Hơdôm hrơi anai, amon Vũ Thị Giang, hrăm anih 8, sang hră gưl II Lê Quý Đôn, să Ea Bung, tơring čar Dak Lak, hur har pran jua prap mut sang hră. Ñu brơi thâo: “Ƀing neh nai hăng khua mua sang hră, djop gưl đing nao, juh alum pran jua ƀing gơmơi, djru brơi gơnam yua hrăm hră. Sang hră brơi yua jang jai hơdrôm hră, hrŏ ƀiă prăk dauh yua sang anŏ tơnap tap. Lơm hrăm anih 6 kâo hơmâo hră pơpŭ hrăm khá, anih 7 hră pơpŭ hrăm rơgơi ƀiă. Kâo amra gir run kiăng dưi hrăm rơgơi hloh”.

Ƀu djơ̆ kơnong djru brơi ƀing čơđai sang hră tơnap tap, hơdôm boh ƀon lan amăng tơring čar Dak Lak ăt đing nao pơkra ming, man pơdong phrâo sang hră, pơhlôm brơi djop tơlơi gal amăng pơtô pơjuăt. Mơng pel ĕp glăi hơdôm boh sang hră, să Krông Ana hơmâo kah mă yua rơbêh 11,3 klai prăk kiăng tuh pơ alin man pơkra 16 ring bruă amăng thun hrăm anai. Ơi Phan Thanh Việt, kơ-iăng Khua Jơnum min mơnuih ƀon sang să Krông Ana brơi thâo: “Sa, dua ring bruă glăk ječ ameč pơgiong kiăng hmao tlôn mă yua amăng thun hrăm phrâ. Hrŏm hăng pơkra ming hơdôm boh sang hră, să ăt git gai hơdôm boh sang hră gơgrong pel ĕp, koh rơmet than kyâo kiăng pơhlôm rơnuk rơnua amăng bơyan hơjan kơthel”.

Hăng hơdôm boh să giăm guai, tơlơi rơkâo ƀu djơ̆ kơnong lĕ pơgiong hơdôm boh sang hră đôč ôh mơ̆ ăt kiăng pơplih lăp djơ̆ hăng bruă pơphun glăi bruă ƀơi hơdôm boh sang hră. Ƀơi să Ia Lốp, mơng 5 boh sang hră hlâo adih, ƀon lan hơmâo pơmut glăi dŏ 2 boh sang hră. Amăng anun, sang hră kơnuk kơna čem rông ba gưl I hăng gưl II Ia Lốp hơmâo akŏ pơdong kơnôl 20/7 hăng hơmâo pơgiong bruă dưm dăp mơnuih apăn bruă, nai pơtô hrŏm hăng bruă ĕp pơmut ƀing čơđai. Ơi Bùi Tiến Hoạt, kơ-iăng Khua Jơnum min mơnuih ƀon sang să Ia Lốp brơi thâo: “Truh ră anai bruă dưm dăp amăng sang hră, bruă pơphun amăng lăm ăt hơmâo ngă tui djop, pơgiong hơdôm grup pơtô hrăm, dưm dăp anih hrăm, laih dong hră ĕp pơmut čơđai lêng giong laih. Ră anai ƀing gơmơi hrŏm hăng khul wai lăng akŏ bruă hăng hơdôm anom bruă tuh pơ alin ječ ameč man pơkra hơdôm ring bruă, ngă hiưm pă ƀrô kơnôl 30 blan 8 amra jao glăi anih hrăm kiăng dưi mă yua amăng thun hrăm phrâo”.

Hrŏm hăng hơdôm tơlơi pơplih pơmut glăi hơdôm boh sang hră, ƀing nai pơtô ăt dong ƀơi anăp kơ tơlơi rơkâo pơplih tui hơdôm bruă jao phrâo. Ơi Phạm Thế Trường, kơ-iăng Khua sang hră gưl II Buôn Trấp, să Krông Ana brơi thâo: “Sang hră hơmâo pơphun pơtô hrăm brơi ƀing nai pơtô kah hăng mut hrŏm hơdôm anih pơtô hrăm tui bruă jao mơng gơnong bruă hăng mơng Ding jum pơtô pơjuăt. Sit biă ñu lĕ, sang hră pơsur pran jua ƀing nai gir mut hrŏm hơdôm anih pơtô hrăm kơ yua boh thâo phrâo kah hăng kiăo tui hơdôm jơlan hơdră pơtô hrăm phrâo”.

Bruă prap lui ha amăng plĕ mơng gơnam măi mok, ƀing nai pơtô truh hơdră djru glăk ngă atur phun kiăng thun hrăm phrâo ƀơi Dak Lak pok pơphun hăng pran gơgrong pô, rơnuk rơnua hăng amra ngă ƀing čơđai mơng kual gêh gal truh pơ kual tơnap tap hơmâo djop tơlơi gal kiăng dưi hrăm klă hloh./.