Tui tơlơi pơtrun mrô 66/2025 mơng kơnuk kơna, Gia Lai hơmâo kah pơpha rơbêh 1.400 tơ̆n braih brơi rơbêh 24.000 čô čơđai sang hră dong amăng mrô mơnuih djru ba.

Ƀing mơnuih djru brơi anun lĕ čơđai sang hră gưl I, gưl II hăng gưl III glăk hrăm ƀơi hơdôm kual mơnuih djuai ania ƀiă hăng čư̆ siăng, kual tơnap tap hloh, kual ter hang ia rơsĭ hăng bul pơtâo; ƀing čơđai ataih ayaih, kual čư̆ siăng kriang pơtâo, čơđai ƀu dưi glăi pơ sang tơdơi kơ hrăm giong ha hrơi.

Hơdră djru anai ăt wŏt ƀing čơđai sang hră djuai ania ƀiă, čơđai sang anŏ ƀun rin, giăm ƀun rin kah hăng ƀing čơđai arăng djru ba anun lĕ ană bă tơhan djai pơsăn drơi, tơhan rơka rơkač, ƀing čơđai drơi jăn ƀu klă.

Hăng ƀing čơđai glăk kiăo tui hrăm ƀơi hơdôm Sang hră pơtô bruă mă-pơtô rese, hơdră djru ba anai brơi ƀing mơnuih dong amăng grup djru ba, sang anŏ ƀun rin, giăm ƀun rin, mơnuih djuai ania ƀiă ƀơi kual tơnap tap hloh ƀudah jơlan nao rai mơng sang truh pơ sang hră 10 km pơ glông.

Hrŏm hăng anun, ngă tui tơlơi pơtrun mrô 188/2026 mơng Kơnuk kơna, Gia Lai hơmâo pơhrua dong rơbêh 291 tơ̆n braih djru brơi rơbêh 6.800 čô čơđai. Amăng mrô ania, rơbêh 4.200 čô čơđai dŏ glăi yang hrơi dong djru brơi rơbêh 136 tơ̆n braih; rơbêh 2.500 čô čơđai dŏ đăm glăi djru brơi rơbêh 155 tơ̆n.

Ƀing čơđai anai glăk kiăo tui hrăm ƀơi 7 boh sang hră kơnuk kơna čem rông ba pơlir dua gưl kual giăm guai, hơmâo hơdôm boh sang hră ƀơi hơdôm boh să Ia O, Ia Chia, Ia Mơ, Ia Puch, Ia Nan hăng Ia Dom.

Jơnum min mơnuih ƀon sang tơring čar Gia Lai jao anom bruă răk pioh gơnam tam Kơnuk kơna kual XI pơdŭ pơgiăng, pơhlôm brơi djop braih apiăng hăng braih ƀong brơi jơman ba tơl anih jao brơi ƀơi hơdôm boh să, phường. Bruă jao hăng tŭ mă braih kiăng pơgiong hlâo kơnôl 30/9.

Gơnong bruă pơtô pơjuăt hơmâo jao jing anih phun, gum hrŏm hăng Jơnum min mơnuih ƀon sang hơdôm boh să, phương hăng hơdôm anom bruă bơdjơ̆ nao tŭ mă, kah pơpha braih apiăng hmao tlôn, djơ̆ mơnuih glăk kiăng.

Hơdră djru pơgôp pơhlôm brơi djop tơlơi gal hrăm hră, dŏ hơdip brơi ƀing čơđai sang hră tơnap tap, sit biă ñu ƀơi hơdôm kual ataih, asuek, kual giăm guai; mơng anun djru brơi ƀing čơđai hơđong pran jua nao sang hră amăng thun hrăm phrâo./.