Tơring čar Dak Lak ră anai hơmâo 450.000 čô mơnuih tha rơma, dưm dưm hăng 13,5% mrô mơnuih ƀôn sang. Jơlan hơdră dưi rơkâo djru anai kơ ƀing tha rơma mơ̆ng 60 thun truh 75 thun sang anŏ tơnap tap, aka ƀu hơmâo tơlơi djru ba hră pơhlom nua ia jrao hlâo tơdơi ôh, laih dơ̆ng djru hrŏm pơđĭ tui mrô mơnuih tŭ mă tơlơi djru hră pơhlom nua ia jrao amăng tơring čar.

Ơi Trần Mạnh Toàn, Khua sang bruă pơhlom nua bruă mơnuih mơnam tơring čar Dak Lak lăi lĕ, tơlơi yom hloh lĕ Hră pơtrun phrâo anai, pơhrua nao anŏ kơƀah amăng bruă pơsir hĭ tơlơi tơnap kơ ƀing tha rơma:

“Bruă jak iâu mơnuih tha rơma amăng tơring čar Dak Lak pơčruh mă prăk pơhlom nua ia jrao lĕ tơnap biă mă. Ƀing tha rơma mơ̆ng 60 truh 75 thun aka ƀu hơmâo tơlơi djru ba jơlan hơdră hơgĕt ôh, jing anŏ kơƀah amăng bruă pơsir tơlơi tơnap tap amăng mơnuih mơnam. Hră pơtrun anai, amra pơhlom brơi djop, pơsir anŏ kơƀah hră pơhlom nua ia jrao kw mơnuih tha rơma”.

Kơ prăk kăk, Dak Lak hơmâo pơhlom hlâo 38 klai pioh ngă tui jơlan hơdră anai amăng 4 blan či rơnuč thun 2026. Mơ̆ng thun 2027 pơ anăp lĕ, rơnoh prăk anai him lăng mă yua ngăn drap pơpha hyu pơ djop să, phường. Djop anom bruă, djop să plơi pla khom čih anăn pơmut anăn re se kiăng thâo tong ten mrô mơnuih či kiăng hră pơhlom nua ia jrao, anăm hơmâo tơlơi pơrơkua nao rai tơlơi djru, sa, dua wơ̆t.

Khua ping gah tơring čar Dak Lak, ơi Lương Nguyễn Minh Triết lăi pơtong, mah tơring čar dŏ lu tơlơi tơnap tap, bruă pioh glăi ngăn drăp djru pơsir tơlơi tơnap tap amăng mơnuih mơnam lĕ ăt kiăng ngă tui hăng đing nao hlâo hloh:

“Amăng tơlơi gêh găl ră anai dŏ lu tơlơi tơnap ƀơi tơring čar samơ̆ ăt khom pioh lu rơnoh prăk pơsir tơlơi tơnap tap amăng bruă mơnuih mơnam. Jao kơ Jơnum min mơnuih ƀôn sang sem lăng lăi pơthâo bruă anai hăng jao djop anom bruă amang Khul pơ ala mơnuih ƀôn sang tơring čar jŭ yap glăi tong ten laih anun kơnang kơ jơnum lok mơ̆ng khul pơ ala mơnuih ƀôn sang tơring čar pơ anăp anai pơsit hĭ”.