Ơi Trần Thanh Mẫn brơi thâo, jơnum lok ƀu tui tơđar tal Sa, khua mua pơ ala mơnuih ƀôn sang dêh čar tal XVI phrâo pơđut laih, pơsit 15 mơta tơlơi phiăn, 6 pok hră pơtrun hơmâo anŏ pơkă ngă tui tơlơi phiăn dêh čar hăng 7 mơta hră pơtrun kơ bruă bơwih ƀong huă mơnuih mơnam pơđĭ kyar. Khua pơ ala mơnuih ƀôn sang čih pioh, lăng yom pran jua mă bruă, prăp lui hlâo, glăm ba, gir run prong mơ̆ng djop sang bruă. Truh ră anai, khua git gai pơ ala mơnuih ƀôn sang dêh čar hơmâo kĭ laih llu hră ngă tui tơlơi phiăn, hră pơtrun mơ̆ng jơnum lok tal Sa.

Jơnum lok 6 mơ̆ng Jơnum min apăn bruă phun pơ ala mơnuih ƀôn sang dêh čar dưi pơphun 2 wơ̆t jơnum pơtum, sui 6 hrơi sa wơ̆t, sem glăi 40 mơta bruă boh yom phun. Tui hăng khua pơ ala mơnuih ƀôn sang dêh čar, anai lĕ tal jơnum yom pơphăn biă mă sem glăi djop tơlơi phiăn, laih dơ̆ng yak prăp lui ƀơi anăp, jơnum lok 2 mơ̆ng ƀing khua mua pơ ala mơnuih ƀôn sang dêh čar tal XVI. Tui hăng anun, Khua pơ ala mơnuih ƀôn sang dêh čar rơkâo, pơtum nao amăng 3 tơlơi či kiăng prong amăng bruă čih pơkra tơlơi phiăn: khom đing nao anŏ tŭ yua, dưi ngă tui sit nik hăng kiăng pơtrut anŏ pơđĭ kyar yơh phun. Jơnum tal anai, Jơnum min apăn bruă phun pơ ala mơnuih ƀôn sang dêh čar amra pơgôp hiăp kơ 31/41 mơta tơlơi phiăn, hră pơtrun či pơdah thâo ƀing pơ ala mơnuih ƀôn sang dêh čar jơnum lok 2; lu tơlơi phiăn pơkă kơ bruă ngă tui prong, pơdjơ̆ nao lu mơta bruă mă amăng sang bruă kơnuk kơna, mơnuih ƀôn sang, sang bruă mơdrô, ƀing ngă bruă mơdrô hăng tơlơi bơwih ƀong huă.

Khua pơ ala mơnuih ƀôn sang dêh čar pơtrun hiăp, khul bruă prong, lu, hrơi mông lĕ ƀiă, samơ̆ ƀu yua kơ tơlơi kiăng ngă giong bruă hăt đơi ôh ngă hrŏ hĭ boh tŭ yua hiam kơ bruă mă. Djop sang bruă khom prăp lui tong ten hră pơar, kiăng pơhlom kơjăp kơ bruă kơđi čar, djơ̆ rơ-ua hăng ngă tui sit nik; jơlan hơdră khom rơđah rơđong, dưi ngă tui sit nik, posir djơ̆ tơlơi kiăng sit nik. Jơnum min apăn bruă phun pơ ala mơnuih ƀôn sang dêh čar pơčrong sai lu tơlơi kiăng pơprong, boh yom phun dŏ phara tơlơi pơgôp hiăp, anŏ hơgĕt dưi ngă pơblih tŭ yua sit nik.

“Tơlơi kiăng lĕ, tơlơi phiăn dêh čar khom rơđah rơđong, sa hnơ̆ng, amuñ ngă tui; khom pơsir hĭ anŏ dŏ kơđông, pơhluai hĭ hăng pok brơi jơlan pơđĭ kyar. Dua lĕ khom hruă kơjăp hloh tơlơi tơpă amăng bruă mă hăng prăp lui djơ̆ hnơ̆ng jơnum lok. Lơ̆m sem lăng jơlan hơdră čih pơkra tơlơi phiăn thun 2027, kâo rơkâo ruah mă hơdôm bruă phun, yom hloh; đing nao hlâo hơdôm bruă kiăng ječ ƀiă, hơdôm tơlơi dŏ kơđông amăng tơlơi phiăn hăng bruă ngă phrâo kiăng čih pơkra tơlơi phiăn djop pơtrut tơlơi bơwih ƀong huă. Kâo kiăng lăi pơtong, čih rơkâo amăng jơlan hơdră lĕ khom ƀuăn hăng glăm ba gơgrong sit amăng bruă mă. Anom bruă pơpă rơkâo đĭ, pơtong rơđah hrơi blan či lăi pơthâo, khom prăp lui hlâo, ngă djơ̆ hrơi pơkă hăng tŭ yua; pơsir hĭ tơlơi juăt ngă čih rơkâo lu, samơ̆ giong anun rơkâo lui hĭ, ruk đuăi, ngă bơbeč djơ̆ amăng jơlan hơdră pơkă abih bang”.

Khua git gai pơ ala mơnuih ƀôn sang dêh čar rơkâo kơnuk kơna khom sem glăi tơpă, anom bruă hlơi čih rơkâo pơdah thâo jơlan hơdră laih anun rơkâo kơdŭn hĭ ƀudah ngă bơbeč djơ̆ jơlan hơdră abih bang. Yua kơ anun, khom ngă tui khut khăt, sit nik ngă giong bruă jao, pơsir tơlơi tơnap tap, anŏ kơđông, kiăng lơ̆n ia dưi pơđĭ kyar hăng rơnuk phrâo ngă djop tơhnal pơkă pơhrui glăi dua mrô.

Brơi thâo jơnum lok 2 ƀing khua mua po ala mơnuih ƀôn sang sem glăi giăm 60 mơta boh yom phun hăng lu tơlơi yom amăng dêh čar, khua pơ ala mơnuih ƀôn sang dêh čar rơkâo khom prăp lui tañ, tong ten hloh ngă hrŏm mơ̆ng blung a; ba jơlan hơdră boh yom phun djop anŏ gêh găl laih či pơčrong sai. Ơi Trần Thanh Mẫn ăt pơtă pơtăn, bruă pơƀut glăi tal jơnum ƀu tui tơđar tal sa khom sit nik, kiăng sem glăi tơlơi hrăm tui, kiăng ngă klă hloh tal tơdơi; laih dơ̆ng pơčrâo rơđah anŏ dŏ kơƀah hăng jơlan hơdră pơsir, khom lăi tơpă, lăi djơ̆. Pơƀut glăi bruă mă lĕ kiăng ƀuh anŏ aka ƀu găl, gir run ngă klă hloh, ƀu djơ̆ lăi kiăng pơđut tal jơnum đôč ôh.