnuih djuai ƀiă ruah đĭ pơ ala kơ djuai ania ƀiă djơ̆ găl yơh, pơhlom brơi pơgang tơlơi dưi anŏ tŭ yua kơ khul mơnuih anai mut hrŏm tơbiă anăn ruah khua. Anai lĕ bruă khom ngă hăng tơlơi glăm ba prong mơ̆ng rim čô mơnuih ruah đĭ ngă pô pơ ala mơnuih ƀôn sang”.

Amăng thun blan anai, hơmâo lu tơlơi pơblang pơmut tơbiă hăng prăp lui bruă ruah khua ƀơi Dak Lak hơmâo pơtong rơđah, bruă mă kơđi čar yom pơphăn biă mă, anun kiăng prăp lui dăp hơdră, pơkă hnơ̆ng djơ̆ tong ten mơ̆ng djop sang bruă, anom bruă. Jŭ yap glăi, čih anăn, dăp bruă hăng mrô mơnuih lăi pơthâo hơmâo ngă tui tong ten, djơ̆ hơdră, ngă atur kơ bruă pơčrong sai dơ̆ng pơ anăp anai.

Tui hăng yă Cao Thị Hòa An, Kơ-iăng khua git gai ping gah, Khua jơnum min pơ ala mơnuih ƀôn sang tơring čar, Khua Jơnum min ruah khua tơring čar Dak Lak lăi, bruă prăp lui plĕ hră ruah khua pơphun sa hnơ̆ng, kiăng pơgang djơ̆ tơlơi pơkă djơ̆ bruă, djơ̆ pô.

“Djop bruă mă truh mông anai Jơnum min ruah khua ăt hơmâo ngă hrŏm prăp lui giong abih hăng ngă klă djơ̆ hrơi blan pơtrun. Pơ anăp anai, ăt ngă djơ̆ hơdră pơtrun akŏ klôn, jŭ yap čih anăn, ruah khul mơnuih pơ ala hăng hnơ̆ng pơkă kơ tơlơi thâo ăt ngă djơ̆ tơlơi phiăn pơtrun”.

Pơhlom djơ̆ bruă dăp mơnuih, ruah anăn khul pơ ala djuai ƀiă hăng khul đah kơmơi amăng bruă ruah khua khm djơ̆ tơlơi phiăn pơtrun, laih anun ngă kơjăp tơlơi đăo kơnang mơ̆ng mơnuih ƀôn sang hơmâo anăn plĕ hră ruah khua. Hăng tơring čar anih dŏ rơhaih prong kah hăng Dak Lak anai, bruă pơhlom brơi pơkă bruă ruah khua, khom ngă djơ̆, gêh găl, pơđĭ tui tơlơi gơgrong ba mơ̆ng ƀing pơ ala mut ngă bruă amăng sang bruă pơ ala brơi mơnuih ƀôn sang dêh čar, pơ ala mơnuih ƀôn sang ƀơi tơring čar hăng gưl plơi pla, kiăng ngă djơ̆ anŏ kiăng, tơlơi bơtŭ ư mơ̆ng djop gưl mơnuih ƀôn sang.