Hơdôm hrơi anai, amai H’Ly Byă, dŏ ƀơi phường Thành Nhất, tơring čar Dak Lăk, đuăi hyu ngŏ yŭ či blơi hơdrôm hră kơ dua čô ană ñu, sa čô hrăm anih 1 hăng sa čô hrăm anih 10. Ană bă ñu hơmâo anăn kơnuk kơna djru, brơi tŭ mă hră hrăm jăng jai anun jing sang anŏ tơguan kơ sang hră ƀơk brơi hơdrôm hră, ƀu nao blơi tañ ôh. Truh mut sang hră baih, sang hră aka ƀu hơmâo djŏp ôh hơdrôm hră brơi čơđai mă hrăm jăng jai, jing sang sĭ hơdrôm hră ăt abih ƀhiao mơn: “Kâo hyu tơña blơi hơdrôm hră djŏp anih yơh, đuăi hyu ngŏ yŭ mơtăm. Năng ai 5,6,7 boh sang sĭ hră yơh. Anih 1 hơmâo djŏp laih hơdrôm hră, samơ̆ ană kâo hrăm anih 10 aka ƀu djŏp ôh, dŏ kơƀah 4,5 sŏp dong”.

Ƀu kơnong amĭ ama ƀing čơđai ôh hyu ĕp hơdrôm hră, ƀơi hơdôm boh sang hră, ƀing nai pơtô ăt glăk hyu ĕp blơi mơn, hŭi kơƀah hơdrôm hră brơi kơ ƀing čơđai hrăm. Nai neh Nguyễn Phương Minh, nai Sang hră kơnuk kơna čem rông gưl sa hăng gưl dua Buôn Đôn, să Buôn Đôn, tơring čar Dak Lăk brơi thâo: “Mông anai djŏp anih hrăm yơh kơƀah hơdrôm hră, ha boh anih hrăm hơmâo hơdôm čô čơđai aka ƀu djŏp hơdrôm hră hrăm. Ƀing gơñu mă yua hră sô mơ̆ng ƀing ayong, ƀing amai ñu či hrăm. Hơmâo mơn kơƀang hrăm, dua čô lăng hrŏm, đa 3 čô lăng hrŏm ha sŏp hră đôč”.

Ơi Thái Văn Lộc, Khua sang hră kơnuk kơna čem rông gưl sa -gưl  dua Buôn Đôn brơi thâo, tơdơi kơ mut thun hrăm phrâo, sang hră ăt dŏ kơƀah năng ai 65% hơdrôm hră hrăm. Ƀơi anăp, ƀing nai glăk hyu tơña hơdrôm hră hơđăp mơ̆ng čơđai hrăm hnưr hlâo. Dŏ glăi dong ăt khŏm tơguan mơn: “Sang hră rơkâo kơ hơdôm sang bruă in pơkra hơdrôm hră, tañ pơkra brơi, pơhrua tui hơdrôm hră dŏ kơƀah, biă ñu hơdrôm hră kơƀah pơ plơi pla ataih yaih, kiăng čơđai hơmâo djŏp hră či hrăm”.

Tơring čar Dak Lăk hơmâo năng ai 65.000 čô čơđai mơ̆ng anih muai truh pơ gưl klâo glăk hrăm ƀơi hơdôm boh sang hră amăng tơring. Thun hrăm 2026-2027, rơbêh kơ 34% čô čơđai hơmâo kơnuk kơna djru hơdrôm hră hrăm. Gơnong bruă pơtô hăng pơjuăt Dak Lăk glăk mă yua prăk mơ̆ng kơnuk kơna či blơi hơdrôm hră, dưm amăng sang pơđok hră, brơi čơđai mă yua jăng jai. Samơ̆, bruă anai glăk tơnap mơn yua ƀu hơmâo pô sĭ.

Tui hăng yă Lê Thị Kim Oanh, Kơ-iăng khua gơnong bruă pơtô hăng pơjuăt Dak Lăk, gơnong bruă pơhiăp tom laih hăng sang bruă pơkra hơdrôm hră, sem lăng djŏp anih sĭ mơdrô hră ƀơi hơdôm boh tơring iao gah, samơ̆ aka ƀu hơmâo djŏp mrô pơkă đah mơ̆ng pơƀut blơi hrŏm: “Ră anai Gơnong bruă pơtô hăng pơjuăt ngă bruă laih hăng anih in pơkra hơdrôm hră Pơtô hrăm Việt Nam hăng Ding jum pơtô hăng pơjuăt, či lăi pơhmư̆ anŏ tơnap, kiăng djru brơi hơmâo djŏp hơdrôm hră či kiăng. Ƀơi anăp lĕ tañ pơhrua hơdrôm hră dŏ kơƀah, pơhlom brơi ƀing čơđai hơmâo hơdrôm hră či hrăm”.